2 Tham 13 - JAM DE NHIALIC 2011

Amnon kekë Tamar

¹ Debid ade nɔm wëndɛn cɔl Abthalom ku wën däŋ cɔl Amnon. Abthalom ade nɔm nyankënë läk kënë thiaak cɔl Tamar, ku yen anhiɛɛr Amnon.

² Ku Amnon aa nhiaar Tamar aläl arëk abï rɔt cäk an de guöp juäi, në baŋ yen e yök ke rilic në luɔi duëër en Tamar nööm, ku në baŋ yen nyan kën kɔn yök kekë moc aa ye tɔ mɛ̈ɛ̈c kekë röör.

³ Ku Amnon ade nɔm wën mɛ̈ɛ̈th kek pel nɔm cɔl Jonadap, wën ë Cama mänhë ë Debid.

⁴ Go Jonadap lɛ̈k Amnon an, “Yïn ee wën ë melik, eeŋö yan yïn tïŋ ke yï diu piɔ̈u aköölnyïïn kedhie? Lɛ̈kë yɛn eeŋö cï riääk?” Go Amnon lɛ̈k en an, “Yɛn nhiaar Tamar, nyankënë ee wën wäär cɔl Abthalom.”

⁵ Go Jonadap lɛ̈k Amnon an, “Loi rɔt cï kë de guöp juäi ku lɔ tɔ̈c në agen nɔm. Të lee wuur yï bɛ̈n tïŋ, ke lɛ̈kë yen an, ‘Tɔ nyankäi Tama bɔ̈ bï ya bɛ̈n cääm. Akaar bï kuïn bɛ̈n aa looi ee tënë të bän yen aa woi, ku ëtɛ̈ɛ̈n abï yɛn jɔ aa gäm këcam guöpde.’”

⁶ Go Amnon rɔt looi cï kë de guöp juäi ku lee tɔ̈c në agen nɔm. Na wën ke melik Debid ë lɔ lee tïŋ, go Amnon lɛ̈k en an, “Tɔ nyankäi Tamar bɔ̈ të täu yɛn, bïï ya bɛ̈n luöi kaak liiakäŋ, ke la ke woi keek, ku abï yɛn jɔ gäm këcam guöpde.”

⁷ Ago Debid thok tuöc Tamar baai an, “Lɔɔ tëde wänmuuth Amnon ɣönde bä lɔ luöi këcam.”

⁸ Go Tamar bɛ̈n ku lee ɣön ë mänhë, ku yök ke cï tɔ̈c agen nɔm. Ago Tamar aɣaar nööm ku nuɛɛi, ku looi kuïn cï pam apiɛth ke woi Amnon. Ku jɔ kuïn cï pam nyop

⁹ na wën ke tɛ̈ɛ̈u keek aduökic ku gëm en, go jaai ë cäm. Ago Amnon lɛ̈k lïïmke an, “Week wedhie nyääŋkï ya piny yatök.” Agokï nyääŋ piny yetök.

¹⁰ Go Amnon lɛ̈k Tamar an, “Bɛ̈ɛ̈iyë këcam eenë në agendï lɔ̈ɔ̈m, ku tɔ ya cäm në yïn.” Go Tamar kuïn cï pam nööm ku yïn Amnon në agende lɔ̈ɔ̈m.

¹¹ Na wën jɔ yen këcam gäm yen, go dɔm ciin ku yöök an, “Nyankäi, bäär tɔ̈c we yɛn!”

¹² Go Tamar lɛ̈k en an, “Acie yen wänmääth! Du yɛn dɔm në riɛl! Acïï rɔt de kɔn looi ee tënë paan ë Yithriɛl! Du kë de yic ayäär looi!

¹³ Yɛn cïï ayär cït ee kënë bï lëu! Ku yïn bï ciët dhän cïn gup ayäär në Yithriɛl! Yïn läŋ jamë wekë melik, ku abï yïn tɔ thiak ɛn.”

¹⁴ Go Amnon jaai ku cïï jamde piŋ. Ku në luɔi ril yen awär en në riɛl, go dam piny në riɛl ku wïït.

¹⁵ Ku ëtɛ̈ɛ̈n go Amnon Tamar ja guɔ maan guöp arëët awär nhiëër wään nhiɛɛr en en. Go lɛ̈k en an, “Jɔt rɔt ku jël!”

¹⁶ Go Tamar lɛ̈k en an, “Ei, com cop yïn yɛn aya ee gök de awäny wär ee kërɛɛc cï luöi yɛn!” Ku Amnon akën jam de Tamar bɛ̈n piŋ,

¹⁷ Na wën ke cɔl lïmde cɔɔl ku yɔ̈ɔ̈k an, “Lɛɛrë ë tiiŋë biic ee tënë, ku thiök ɣöt thok.”

¹⁸ Go lïmde Tamar thɛ̈l biic ɣööt ku thiöök thok. Ku Tamar aa cieŋ lupɔɔ bär në biäk ee yen nyan dhueny de melik, lupɔɔ ye cieŋ ë duet dhueec ke melik në aa köölkë.

¹⁹ Go Tamar ŋeth wäl ë yenɔm ku ret lupɔde yic, ku kum yenyin në yecin, ku jiël ke cök e nɔm wei, ke dhiau ë röl dït.

²⁰ Na wën cï Abthalom, mänhë Tamar tïŋ ke lëk en an, “Cï Amnon, Wänmuuth, yïn dɔm në riɛl ku wïït yïn? Ënɔɔnë, mim thok nyankäi. Yen ee wën wuur. Du ee kënë tɔ riäk yïpiɔ̈u arëët!” Go Tamar rëër paan ë mänhë Abthalom ke diu piɔ̈u ku ye rëër yetök.

²¹ Na wën aa lɔ melik Debid kë cï rɔt looi piŋ, go gɔ̈th aläl.

²² Ku Abthalom acï Amnon bɛ̈n maan guöp arëët në baŋ cïï yen Tamar nyankënë wiëët, arëk abïï jam puɔ̈l kekë yen.

Abthalom Aguur Nyankënë

²³ Na ɣɔn aacï run kaarou tëëk Abthalom aa de nɔm kɔc ë bɔ̈ në Baal Ɣadhor, thiääk ke Eparaim, bïk nhïm ke amɛ̈lke bɛ̈n tɛm. Go Abthalom wɛ̈ɛ̈t ke melik cɔɔl aya bïk bɛ̈n.

²⁴ Ago Abthalom lɔ tëde melik ku lëk en an, “Bɛ̈ny, yɛn de nɔm kɔc bɔ̈ bïk nhïm ke amɛ̈lkï bɛ̈n tɛm, yïn läŋ bä bɛ̈n ëtök wekë bänyku, ku bäkkï bɛ̈n në dhuëëŋic?”

²⁵ Go melik puɔ̈k nɔm Abthalom an, “Ei, mɛnhdï, wok cïï duëër lɔ wodhie, në biäk bïï yïn nuan.” Na wën cak Abthalom en lɔ̈ŋ, akën bɛ̈n gam, go Abthalom yɔ̈ɔ̈k bïï jäl.

²⁶ Ago Abthalom lueel an, “Na cäkï kɔɔr bäk bɛ̈n, ke yï tɔ wänmääth Amnon lɔ ke wook?” Go melik Debid lop an, “Eeŋö ee yen lɔ ke week?”

²⁷ Go Abthalom Debid lɔ̈ŋ ë caŋwën, aɣët abïï Amnon puɔ̈l ke lɔ ku tɔ wɛ̈ɛ̈t ke meliik kedhie lɔ në Abthalom ëtök. Go Abthalom gökdïït de dhuëëŋ looi, dhuëëŋ cït këde melik.

²⁸ Na wën ke Abthalom ë yɔ̈ɔ̈k lïïmke an, “Woikï Amnon na cï miɔ̈l ë mɔ̈u, abä lɛ̈k week luɔi bä wek Ammon nɔ̈k. Duökï riɔ̈c. Ee yɛn ë luel en guöpdï. Riɛtkï röt ku duökï piɔ̈ɔ̈th cɔ̈m!”

²⁹ Go lïïm jam de Abthalom gam, agokï Amnon nɔ̈k cït. Go wɛ̈ɛ̈t kɔ̈k ke Debid kɛɛc ë mulken kɔ̈ɔ̈th ku kɔtkï kedhie.

³⁰ Ku të wën ŋoot kek kueer ke ke lɔ baai, Debid acï guɔ yiɛ̈n thok an, “Abthalom acï wɛ̈ɛ̈t ke melik nɔ̈k kedhie, acïn raan töŋ cï döŋ ke pïïr!”

³¹ Go melik Debid lupɔɔke rɛtic ku tɔ̈ɔ̈c piny në abuui yic ke cï piɔ̈u jiɛth. Ago lïïmkɛn ë kääc ë yelɔ̈ɔ̈m kedhie lupɔɔken rɛt yiic aya.

³² Na wën ke lueel Jonadap wën ee Cama mänhë Debid an, “Bɛ̈ny, akënkï wɛ̈ɛ̈tku nɔ̈k kedhie. Ee Amnon yen cï thou yetök! Ku kënë acïï Abthalom dap takic luɔi bïï yen ee kënë looi në baŋ cïï Amnon Tamar nyankënë dɔm në riɛl ku wïït.

³³ Ka yïn du thoŋ ë ye lueel nɔn cïï ë wɛ̈ɛ̈tku nɔ̈k kedhie gam, ee Amnon yen cï thou yetök.”

³⁴ Ku ëtɛ̈ɛ̈n Abthalom acï kat ke cökë e nɔm wei. Na wën ke tïn tit wut ë tïŋ kɔc juëc ke ke bɔ̈ ë biäk ciëën në kuur kɔ̈u në kueer de Ɣoronaimic. Go kë cï tïŋ lɛ̈k melik.

³⁵ Ago Jonadap lɛ̈k melik Debid an, “Tïŋ wɛ̈ɛ̈tku ka bɔ̈yë, cït man cän e lueel.”

³⁶ Na wën cï kënë lueel, ke wɛ̈ɛ̈t ke Debid ë ke jɔ guɔ ɣëët, agokï dhiëëu gɔl, go Debid kekë bänyke kedhie dhiau arëët aya.

^37-38 Go Abthalom kat ke lɔ tëde Talmai wën de Amiɣud, melik de Gecur, ku lee rëër ëtɛ̈ɛ̈n në run kadiäk. Go Debid wënde dhiëëu aköölnyïïn kedhie

³⁹ Na ɣɔn aacï nïn ke thon de Amnon wan tëde melik Debid, ke jɔ wënde Abthalom tak aläl.