2 Tham 16 - JAM DE NHIALIC 2011

Debid kekë Dhiba

¹ Na wën aacï Debid kuur de Olip duɛ̈ɛ̈r waan nɔm, go yök kekë Dhiba lïm de Mepiboceth, ku Dhiba aa cath ke mul juëc ɣɛ̈ɛ̈c bot kaarou de kuïn cï pam, ku bɔt de enap cï riɛl, ku bɔt de mïth ke tiim amäi ë piac luɔk, ku athep thiäŋ ke mɔ̈u.

² Go melik Debid ye luɔp an, “Ee käŋö bä lɔ looi ee kake kedhie?” Go Dhiba puɔ̈k nɔm yen an, “Mulkë abïï kɔc ke paandu cath ë keek kɔ̈ɔ̈th. Ku kuïn cï pamë kekë mïth ke tiim amäi abïï lïïmku keek cam. Ku mɔ̈u ë këde kɔc kedhie, bïk dek të cïï raan dak në jɔ̈ɔ̈ric.”

³ Go melik keek thiëëc an, “Nu Mepiboceth tënou, wën de wën ë bɛ̈nydu Thaulo?” Go Dhiba puɔ̈k nɔm en an, “Mepiboceth arɛ̈ɛ̈r në Jeruthalem, ku aye lueel an köölë baai de Yithriɛl abï ciɛɛŋ de wää pɔ̈k nɔm ɛn!”

⁴ Na wën ke melik ë yöök Dhiba an, “Këriëëc de Mepiboceth ëbɛ̈n acä keek gäm yïn ënɔɔnë!” Go Dhiba lueel an, “Yɛn ee lïmdu ku yïn bä aa luööi ë cieŋ në kë bï rɔ̈ŋ ë yïpiɔ̈u!”

Debid kekë Cimei

⁵ Na wën aa lɔ melik Debid ɣet Baɣurim, go Cimei wën ë Gera bɛ̈n bei wutic, ke lɛ̈ɛ̈t Debid ku ye läm aciɛɛn, ee raan töŋ de kɔc ke baai ë yï Thaulo.

⁶ Go Cimei Debid jɔ biɔ̈ɔ̈k ë kur kekë bänyke, cakaa wään cï ë Debid gɛɛu cil ë kɔcke kekë kɔc ee ye tiit.

⁷ Go Cimei Debid lam an, “Jäl! Jäl! Raan ee kɔc nɔ̈k! Raan nhiany!

⁸ Yïn cïï ciɛɛŋ de Thaulo nööm, ku ënɔɔnë Bɛ̈nydït alui yïn këtuc, në biäk cï yïn kɔc juëc ke dhiën ë Thaulo nɔ̈k. Bɛ̈nydï acï ciɛɛŋ gäm wëndu Abthalom! Yïn cï riääk! Yïn nɛ̈k!”

⁹ Ago Abicai wën ë tiiŋ cɔl Dheruia lɛ̈k melik an, “Melik, eeŋö jɔ ee jööŋë tɔ cien yïn? Tɔ ya lɔ të nu yen, bä lɔ nɔ̈k ku tɛɛm nɔm wei!”

¹⁰ Go ë melik puɔ̈k nɔm Abicai kekë mänhë Jowap an, “Acïn këdun yic thïn në yen, wɛ̈ɛ̈t ke Dheruia. Na cieen ɛn në biäk cïï Bɛ̈nydït ye yɔ̈ɔ̈k, eeŋa duëër yen thiëëc?”

¹¹ Ago Debid lɛ̈k Abicai kekë bänyke kedhie an, “Mɛnhdï akɔɔr bïï yɛn nɔ̈k! Ku eeŋö ee week tɔ gäi ë kë looi raan wun ë Benjamin? Acï Bɛ̈nydït lɛ̈k en bï a lam! Pälkï, ë lam ɛn ëtɛ̈ɛ̈n.

¹² Tɛk däŋ bï Bɛ̈nydït piɔ̈u kok kekë yɛn, ku gëm ɛn këpiɛth në biäk cïï Cimei yɛn cieen!”

¹³ Na wën, ke Debid kekë kɔcke ë ke lɔ në kueeric. Go Cimei keek kuany cök në kuur thar piny. Ago lɔ ke cien Debid ku biöök ë kur ku ye tɔɔr ë pɔk ë kegup.

¹⁴ Na wën aacï melik ɣet kekë kɔcke kedhie në wɛ̈ɛ̈r de Jordan lɔ̈ɔ̈m, acïk jɔ dak kedhie, gokï lɔ̈ŋ ëtɛ̈ɛ̈n.

Abthalom ë Jeruthalem

¹⁵ Go Abthalom kekë kɔc ke Yithriɛl kedhie bɛ̈n Jeruthalem, ku Aɣithopel aa cath ke keek.

¹⁶ Na wën lee Ɣucai raan de Arkit mɛ̈thë Debid rɔ̈m kekë Abthalom, go cööt an, “Melik, yïn bï pïïr athɛɛr! Melik, yïn bï pïïr athɛɛr!”

¹⁷ Ago Abthalom en thiëc an, “Eeŋö cï rɔt luöi määthdun wekë Debid? Ku eeŋö kën yïn jäl wekë yen?”

¹⁸ Go Ɣucai bɛ̈ɛ̈r an, “Eeŋö duɛ̈ɛ̈r yɛn tɔ lɔ? Yɛn bï tɔ̈u wo raan cï Bɛ̈nydït lɔc, në kueer ee kɔckë, ku në kɔc ke Yithriɛl ëbɛ̈n. Yɛn bï rëër wo yïn.

¹⁹ Eeŋa duɛ̈ɛ̈r luööi, cie wën de bɛ̈nydï? Cït man wään cän wuur luööi, yen abän yï luööi aya.”

²⁰ Go Abthalom rɔt puɔ̈k Aɣithopel ku lueel an, “Wok nu eenë ënɔɔnë, lɛ̈kë wook kë buk looi?”

²¹ Go Aɣithopel bɛ̈ɛ̈r an, “Lɔ tɔ̈c wekë diäär määth ë wuur, diëër wään bïï nyääŋ piny, bïk ɣön ë bääny lɔ̈ɔ̈k tiit thok apiɛth. Abïï kɔc ke Yithriɛl jɔ ŋic ëbɛ̈n nɔn cä wek dɛ ater wekë wuur, ago kɔc kuany yïcök piɔ̈ɔ̈th riɛl.”

²² Gokï paany luöi Abthalom ë ɣön ë bääny nɔm, go Abthalom aa lɔ tɔ̈c ɣöt kekë diäär määth ë wun, ke woi kɔc ëbɛ̈n.

²³ Ku wɛ̈t cï Aɣithopel lueel në aköölkë yiic, aaye gam cï wɛ̈t bɔ̈ tëde Nhialic guöpde. Ku aake ye Debid kekë Abthalom ke gam.