2 Tham 21 - JAM DE NHIALIC 2011

Käu de Thaulo Anäk Keek

¹ Ɣɔn ye Debid melik, cɔŋdït acï bɛ̈n tuöl, abïï run kadiäk lɛɛr. Go Debid Bɛ̈nydït lɔ̈ŋ. Go ë Bɛ̈nydït lɔ̈ŋde piŋ, ku puk nɔm en an, “Thaulo kekë dhiënde adekï gup aciɛɛn, në biäk cï kek kɔc ke Gibiɔn nɔ̈k.”

² (Kɔc ke Gibiɔn acïkï ee kɔc ke Yithriɛl, ayek kut ë kɔc ke Amor wään nyiëëŋë piny ke ke pïïr. Ku kɔc ke Yithriɛl aake cï gutguut looi në keek, në luɔi bï kek kɔc ke Gidiɔn gël, ku acï Thaulo them bïï keek nɔ̈k, në biäk kɔɔr en bïï kɔc ke Yithriɛl ku kɔc ke Juda kony.)

³ Na wën ke melik Debid ë cɔl kɔc ke Gibiɔn ku lëk keek an, “Eeŋö kaarkï bä luöi week? Eeŋö bä looi kë bï kërɛɛc cï luöi week kiɛm piny, aguɔkï kɔc ke Bɛ̈nydït thieei?”

⁴ Go kɔc ke Gibiɔn lɛ̈k Debid an, “Agönhda në Thaulo kekë baaide, acïï ateek ku adhääp bï lëu, ku wok cïï kɔc kɔ̈k ke Yithriɛl bï nɔ̈k.” Go ë Debid ke jɔ thiëëc an, “Eeŋö kaarkï bä luöi week?”

⁵ Go kɔc ke Gibiɔn bɛ̈ɛ̈r an, “Acï Thaulo them bï wook nɔ̈k wodhie, ke cïn raan bï döŋ në wo yiic piny de Yithriɛl.

⁶ Ka yïn gämë wook mïth kadhorou, në mïth ke wɛ̈ɛ̈tke yiic, buk keek bɛ̈n nɔ̈k ku nöku gupken nhial ë Bɛ̈nydït nɔm ë Gibia wun de yï Thaulo, melik cï Bɛ̈nydït lɔc.” Go ë melik bɛ̈ɛ̈r an, “Abä keek gäm week.”

⁷ Go melik Mepiboceth wën ë Jɔnathan wën ë Thaulo gël aläl, në biäk cï yen gutguut lɛ̈k Jɔnathan në rin ke Bɛ̈nydït.

⁸ Go Armoni ku Mepiboceth jɔt ku leer keek ë yelɔ̈ɔ̈m, ku nööm wɛ̈ɛ̈t kaarou wään bïï ë Ridhpa nyan de Ayia dhiëth Thaulo, ku nööm wɛ̈ɛ̈t ke Merap nyan ë Thaulo kadhïc, wɛ̈ɛ̈t ke Adriɛl wën ë Bardhilai, raan wun ë Meɣolath.

⁹ Go Debid wɛ̈ɛ̈tkë kadhorou gäm kɔc ke Gibiɔn. Go kɔc ke Gibiɔn keek nɔ̈k ku nökkï keek në tiim kɔ̈ɔ̈th në kuur de Bɛ̈nydït nɔm, acïk bɛ̈n thou ëtök kedhie kadhorou. Aake näk keek në kööl tueŋ gɔlë tëm ë barli.

¹⁰ Na wën ke Ridhpa nyan de Ayia tiiŋ määth ke Thaulo lupɔ de cual looi ke ye kät të wën cïï ë gup ke kɔc tääu thïn në kur nïïm, go jɔ rɛ̈ɛ̈r ëtɛ̈ɛ̈n gɔl ɣɔn tem ë rap agut wään cï deŋ jɔ këër. Aaye diɛt cop aköl ke ke cïï gup ke mïth ke wɛ̈ɛ̈tke bï ŋueet, ku ye gupken gël wakɔ̈u aya në luɔi cïï läi ke bï cuet.

¹¹ Na wën aa lɔ Debid kë cïï Ridhpa nyan de Ayia, tiiŋ mɔ̈th de Thaulo looi piŋ,

¹² go Debid yom ke Thaulo ku Jɔnathan lɔ bɛ̈ɛ̈i tëde kɔc ke Jabec në Giliyad. (Aake cï gupken lɔ kual në pëër de wutic, të wään cïï Pilithiin Thaulo ku Jɔnathan nöök ë pëër de Beth Canic, wään bïï kek ke nɔ̈k në kuur ë Gilbowa nɔm.)

¹³ Go Debid yom ke Thaulo kekë Jɔnathan nööm, ku bïï yom ke kɔc kadhorou wään cï nöök aya.

¹⁴ Go kɔc yom ke Thaulo kekë Jɔnathan tɔ̈ɔ̈u në Dhela piny de dhiën ë Benjamin në raŋ de Kicic wun Thaulo, gokï jam cïï melik lɛ̈k keek jɔ looi ëbɛ̈n. Na wën ke Nhialic ë jɔ lɔ̈ŋ gam në biäk de paanden.

Tɔŋ ë Kɔcdït ke Pilithiin

¹⁵ Ku tɔŋ däŋ acï rɔt bɛ nyɔk në kaam de Pilithiin kekë Yithriɛl, go Debid lɔ biic kekë remdɛn ë tɔŋ lek piɔ̈t në kɔc ke Pilithiin. Na ɣɔn ë tɔŋ tökic, ke Debid ë jɔ dak.

¹⁶ Ago Yicibibenop, wën töŋ de Rapa, amuk tɔŋ de maläŋ ye thiɛkde kilɔɔ kadiäk, ku amuk abätäu cï piac thɔ̈ɔ̈th, aaye lueel an bïï Debid yiɛ̈n nɔ̈k.

¹⁷ Go Abicai wën ë Dheruia Debid kony ku nɛ̈k raan de Pilithiin. Na wën ke kɔc ke Debid ë ke kuëëŋ ë yenɔm nɔn cïï yen bï bɛ lɔ tɔŋ ke keek ë kööl däŋ, luelkï an, “Yïn ee aŋäth de Yithriɛl, ku wok cïn piɔ̈ɔ̈th luɔi bïï ë yïn nɔ̈k.”

¹⁸ Na ɣɔn ee kakë cök, go tɔŋ thɔ̈ɔ̈r në kɔc ke Pilithiin në Gop, në ee tɔŋë yic, go Thibekai raan wun ë Ɣuca raan ë Pilithiin cɔl Thap nɔ̈k.

¹⁹ Na ɣɔn akööl kɔ̈k ke tɔŋ däŋ ë be thɔ̈ɔ̈r në kɔc ke Pilithiin në Gop, go Elanan wën ë Jayir në Betheleɣem Goliath nɔ̈k raan wun ë Gath, ku aade nɔm tɔŋ dït kɔ̈u cït cum.

²⁰ Ku aade tɔŋ däŋ ë Gath, tëde raandït kɔ̈u nhiaar tɔŋ. Ade riöp kadhetem në ciin tökic, ku riöp kadhetem në cöök tökic, ayek riöp kathiërrou ku ŋuan kedhie.

²¹ Na wën ke kɔɔr bïï kɔc ke Yithriɛl riääc, go Jɔnathan wën ë Cama, mänhë ë Debid ye nɔ̈k.

²² Keek kaŋuan aake ye kuat de Rapa wun ë Gath, ku acï Debid ke bɛ̈n nɔ̈k kekë kɔcke.