2 Tham 22 - JAM DE NHIALIC 2011

Din de Tiëm ë Debid

¹ Go Debid dit kɛ̈t Bɛ̈nydït ɣɔn cïï Bɛ̈nydït ye kony në Thaulo cin kekë kɔc kɔ̈k de kek ater.

² Bɛ̈nydït Yen ee kuurdï, ku ee Yen ee yɛn gël, ku Ye kony de wëikï.

³ Nhialicdï Yen ee kuurdï. Yɛn duëër kat ke ya lɔ tëde Yen ke bï ya kony. Yen ee köndï ku Ye konydiën ril, Yen ee ya gël ku Yen ee tëdiën ee kuɔɔny. Ku Bɛ̈nydït acï yɛn luök në akuöörkuööric.

⁴ Yɛn bï Bɛ̈nydït cɔɔl, Yen arɔ̈ŋ kekë lɛ̈c, ku Yen abï yɛn tɔ poth tëde kɔc de wok ater.

⁵ Ku apiöŋ de thuɔɔu acï bɛ̈n ë yalɔ̈ɔ̈m. Ku kiɛɛr ke thuɔɔu acïk a tuɔɔk cil.

⁶ Ku wïïn ke paan ë thuɔɔu acï ke duööt ë yaguöp. Ku raŋ de thuɔɔu acï thiɔ̈k ë yalɔ̈ɔ̈m.

⁷ Yɛn ee Bɛ̈nydït cɔɔl në nuan cï a yök, Yɛn ee Nhialicdï cɔɔl bï a kony. Go ya piŋ röl Luaŋdɛn ë lɔ̈ŋ, acï dhiëndiën ë kuɔɔny piŋ.

⁸ Go piny lath ku nieeŋ rɔt, ku dhoŋ këërkëër ke tënhial ku kuemkï, në biäk cïï Nhialic göth.

⁹ Tol bɛ̈n bei ë yewum, ku bɔ̈ many dɛ̈p bei kekë atiam ë mac ë yethok.

¹⁰ Acï tënhial reetic ku bïï piny, kekë luän col ë yecök piny.

¹¹ Ee kɛɛc në cerubiim kɔ̈u, ku ciɛth në wuök ke yom kɔ̈ɔ̈th.

¹² Ee rɔt kum në mɔ̈ɔ̈th ku jɔ gɛɛu cil në ruu kekë luän dït,

¹³ atiam ë mac ee biöl në wil ë deŋ ee bɛ̈n bei ë yelɔ̈ɔ̈m.

¹⁴ Bɛ̈nydït ee rel tënhial, ago röl de Awärjäŋ Nhialic piŋ.

¹⁵ Ee dhɛ̈ŋke moc ku thiëi kɔc de ater në Yen, në wil ee riau aye keek gäm riɔ̈ɔ̈c.

¹⁶ Piny de abäpdit acï liep nɔm, ku tïŋ këërkëër ke piny, wään bïï Bɛ̈nydït kɔc ke aterde ŋëny ku ŋɛ̈ɛ̈r keek në agɔ̈th.

¹⁷ Go Bɛ̈nydït bɛ̈n piny nhial ku jɔt ɛn, acï yɛn miëët bei në pïïu thuth yiic.

¹⁸ Acï yɛn luök tëde kɔckiën ke ater ril, ku tëde kɔc man ɛn guöp ëbɛ̈n, kɔc ril arëët ë yɛn.

¹⁹ Ayek a mak të täu ɛn në nuanic, ku Bɛ̈nydït ee yɛn gël.

²⁰ Ee ya kony në këracic, acï ya kony në mit en piɔ̈u ke yɛn

²¹ Ku Bɛ̈nydït acï ya thieei ë baŋ de piathëpiɔ̈ndï, ee yɛn gäm athiɛɛi në biäk cïn en kërɛɛc cä looi.

²² Ku yɛn cï löŋ de Bɛ̈nydït riëëu, yɛn kën rɔt yal wei në Nhialicdï yic.

²³ Yɛn cï lööŋke döt kedhie, Ku yɛn kën lööŋke dhoŋ kɔ̈ɔ̈th.

²⁴ Aŋic nɔn ciën ɛn awäc në Yenɔm, ku cä rɔt tiit ke cïn kërɛɛc luɔi.

²⁵ Ago Bɛ̈nydït ya thieei në biäk de piathëpiɔ̈ndï, ku në biäk ŋic en en nɔn ciën ɛn guöp awäc.

²⁶ Bɛ̈nydït Yïn adöt tëde kɔc adöt ë Yïn, ku Yïn piɛth arëët tëde kɔc piɛth.

²⁷ Yïn lɔ piɔ̈u wai wekë kɔc lɔ piɔ̈ɔ̈th wai, ku Yïn man kɔc ee karɛc looi.

²⁸ Yïn ee kɔc ee röt kuɔɔr piny kony, ku Yïn ee kɔc ee röt lɛɛc kuɔɔr piny.

²⁹ Bɛ̈nydït, Yïn ee ɣɛɛrdï. Yïn ee mɔ̈ɔ̈th riaau ë yalɔ̈ɔ̈m.

³⁰ Yïn cï a gäm riɛl bän kɔc ke aterdï mak ku gämë yɛn riɛl bän kɛ̈lken lïïr nïïm.

³¹ Kuɛɛr ke Nhialic ayek dikëdik, ku wëlke aye ke ŋɔ̈ɔ̈th. Yen acït köt tëde kɔc ë gëlde kɔɔr.

³² Bɛ̈nydït Yetök En ee Nhialic, ku Nhialic Yetök Yen ee wo gël.

³³ Nhialic yen ee tëdiën ë thiaan, ee kueerdï tɔ piɛth.

³⁴ Ee ya tɔ ril cök cït man ë kɛɛu,, ee yɛn gël në kur nïïm.

³⁵ Ku ee yɛn wɛ̈ɛ̈t në tɔŋ aguɔ dhaŋ de maläŋ lëu në muc.

³⁶ Bɛ̈nydït, Yïn cï ya gäm kön ë kuɔɔnydu, kuɔɔnydu acï ya tɔ ee raan dït.

³⁷ Yïn cï ya gël në baŋ bïï ë ya peec, ku akën kɔn löny.

³⁸ Yɛn cï kɔc ke aterdï cop ku tiaam keek, yɛn cie kɔ̈ɔ̈c agut të bän ke riɔ̈ɔ̈k.

³⁹ Aya keek duöi piny ku acïkï röt duëër bɛ jɔt, ayek dhɔt piny ke ke cä tiaam.

⁴⁰ Yïn ee yɛn gäm riɛl de tɔŋ, ku tɔ ya tiam kɔc ke aterdï.

⁴¹ Yïn ee kɔc ke aterdï tɔ kɔt në yɛn, ku riääk kɔc man a guöp.

⁴² Ayek kuɔɔny kɔɔr, ku acïn raan kony keek, ayek Bɛ̈nydït cɔɔl ku acïï cɔ̈tden ee bɛ̈ɛ̈r.

⁴³ Aya ke duöm piny, abïk ciët abuui, yɛn ee cath ë kekɔ̈ɔ̈th cït man de tiɔɔm tɔ̈u kueer

⁴⁴ Yïn cï yɛn kony në kɔckiën cï yɛn rɛɛc, ku muɔ̈k bääny në juöör nïïm, kɔc ë kuöc keek acïk ɛn aa luööi.

⁴⁵ Alɛi yekï kenïïm guöt piny ë yanɔm, ku të cïï kek ya piŋ röl, ayek kë luɛɛl riëëu.

⁴⁶ Acïk guɔ riɔ̈ɔ̈c ku ayek bɛ̈n bei ke ke lɛthë, tëdɛn ë cï kek thiaan.

⁴⁷ Bɛ̈nydït apïïr! Yak gëlgëldï lɛc nɔm! Yak dït de Nhialic ee ya kony luɛɛl!

⁴⁸ Nhialic acï ya tɔ tiam kɔc ke aterdï, acï juöör tääu në yacin

⁴⁹ ku kony ɛn në kɔckiën ke ater. Bɛ̈nydït, Yïn cï a tɔ tiam kɔc ke aterdï, ku kony yɛn në kɔc ee kɔc kuur

⁵⁰ Ka Yïn bä ya lɛc nɔm në juöör yiic, Yïn bä piɔɔny ë diɛt.

⁵¹ Nhialic ee melikde gäm tiëm dït, Ee melikdɛn cï lɔc nyuöth nhiëërdɛn agɔk, gëm Debid ku kuatde ëbɛ̈n aɣet athɛɛr.