2 Tham 6 - JAM DE NHIALIC 2011

Athänduŋ de Mät Abïïyë Jeruthalem

¹ Na wën ke Debid ë cɔl rem piɛth de tɔŋ ë Yithriɛl, kɔc lëu bot kathiërdiäk 30,000 ë röör.

² Go Debid kekë kɔckɛn cath ë yen kedhie lɔ Baala në Juda, bïk lɔ athänduŋ de Nhialic lɔ bɛ̈ɛ̈i ëtɛ̈ɛ̈n, athänduŋ de yic rin ke Bɛ̈nydït de rɛm, raan tɔ̈u ë thööcde në Cerubiim nïïm.

³ Gokï Athänduŋ de Nhialic nööm ɣön de Abinadap tɔ̈u në kuur nɔm, ku tɛ̈ɛ̈ukï në abël ë piacë cuëëc nɔm. Ku kuath wɛ̈ɛ̈t ke Abinadap yï Yudha ku Aɣiyo abël,

⁴ ku cath Aɣiyo kekë mänhë në athänduŋ de Nhialic nɔm tueŋ.

⁵ Ku Debid ku baai de Yithriɛl ëbɛ̈n aake cɔ̈ŋ ke ke ket diɛt piɔɔny kek Bɛ̈nydït në riɛlden ëbɛ̈n. Aake gut thom, ku aruöör, ku kothkï kɛŋ, löör, ku yek löth gut.

⁶ Na wën aacï kɔc ɣet tëde käm de Nacon, go miöör kɔ̈th, go Yudha athänduŋ de Nhialic dɔm.

⁷ Go Bɛ̈nydït guɔ gɔ̈th kekë Yudha ku nɛ̈k në biäk de kërɛɛc cï looi. Go Yudha thou ëtɛ̈ɛ̈n në athänduŋ de Nhialic lɔ̈ɔ̈m,

⁸ ago ëtɛ̈ɛ̈n cäk an Peredh Yudha (në thoŋda yen ye ariöp de kërɛɛc de Yudha). Go Debid gɔ̈th në biäk cï Bɛ̈nydït Yudha nɔ̈k në agɔ̈th.

⁹ Debid acï bɛ̈n riɔ̈ɔ̈c në Bɛ̈nydït ee köölë, go lueel an, “Ënɔɔnë, bä athänduŋ de mät ja jɔt adï?”

¹⁰ Go Debid athänduŋ de mät kɛ̈n bɛ lɛɛr Pänydït de Debid ke yen, ago lɛɛr ɣön de Obed Edom, raan wun ë Gath.

¹¹ Go athänduŋ de mät tɔ̈u ɣön ë Obed Edom në pɛ̈i kadiäk, ku Bɛ̈nydït acï Obed Edom bɛ̈n thieei kekë paande ëbɛ̈n.

¹² Na wën ke lëk ë kɔc Debid an Bɛ̈nydït acï paan de Obed Edom thieei kekë kajuëc tɔ̈u në yen, në biäk tɔ̈u ë athänduŋ de Nhialic ëtɛ̈ɛ̈n, ago Debid athänduŋ de Nhialic lɔ diëc paan de Obed Edom ku leer pänydït de Debid në dhuëëŋdït arëët.

¹³ Na wën aacï kɔc ɣɛ̈ɛ̈c athänduŋ de män lɔ të cït akɛɛth kadhetem, go Debid keek tɔ kääc, ku nɛ̈k Bɛ̈nydït thɔn ë weŋ kekë dan cuai ke ee miɔ̈c.

¹⁴ Na wën ke Debid ë cöŋ në Bɛ̈nydït nɔm në miɛt ë piɔ̈u, ke ceŋ lupɔɔ ke ajïpɔ.

¹⁵ Go Debid kekë baai de Yithriɛl ëbɛ̈n athänduŋ de mät lɛɛr Jeruthalem, ke ke loi awuɔɔu de miɛtëpiɔ̈u ku yek kɛŋ kooth.

¹⁶ Na wën aa lɔ athänduŋ de mät ɣet Pänydït de Debid, go nyan ë Thaulo Mical biic lieec ë awëërnyin go melik Debid tïŋ ke cɔ̈ŋ ke ye kɛɛc nhial në Bɛ̈nydït lɔ̈ɔ̈m, go piɔ̈u rac ke yen.

¹⁷ Na wën ke ke bïï athänduŋ de mät, ku tɛ̈ɛ̈ukï tëde në paany yic të wään bïï Debid luöi yen. Go Bɛ̈nydït gäm miɔ̈c ye nyop ëbɛ̈n, ku miɔ̈c de mät.

¹⁸ Na wën cï Debid thök ë gɛm gɛm en miɔ̈c ye nyop ëbɛ̈n, ku miɔ̈c de mät, go kɔc thieei në rin ke Bɛ̈nydït de rɛm.

¹⁹ Na wën ke Debid ë gëm kɔc kedhie kuïïn, diäär ku röör. Go raan töŋ de Yithriɛl aa gäm kuïn cï pam, ku rïŋ cï nyop, ku thöu, ku kaak. Na wën ke ŋɛk ë jɔ lɔ baaide.

²⁰ Go Debid rɔt puɔ̈k baai ke lɔ baaiden lɔ thieei, Go Mical bɛ̈n bei bïï yen loor nɔm go lɛ̈k en an, “Melik de Yithriɛl acï rɔt yɔ̈ɔ̈r ee köölë! Yïn cï lupɔɔku bɛ̈ɛ̈i bei në duet lïïm ke bänyku nïïm!”

²¹ Na wën ke Debid ë yɔ̈ɔ̈k Mical an, “Yɛn aa cöŋ dhuëëŋ ɛn Bɛ̈nydït guöp, raan wään cï ya lɔc në nyin ë wuur yic kekë dhiënde. Ku tɔ yɛn ee bɛ̈ny de kɔc ke Yithriɛl ëbɛ̈n. Ku yɛn bï ŋoot ke ya dhuëŋ Bɛ̈nydït guöp në cöŋ,

²² ku yɛn bï ŋoot ke ya yäär rɔt raan juëc, aye tak nɔn ciën ɛn naamdï, ku duetkë abïk yɛn riëëu aläl!”

²³ Ku Mical nyan ë Thaulo aa rɛ̈ɛ̈r ke cïn nɔm mïth agut cï thonde.