2 Theth 3 - JAM DE NHIALIC 2011

Läŋkï ë Biäkda

¹ Cöök ciëën, wek mïthëkɔckuɔ, Yak lɔ̈ŋ në biäkda ke jam de Bɛ̈nydït ke bï cath ë kueerde, ku lec, acït man leecë ye ë weyiic aya.

² Ku läŋkï ke wo bï luök ë kɔc cin kɔc cïn nïïm, ayï kɔc racpiɔ̈ɔ̈th: acie kɔc kedhie kek cath ë gäm.

³ Ku Bɛ̈nydït en aye piɔ̈u adöt, raan bï we tɔ kääc aril, ku gël week ë kërac.

⁴ Ku wo ye Bɛ̈nydït gam në këdun, nɔn luɔɔi wek ka cuk thɔ̈n week ënɔɔnë, ku nɔn bä wek aa cool ë luɔɔi wek keek.

⁵ Ë Bɛ̈nydït ë ye we dak piɔ̈ɔ̈th ë nhiëër ë Nhialicic, ku dɔk wepiɔ̈ɔ̈th ë liɛɛric liɛɛr ë Kërtho piɔ̈u.

Luɔi bï Kɔc Dhil Lui

⁶ Ku ënɔɔnë, we yöökku, wek mïthëkɔckuɔ, në rin ke Bɛ̈nydan Yecu Kërtho, an, Ratkï röt wei ë mɛnhkënëda lɔ̈ɔ̈m ëbɛ̈n mɛnh kuc rëër, ku reec jam aa piŋ jam cäk yök tëde wook.

⁷ Ku wegup aŋiɛckï nɔn bä wek täuda dhil aa dɔmic: luɔi kën wok kuöc rëër ë weyiic wok cie adaakrɔt,

⁸ ku acïn kuïn de raan töŋ cuk cam youyou, wok ee luui, wok ee röt näk piny ë luɔi arëët, wok ee luui aköl ku wakɔ̈u, ke wo cïï raan töŋ ë wek yiic duëër miɛn.

⁹ Ku acie ciën cïn wok riɛl, ee luɔi bï wo röt tɔ ye kɔc bäk aa woi aguɔkï täuda dɔmic.

¹⁰ Ku acakaa wään tɔ̈u wok ë weyiic, kënë acuk lɛ̈k week an, “Na de raan ee luɔi rɛɛc, ke duökï ee tɔ cäm ayadäŋ.”

¹¹ Luɔi cï wok e piŋ nɔn de kɔc kɔ̈k ë weyiic kɔc kuc rëër ku yek adaakrɔt, ku cïkï ee luui ananden, ku yek röt gap ë luɔi de kɔc kɔ̈k yiic.

¹² Ku wo yöök kɔc cït keek ënɔɔnë ku guïïrku keek në Bɛ̈nydan Yecu Kërtho an, bïk aa luui ë lik, ku yek kuïnden cam guöp.

¹³ Ku week, wek mïthëkɔckuɔ, duökï ee bäp në luɔi de këpiɛth.

¹⁴ Ku na de raan reec jamda piŋ jam nu ë awerekë yic, yak raanë gɔɔk guöp, ku duökï ee mat ë yen, ke bï yäär.

¹⁵ Ku duökï ee tɔ ye raan dɛ wek ater, yak nen tei cït man ë mɛnhkënëdun.

Wël Ciëën

¹⁶ Ku ënɔɔnë, Bɛ̈nydïït de mät, yenguöp, ë ye week gäm mät anandun në käŋ yiic kedhie. Ë Bɛ̈nydït ë ye tɔ̈u ke week wedhie.

¹⁷ Thiëcdï kï, yɛn Paulo, thiëc cä gɔ̈ɔ̈r ë yacin, ku yen ee ŋïny bä wek e ŋic ë awereek yiic kedhie: gäär aa yɛn gär kï.

¹⁸ Ë dhuëëŋ de Bɛ̈nydan Yecu Kërtho piɔ̈u ë tɔ̈u ke week wedhie. Amiin.