2 Tham 23 - JAM DE NHIALIC 2011

Wël Ciëën ke Debid

¹ Debid wën ë Jethe, ee raan cïï Nhialic Awärjäŋ tɔ dït, acïï Nhialic de Jakop lɔc ke bï ya melik, ku ye raan ee Yithriɛl cäk diɛt läk. Kakë ayek wël ciëën ke Debid:

² Wëi ke Bɛ̈nydït ajamkï në yaguöp, jamde atɔ̈u në yathok.

³ Nhialic de Yithriɛl acï jam, acïï Raan ee Yithriɛl gël lɛ̈k ɛn an: “Melik ee Piny cieŋ ë yic, Raan ee piny cieŋ në riëëu de Nhialic,

⁴ acït ɣɛɛr de aköl amiäk ee riau të cïn luät, aköl ee wal tɔ lɔ bilbil të cïï deŋ thëu.”

⁵ Yen luɔi bïï Nhialic käudï thieei ka, në baŋ cï yen män bï tɔ̈u athɛɛr looi kekë yɛn, amat cïï bïï bɛ dhoŋ kɔ̈u, ee gutguut cïï bïï waar. Yen kë ya kɔɔr ëbɛ̈n ka, kënë abï ya tiëmdï, ku abï Nhialic tɔ loi rɔt.

⁶ Ku kɔc kuc Nhialic acïtkï kuɔɔth ye cuat wei, ke cïn raan ee ke jam në yeciin.

⁷ Abïï raan ke jok në wai ku nɔn ee wëëth, ku abï keek nyop ë mac taitai.

Rem ë Tɔŋ ë Debid cï Leec

⁸ Kakë ayek rin ke rem ë tɔŋ ë Debid: raan tueŋ ee Jocep Bathcebeth, raan wun ë Takemon, yen aye bɛ̈ny de diäk. Acï thɔ̈ɔ̈r kekë bot kabɛ̈t de kɔc ke muk tɔŋde, ago keek nɔ̈k kedhie në tɔŋ tökic.

⁹ Ku raan de rou ee Eleyadhar wën ë Dodo, ee raan dhiën de Aɣoi. Na ɣɔn ë kööl tök ke Eleyadhar kekë Debid ë ke guɛ̈ɛ̈k Pilithiin cï kenïïm ë baŋ ë tɔŋ, go kɔc ke Yithriɛl röt miɛɛt ciëën

¹⁰ ago kɔ̈ɔ̈c ee tëdɛnë, ku piɔ̈t ke Pilithiin, abï ciin ŋoot në abätäude kɔ̈u ke cïï päl. Go Bɛ̈nydït tɔŋ tiaam arëët ee köölë. Na wën aacï tɔŋ thök, go kɔc ke Yithriɛl kenïïm puɔ̈k të tɔ̈u ë Eleyadhar, ku jɔkï wëu ke tɔŋ ku kööt nööm tëde kɔc cï thou.

¹¹ Ku raan de diäk ee Cama, wën ë Agee raan wun de Ɣarar. Pilithiin aake cï kenïïm kut në Leɣi, të tɔ̈u ë dom de tɔɔŋ piny. Go kɔc ke Yithriɛl kat ë Pilithiin,

¹² ku kääc Cama tëde domic, ku gël këde, ku nɛ̈k kɔc ke Pilithiin. Go Bɛ̈nydït tɔŋ tiaam arëët ee köölë.

¹³ Të ye akööl ke tëm jɔ thiɔ̈k, go kɔc kadiäk në thiërdiäkic lɔ tënu köŋ de Adulam, të wään nu ë Debid thïn, ku rem de tɔŋ ë Pilithiin acï piɔ̈ɔ̈t ë Wak de Repaim yic.

¹⁴ Ku Debid aa nu wun cï gëlic, ku kut de Pilithiin aake cï Bethleɣem ɣap.

¹⁵ Go Debid baaiden tak, go lueel an, “Akaar në yapiɔ̈u luöi duëër en dɛ raan yïn ɛn pïïu në yinh nu në kal ë Bethleɣem thok!”

¹⁶ Go jööt kadiäk ke rem de tɔŋ Pilithiin reet yiic, ku lek pïïu bɛ̈ɛ̈i ë yinh nu ë Bethleɣem thok, ku yïnkï Debid. Go pïïu kɛ̈n dek, ago pïïu wäl piny ku gëm keek Bɛ̈nydït,

¹⁷ ku lueel an, “Bɛ̈nydït, yɛn cïï pïïukë duëër dek, yɛn duëër ciët kë dek riɛm de kɔc cï wëiken kuɔɔn!” Ago jɔ jaai ke cïï dëk. Kakë ee luɔi de jööt cïï kɔc ril ke rem de tɔŋ kadiäk looi.

¹⁸ Abicai, mänhë Jowap (manden acɔl Dheruia) ee bɛ̈ny de thiërdiäŋ cï leec. Acï piɔ̈t ke bot kadiäk de kɔc ke muk tɔŋ ku nɛ̈k keek kedhie, ago jɔ ŋic arëët në thiërdiäk yiic.

¹⁹ Ku aaye raan ŋic aläl në thiërdiäk yiic. Acï bɛ̈n aa bɛ̈nydɛn ë tɔŋ wat, ku akën bɛ̈n dɛ kɛk cït man de “diäk.”

²⁰ Ku Benaya wën ë Jeɣoyada, ee raan däŋ ŋic, ee raan wun ë Kabedhiil, ku cï kake jööt juëc looi, acï jööt ke Mowap kaarou nɔ̈k. Acï köör kɔn lɔ nɔ̈k aya ë pulic në kööl cïï pïïu rɔ̈k.

²¹ Benaya acï raan dït kɔ̈u de Rip nɔ̈k ke muk tɔŋ ë yeciin. Go Benaya raan de Rip yup ë thieec, ku nɛ̈ɛ̈i tɔŋ bei ë raan ciin, ku nɛ̈k në tɔŋde.

²² Kakë ee ka cïï Benaya wën Jeɣoyada looi, ku ye raan töŋ de kɔc “kathiërdiäk.”

²³ Aaye raan ŋic në keyiic, ku aa cïï ŋic awär kac “kathiërdiäk.” Go Debid ye tääu në kɔc ee yen tiit nïïm.

^24-39 Ku rin ke kɔc tɔ̈u në kɔc kathiërdiäk yiic: Athaɣel mänhë ë Jowap ee raan töŋ de thiërdiäk, Elanan wën ë Dodo në Bethleɣem, Cama ku Elika kɔc wun ë Ɣarod, Ɣeledh raan de Pelet, Yira wën de Yikec në Tekowa, Abiedher raan de Anathoth, Mebunai raan de Ɣuca, Dhalmon raan de Aɣoi, Maɣarai raan de Netopa. Ɣeleb wën de Baana raan de Netopa Yitai wën de Ribai raan de Gibia paan ë Benjamin, Benaya raan de Pirathon Ɣidai raan wun ë Wak thiääk ke Gaac, Abialbon raan de Araba, Adhimabeth raan de Baɣurim. Eliaba raan de Caalbon, Wɛ̈ɛ̈t ke Jacen Jɔnathan. Cama raan de Ɣarar, Aɣiam wën de Carar raan de Ɣarar, Elipelet wën de Aɣathbai raan de Maaka. Eliam wën de Aɣithopel raan de Gilo, Ɣedhro raan de Karmel, Paarai raan de Arab Yigal wën de Nathan raan de Dhoba, Bani raan de Gad, Dhelek raan de Ammon, Naɣarai raan de Beeroth, raan ee ka ke tɔŋ ke Jowap wën de Dheruia muk, Yira ku Garep kɔc ë Jatir, Yuria raan de Ɣit. Keek kedhie ayek thiërdiäk ku dhorou.