2 Tham 12 - JAM DE NHIALIC 2011

Jam de Nathan ku Puŋëpiɔ̈u ë Debid

¹ Go Bɛ̈nydït Nathan tuöc Debid. Na wën aa lee bɛ̈n tëde yen, go lueel an, “Ade kɔc kaarou ë rɛ̈ɛ̈r ee wuntöŋë, raan tök akueth, ku raan däŋë akuany nyin.

² Ku raan kuethë ade nɔm thök amɛ̈l ku bɔɔth ku ɣɔ̈k.

³ Ku raan kuanynyin acïn nɔm käŋ ee ŋun töŋ de amääl ë ɣɔɔc yetök. Go muk, ku jɔ dït baaide kekë mïthke. Ku aa ye cääm në biäk de këcamde, ku tɔ dëk në abïnyde ku ye boom në yeɣäm. Amääl aa cït nyande tëde yen.

⁴ Na ɣɔn ë kööl tök ke kaman ë bɔ̈ tëde raan kueth, go raan kueth jaai në baŋ bïï yen rɔt miɔɔc në thökke yiic ku ɣɔ̈kke yiic bïï yen kaman luöi këcam, go amäl ë raan kuanynyin nööm ku lui yen këcam kamande.”

⁵ Go Debid göth ke raan kueth ku lëk Nathan an, “Yɛn cï kuëëŋ në rin ke Bɛ̈nydït pïïr, raan ë loi ee kënë arɔ̈ŋ ke thuɔɔu!

⁶ Në baŋ cï yen kërɛɛc cï ee kënë looi, ku abï amääl cool raan ŋuan, në kë cï looi?”

⁷ Na wën ke lëk ë Nathan Debid an, “Ee yïn guöp yïn ee raanë! Ku kë lueel ë Bɛ̈nydït Nhialiny de Yithriɛl kï an, ‘Yïn cä lɔc ke yï ye melik de Yithriɛl, ku ta yïn tɔ poth në Thaulo ciin.

⁸ Yɛn ë ɣön ë bɛ̈nydu gäm yïn, ku diäär ke bɛ̈nydu acä keek tääu ë yïciin. Ku yïn cä gäm baai de Yithriɛl ku Juda. Na lik ee kakë tëde yïn, ke yïn duɛ̈ɛ̈r gäm kajuëc kɔ̈k.

⁹ Eeŋö ee yïn jam de Bɛ̈nydït biɔɔn, abä kërac looi ë yenyin? Yïn cï Yuria raan ë Ɣit nɔ̈k në abätäu, ku nöm tiiŋde bïï aa këdu, ku acï tɔ lɔ näk në abätäu de kɔc ke Ammon!

¹⁰ Ënɔɔnë abätäu acï bï jäl baaidu, në biäk cï yïn ya biɔɔn guöp, në rɛm yiic ëbɛ̈n abï dɛ raan ë käudu bï aa thou në thon akuöörkuöör, në biäk kën yïn Yɛn riëëu, ku nöm tiiŋ de Yuria.

¹¹ Yɛn cï kuëëŋ, Yïn bä yiɛ̈n raan de dhiëndu bï yïn tɔ nuan. Abä tïŋ kööl bän diäärku jɔt ku gäm keek raandäŋ raan wek. Abï diäärku nööm aköl ke yï daai thïn, ku abïï ŋic ë raan ëbɛ̈n.

¹² Yïn cï kërac looi kemony, ku Yɛn bï ee kënë looi aköl ke bïï kɔc ke Yithriɛl tïŋ kedhie.”’

¹³ Go Debid lɛ̈k Nathan an, “Yɛn cï awäc luööi Bɛ̈nydït.” Go Nathan puɔ̈k nɔm Debid an, “Bɛ̈nydït acï yïn päl awɛ̈ɛ̈cku. Ka yïn cïï bï thou.

¹⁴ Ku në biäk kën yïn Bɛ̈nydït riëëu ku loi ee kënë, mɛnhdu abï thou.”

¹⁵ Na wën ke Nathan lɔ baai. Go Bɛ̈nydït mɛnh ë Debid në Bathceba tiiŋ de Yuria tɔ dɔm juäi.

Thon de wën ë Debid

¹⁶ Go Debid Nhialic lɔ̈ŋ në biäk bïï meth guöp pial. Ago Debid këcam ayï pïïu rɛɛc. Ee cool ë lɔ ɣönde wakɔ̈u, ku ye niin piny në abuui yic, abï piny ruu.

¹⁷ Ago röördït tɔ̈u ë dhiënde nɔm bɛ̈n tëde yen, ku themkï bïk jat nhial piny, go jaai ke cïï rɔt jɔt, ku cïï këcam cam ke keek aya.

¹⁸ Na ɣɔn në nïn kadhorou cök, ke meth ë thou. Go lïïm ke Debid riɔ̈ɔ̈c në luɛl bï kek yen lueel an meth acï thou. Gokï lueel an, “Tiëŋkï, acuk them buk jam në Debid ke meth ŋoot ke pïïr, go jaai ku cïï wook piŋ thook. Duëërku jɔ lɛ̈k en adï an meth acï thou? Tɛk däŋ de kërɛɛc bïï luöi rɔt!”

¹⁹ Na wën ke Debid tïŋ lïïmke ajamkï ë ŋääi go guɔ ŋic nɔn cïï meth aake cï thou. Ago keek thiëëc an, “Cï meth thou?” Gokï puɔ̈k nɔm en an, “Ɣɛɛ, acï thou.”

²⁰ Na wën ke Debid ë jɔt rɔt piny, ku lee waak ku tɔc rɔt ë miök, ku wɛɛr lupɔɔke. Ku lee Luaŋdït lee lɔ̈ŋ. Na wën aacï thök, ke lɔ baai ku thiëëc këcam. Ago lïïmke ye gäm këcam, ku jɔ cam.

²¹ Ago Debid yɔ̈ɔ̈k ë bänyke an, “Eeŋö looi yïn ee kënë? Ɣɔn pïïr ë meth, acï dhiëëu, ku cïï cäm, ku wën cï meth thou, ke yï jɔt rɔt ku cam këcam!”

²² Go Debid bɛ̈ɛ̈r an, “Ɣɔn ŋoot ë meth ke pïïr. Yɛn aacï këcam rɛɛc ku cä cäm, ku dhiaau. Aa ya tak, an eeŋa ŋic yen, nɔn duëër Bɛ̈nydït piɔ̈u kok kekë yɛn ku tɔ meth pïïr.

²³ Ku ënɔɔnë meth ka cï thouwë, eeŋö duëër yɛn tɔ reec këcam? Duëër lëu bä bɛ dɔ̈k nɔm ciëën ku be pïïr? Ku rial wadäŋ ee yɛn abï lɔ të tɔ̈u en thïn, ku yen acïï bï bɛ bɛ̈n të täu ɛn thïn.”

Dhiënh de Tholomon

²⁴ Na wën ke Debid ë jiëëm Bathceba tiiŋde bïï yepiɔ̈u muk. Go lɔ ɣöt kekë yen. Ago bɛ liac ku yök mɛnh däŋ, go Debid cäk an Tholomon. Ku Bɛ̈nydït anhiaar Tholomon

²⁵ go Bɛ̈nydït jam tuöc tiët Nathan bïï meth cäk an Jedidia (kë nhiëër ë Bɛ̈nydït në thoŋda), në biäk nhiɛɛr ë Bɛ̈nydït en.

Debid Apec Raba

²⁶ Go Jowap ŋoot ke lui tɔŋ Raba de kɔc ke Ammon, ku aacï thiök në luɔi bïï en en dɔm.

²⁷ Go Jowap tuc tɔ lɔ tëde Debid ku lek yen an, Yɛn cï tɔŋ luöi Raba ka yɛn cï tëde deŋ pïïu dɔm.

²⁸ Ënɔɔnë jɔ remduön de tɔŋ däŋë määtic ku dum wut në yïn, acä kɔɔr bïï cɔ̈l ɛn në baŋ cän e peec.”

²⁹ Go Debid remdɛn ë tɔŋ määtic ëbɛ̈n ku lee Raba mak ku peec wut.

³⁰ Na wën ke Debid ë nöm göl në Molek nɔm yanh de melik de Ammon, ku ade yic guɛɛl piɛth de adhääp, go Debid guɛɛl piɛth nööm ku tɛ̈ɛ̈uke ë gölde yic, ku acï kajuëc peec aya wutic

³¹ ku ye kɔc ke wut tɔ ɣɛ̈ɛ̈r tiim yiic, ku yek pur looi, ku loikï yiëp ke wëëth, ku tɔ keek loi thop. Ku lui ee kënë kɔc ke wuöt kɔ̈k ke Ammon kedhie. Na wën ke Debid ë jɔ rɔ dak Jeruthalem kekë remdɛn ë tɔŋ ëbɛ̈n.