2 Tham 4 - JAM DE NHIALIC 2011

Thon ë Yiciboceth

¹ Na wën ke Yiciboceth wën Thaulo piŋ nɔn cïï Abener thou në Ɣebron, go riɔ̈ɔ̈c abï kɔc ke Yithriɛl riɔ̈ɔ̈c kedhie.

² Ku Yiciboceth ade nɔm kɔc kaarou ayek bäny ke rem ë pëëc. Raan tök acɔl Baana, ku raan däŋë acɔl Rekap, ayek wɛ̈ɛ̈t ke Rimon, raan wun ë Beeroth, në dhiën de Benjamin yic (Wun cɔl Beeroth ee këde dhiën ë Benjamin.

³ Ku kɔc ë kɔn Beeroth ceŋ acïk kat lekï Gitiam, ku arɛ̈ɛ̈rkï ëtɛ̈ɛ̈n agut cï ee köölë.)

⁴ Wën ë Thaulo Jɔnathan ade nɔm wëndɛn cɔl Mepiboceth ku ee ŋɔl ë cök kedhie. Aa ye run dhïc ɣɔn bïï thoŋ de thon ë Thaulo kekë Jɔnathan në Jedhreel. Na wën ke Mepiboceth ë gɔpic në nyan ee ye muk ku kɔt ke yen. Na wën bɛɛn rɔt, go wiɛt piny, ago ja ya ŋɔl.

⁵ Rekap ku Baana, wɛ̈ɛ̈t ke Rimon, raan wun ë Beeroth acïk lɔ paan ë Yiciboceth ɣɔn thëën ku yɔ̈kkï ke cï tɔ̈c.

⁶ Ku tiiŋ ee ɣöt tiit thok aa cï dak ke kiëc de agamɔ, go nok ku niin, go Rekap kekë Baana mänhë röt kual ɣöt.

⁷ Wën cï kek ɣet ɣöt, gokï yök anin në agende nɔm, agokï nɔ̈k ku tëëmkï nɔmde bei. Gokï nɔmde jɔt në keek ëtök, ku tëëkkï në kueer de Araba ruukï ke ke cath ke ke kuany Wak ë Jordan yic.

⁸ Na wën aa cïk ɣëët Ɣebron, gokï nɔmde gäm Debid ku lëkkï melik an, “Ŋö nɔm de Yiciboceth kï, wën ë Thaulo raan dɛ wek ater. Aa kɔɔr an nɛ̈k yïn! Ee köölë Bɛ̈nydït acï yïn cuööt në Thaulo ke ke dhiënde në kë cïk luööi yïn!”

⁹ Go Debid puɔ̈k nɔm Rekap kekë Baana mänhë, wɛ̈ɛ̈t ke Rimon, raan wum ë Beeroth an, “Yɛn cï kuëëŋ në rin ë Bɛ̈nydït pïïr, raan cï yɛn luäk bei në karil yiic ëbɛ̈n!

¹⁰ Raan ë bɔ̈ tëde yɛn ë Dhiklak ku lɛ̈k ɛn thoŋ de thon ë Thaulo, aa ya tak nɔn ë bïï yen thoŋ piɛth. Acä bɛ̈n tɔ dɔm ku ta näk. Yen ariöpdɛn ë gäm yen ka, në thoŋ piɛth cï lɛ̈k yɛn!

¹¹ Ku bïï thok jɔ tuöc adï tëde kɔc ee karɛc looi, kɔc cï raan cïn guöp awäc lɔ nɔ̈k ke nin ɣönde! Ënɔɔnë abä guöör në week, në biäk cä wek e nɔ̈k, ku nyaai week nyïïn ë piny nɔm!”

¹² Go Debid remdɛn ë tɔŋ yɔ̈ɔ̈k bïk Rekap ku Baana lɔ nɔ̈k, gokï Rekap ku Baana tɛm cin ku cök ku jɔkï keek nöök nhial në tim nɔm të thiääk ke awuöl de Ɣebron. Na wën ke ke jɔt nɔm de Yiciboceth ku lek tɔ̈ɔ̈u në raŋ de Abener yic në Ɣebron.