2 Tham 24 - JAM DE NHIALIC 2011

Debid Akuen Kɔc

¹ Na wën ke Bɛ̈nydït ë be göth kekë kɔc ke Yithriɛl, go Debid tɔ yïn nuan kɔc ke Yithriɛl. Go Bɛ̈nydït lɛ̈k en an, “Lɔ kuen kɔc ke Yithriɛl kekë kɔc ke Juda.”

² Go Debid Jowap bɛ̈ny ë rem de tɔŋ yɔ̈ɔ̈k an, “Lɔ ë dhiëën ke Yithriɛl yiic kedhie, gɔl në Dan lee Biirceba, ku kuen kɔc kedhie. Aguɔ kuën de kɔc ŋic.”

³ Go Jowap lɛ̈k melik an, “Yïn bïï Bɛ̈nydït Nhialicdu gäm bot juëc ke kɔc, raan bot, ku abï bɛ̈nydiën melik tïŋ ke loi rɔt. Ku eeŋö kɔɔr bä luöi kë cït ee kënë?”

⁴ Ku melik acï Jowap kekë bäny ke rem de tɔŋ tɔ gam jamde, gokï melik nyääŋ piny lek kɔc ke Yithriɛl kueen.

⁵ Na wën ke ke tem wɛ̈ɛ̈r de Jordan kɔ̈u lek piɔ̈ɔ̈t në Aroyer, wun nu ë Wakic, piny ë Gad. Ku jɔkï jäl ëtɛ̈ɛ̈n lekï Jadher të lɔ rut,

⁶ na wën ke ke ɣet Giliyad, ku Kadec piny de Ɣit. Ku lekï Dan, ku ëtɛ̈ɛ̈n jɔkï lɔ Thidon.

⁷ Gokï lɔ wun cï gël de Tayer, ku lekï ë wuöt yiic kedhie, wuöt ke kɔc ke Ɣib, ku kɔc ke Kanaan. Na wën, ke ke jɔ ɣet Biirceba wun nu të lɔ wöuwic de Juda.

⁸ Na wën aa cïk pɛ̈i kadhoŋuan ku nïn kathiërrou thöl, ku cïk tëëk ë baai yic ëbɛ̈n, ke ke jɔ kenïïm dak Jeruthalem.

⁹ Go Jowap kuën de kɔc lëu luɔi de rem de tɔŋ jɔ gäm melik. Yithriɛl ade yic bot kabɛ̈t ke aguum (800,000) de kɔc, ku Juda ade yic bot kadhïc ke aguum (500,000) de kɔc.

¹⁰ Na wën cï Debid kɔc thöl ë kuën, go jam de piɔ̈u ye nuaan, ago lɛ̈k Bɛ̈nydït an, “Yɛn cï kërac aläl looi. Yïn läŋ päl ë yɛn awänydï. Acä looi në dhɔ̈ɔ̈n.”

¹¹ Na ɣɔn amiäk, aa pääc Debid ë nïn yic, go jam de Bɛ̈nydït bɛ̈n tëde tiët Gad, monydaai de Debid, lueel an,

¹² “Lɔ lɛ̈kë Debid an, ‘yïn cä gäm käŋ kadiäk, nöm tök ë keyiic ku abä luöi yïn.”

¹³ Na wën ke Gad jɔ lɔ tëde Debid ku lɛ̈k en an, “Ee kënou yen bä dɔm? Cɔŋ de run kadiäk tëde yïn wekë pinydun? Ku nɔn bï kɔc ke aterdun week cop në pɛ̈i kadiäk? Ku nɔn ee jɔŋ tuc thok bï we nɔ̈k ë nïn kadiäk pinydun? Tak ee kënë yic apiɛth. Ku jɔ tök meek ee kake yiic, kë bä lɔ lɛ̈k Bɛ̈nydït.”

¹⁴ Go Debid lɛ̈k Gad an, “Yɛn tɔ̈u në riäŋdït yic! Ku acä kɔɔr bï mɛnh ë raan ya luöi këtuc. Tɔ Bɛ̈nydït lui wo këtuc guöpde, në biäk ee Bɛ̈nydït piɔ̈u kok.”

¹⁵ Go Bɛ̈nydït jɔŋ näk kɔc tuöc kɔc ke Yithriɛl, gɔl ɣɔn amiäk rial ke näk aɣët të cï lueel bï en thök thïn. Aa gɔl nääk ë Dan lee Biirceba, abï aguum kathiërdhorou 70,000 de kɔc thou.

¹⁶ Na wën aa kɔɔr tunynhial ë Bɛ̈nydït an riëëk Jeruthalem, go Bɛ̈nydït piɔ̈u kok në kërɛɛc dït cït ee kënë, go lɛ̈k tunynhial wën näk kɔc an, “Kääcë! Kënë acï loi!” Ku tunynhial aacï thiääk kekë tëde käm de Arauna raan de Jebuth.

¹⁷ Na wën aa tïŋ Debid tunynhial wën näk kɔc, go lɛ̈k Bɛ̈nydït an, “Ee yɛn ë loi kërac. Ee yɛn cï awäc looi. Eeŋö cïï ë kɔc kuany nyïïnkë looi? Yïn duëër ya luöi këtuc wokë kɔc ke dhiëndï.”

¹⁸ Na ee kööl manë go Gad lɔ tëde Debid ku lëk en an, “Lɔ nhial të ye Arauna käm thïn, ku yiëkë yïk Bɛ̈nydït.”

¹⁹ Go Debid kë cïï Gad lɛ̈k en looi, cït man cï Bɛ̈nydït Ye lɛ̈k yen.

²⁰ Go Arauna melik kekë bänyke tïŋ ke ke bɔ̈ tënu yen. Go Arauna ye luɔɔr nɔm biic, ku gut yenɔm piny në Debid nɔm

²¹ go Arauna ye luɔp an, “Bɛ̈nydï, eeŋö tɔ yï bɔ̈ ee tënë?” Go Debid bɛ̈ɛ̈r an, “Yɛn aa bɔ̈ bä tëduön de käm bɛ̈n ɣɔɔc, ku yiëk yïk Bɛ̈nydït, yen abï jɔk kɔ̈ɔ̈c.

²² Go Arauna lɛ̈k Debid an, “Bɛ̈nydï, nöm këduön kɔɔr bïï yïn miɔ̈c de Bɛ̈nydït looi. Nöm miöör bïk aa miɔ̈c ye nyop ëbɛ̈n ë yïk nɔm, ku tiimken ku wai ke käm abïï ë mac dɛ̈ɛ̈p.”

²³ Go Arauna keek gäm melik kedhie, ku lɛ̈k Debid an, “Në Bɛ̈nydït Nhialicdu gam miɔ̈cduön bä gam.”

²⁴ Go melik jam de Arauna bɛ̈ɛ̈r an, “Ei, yïn bä gäm wëu në biäkde. Yɛn cïï miɔ̈c ye nyop ëbɛ̈n bï gäm Bɛ̈nydït Nhialicdï, miɔ̈c cïn wënh cï jɔt tëde yɛn.” Ago Debid tëde käm ɣɔɔc kekë miöör në atek kathiërdhïc.

²⁵ Go yïk yiëk Bɛ̈nydït ëtɛ̈ɛ̈n, ku gɛm miɔ̈c ye nyop ëbɛ̈n, ku miɔ̈c de mät. Ago Bɛ̈nydït lɔ̈ŋde piŋ, ku jɔ jɔk kɔ̈ɔ̈c ë Yithriɛl.