2 Theth 2 - JAM DE NHIALIC 2011

Kɔc Rac ë Taiwei

¹ Ku ënɔɔnë, wek läŋku, wek mïthëkɔckuɔ, në këde bɛ̈n bï Bɛ̈nydan Yecu Kërtho bɛ̈n, ku guëër bï wo guëër ë yelɔ̈ɔ̈m:

² an, Duökï wenïïm ee dap tɔ liëëpë, ku duökï ee diɛɛr në wëi, ayï jam, ayï awerek cï gɔ̈ɔ̈r, awerek cït kë ë bɔ̈ tëde wook, luel en an, Kööl ë Bɛ̈nydït acï guɔ ɣëët.

³ Ë cïn raan ee we math, acakaa yen ë mɛth week ë ŋö: köölë acïï bï kɔn bɛ̈n, të ŋoot ë dɔk ke kën bɛ̈n, dɔ̈ŋ ee kɔc röt dak ciëën, ku të kënë raan rac ëtaiwei rɔt guɔ nyooth, yen aye wën ë riääk ëliŋliŋ.

⁴ Raan ee rɔt yiëk ater në ka cï tɔ ye Nhialic ku läm ëbɛ̈n, ayï ka riëëuwë, ku tɔ rɔt dït ë keek, ago rëër ë luaŋdïït ë Nhialic ke ye rɔt tɔ ye Nhialic guöp.

⁵ Kɛ̈nkï wenïïm tak, nɔn cän kakë lɛ̈k week wään ŋuɔɔt ɛn ke ya nu ë weyiic?

⁶ Ku ënɔɔnë we ŋic kë pën en, ee luɔi bï en rɔt nyooth në köölde guöp.

⁷ Luɔi de reec de löŋ luɔi de këcïmoony ee luui ënɔɔnë: ku raan pën en luɔi aläl anu ënɔɔnë aɣet të bï e nyaai ë ciɛɛlic.

⁸ Ku yen abï raanë jɔ tïc, raan reec löŋ ëliŋliŋ, raan bïï Bɛ̈nydït Yecu nɔ̈k në wëi bɔ̈ bei ë yethok, ku tɔ mär në riau de bɛ̈nde:

⁹ Bɛ̈nde yen ee raanë ee këde luɔi de Catan në riɛl ëbɛ̈n ku göök ku luɔi bï kɔc ke gäi, luɔi lueth,

¹⁰ ku në mɛth bï en kɔc mär math në kërac, luɔi cï kek nhiëër ee yic rɛɛc dɔm, ke ke bï kony wëi.

¹¹ Yen abï Nhialic kën ee kɔc math tuöc keek, ke ke bï lueth gam:

¹² luɔi bï löŋden guiir atuc, kek kɔc reec yic gam kedhie, kɔc mit piɔ̈ɔ̈th në luɔi de kërac.

Yïn cï Lɔc në Biäk de Kunydewëi

¹³ Ku wo bï dhil cool ë lec Nhialic në biäkdun, wek mïthëkɔckuɔ nhiɛɛr Bɛ̈nydït, në lony cï Nhialic we lɔc të ɣɔn ciɛkë käŋ, ke bï we kony wëi në ɣɛɛr bä wek piɔ̈ɔ̈th ɣɛɛr, ku në gäm bä wek yic gam.

¹⁴ Yen aa cɔɔl en week në wëlkuɔn piɛth, ke we bï dhuëëŋ de Bɛ̈nydan Yecu Kërtho yök.

¹⁵ Yen ka, wek mïthëkɔckuɔ, yak jɔ kɔ̈ɔ̈c aril, ku yak wël cï yiɛ̈n kɔc döt wël cï we wɛ̈ɛ̈t ë keek, nɔn ee yen jam de raan thok, ku nɔn ee yen awerek cuk gɔ̈ɔ̈r.

¹⁶ Ku ënɔɔnë, Bɛ̈nydan Yecu Kërtho guöp, ku Nhialic Wääda, Raan cï wo nhiaar, Raan cï wo gäm muŋdepiɔ̈u bï ɣet athɛɛr, ku gɛm aŋäth piɛth në dhuëëŋ de yenpiɔ̈u,

¹⁷ ë ye week muk piɔ̈ɔ̈th, ku tɔ ke ril në jam piɛth ëbɛ̈n ku luɔi piɛth ëbɛ̈n.