2 Tham 11 - JAM DE NHIALIC 2011

Debid kekë Bathceba

¹ Na ɣɔn yaak, të ye melik tɔŋ dap lɔ thɔ̈ɔ̈r, go Debid Jowap tuɔɔc biic kekë rem de tɔŋ ë Yithriɛl, gokï kɔc ke Ammon lɔ tiaam, ku geeukï Raba cil. Ku dɔ̈ŋ Debid ke rɛ̈ɛ̈r në Jeruthalem.

² Na ɣɔn thëën ë kööl tök ke Debid ë jɔt rɔt ë biökke yiic ku jɔ cath ke wil ɣönde nɔm nhial. Ku të wën ŋoot en në ɣöt nɔm, ke tïŋ tik ke waak paande. Ku tik aa läk aläl.

³ Go Debid raan tooc bï tik lɔ tïŋ, go raan bɛ̈n lɛ̈k en an, ee Bathceba nyan ë Eliam ku ye tiiŋ de Yuria raan ë kɔc ke Ɣit.”

⁴ Na wën ke Debid ë tooc tuc bïk tik lɔ bɛ̈ɛ̈i, gokï tik yiɛ̈n en, ku le ɣöt kekë yen. (Ku tik aa piac rɔt waak në baŋ cïï akööl ke thɛ̈k thök). Na wën ke jɔ yenɔm puɔ̈k paande.

⁵ Go tik meth yök ku jɔ thön tɔ lëkkë Debid luɔi cï yen liac.

⁶ Ago Debid thön tɔ lëkkë Jowap an, “Tuöcë yɛn Yuria raan ë Ɣit.” Go Jowap e tuöc Debid

⁷ Na wën aa lɔ Yuria bɛ̈n tëde yen, go Debid thiëëc në täu de Jowap, ku täu de rem ë tɔŋ ku cäth ciɛth tɔŋ.

⁸ Na wën ke Debid ë yɔ̈ɔ̈k Yuria an, “Lɔɔ paandu bä lɔ lɔ̈ŋ.” Go Yuria jäl, go melik miɔ̈c tuɔɔc baai ë yecök.

⁹ Ku Yuria akën bɛ̈n lɔ paande, acï lɔ ku lee tɔ̈c në ɣön ë melik thok kekë kɔc ee melik tiit.

¹⁰ Na wën aacï Debid lɛ̈k nɔn kën ë Yuria lɔ paande, go luɔp an, “Yïn aa piac bɛ̈n tëmec, eeŋö cïï yïn lɔ paandu?”

¹¹ Go Yuria lɛ̈k Debid an, “Röör ke Yithriɛl, ku Juda anukï ë tɔŋic, ku Athänduŋ de Bɛ̈nydït atɔ̈u ke keek, ku bɛ̈nydï Jowap kekë bänykï arëërkï ë jɔ̈ɔ̈ric. Eeŋö duɛ̈ɛ̈r ɛn lɔ ɣöndï la cam ku dɛ̈k ku tääc ɣööt wokë tiiŋdï? Yɛn cï kuëëŋ në pïïrdï yic, yɛn cïï kë cït ee kënë bï looi!”

¹² Go Debid lɛ̈k Yuria an, “Rɛ̈ɛ̈rë eenë ee köölë, ku miäk yïn bä tɔ puk yïnɔm ciëën.” Go Yuria rëër ë Jeruthalem ee köölë ku lɔ kööl däŋë.

¹³ Go Debid ye cɔ̈l cäm ku dëkkï ëtök abï miɔ̈l. Na ɣɔn thëën ke Yuria jël lee tɔ̈c piny ë biöökic, kekë kɔc ee melik tiit ku akën lɔ paande.

¹⁴ Na ɣɔn amiäk, ke Debid ë gɛ̈ɛ̈r awerek Jowap ku gëm Yuria bï lɔ gam.

¹⁵ Ku kë cï gɔ̈ɔ̈r thïn kï: “Tääuwë Yuria ë tuuŋ dïït ë tɔŋ arëët, ku nyääŋë tɔŋic ke bï lɔ̈ɔ̈k nɔ̈k.”

¹⁶ Ku Jowap aacï pänydït tuɔɔk, go Yuria tääu të wën ŋic ke de kɔc ke ater ril.

¹⁷ Na wën aa lɔ kɔc ke pänydït bɛ̈n bei, gokï tɔŋ luöi rem de tɔŋ ë Jowap, go kɔc kɔ̈k në rem de tɔŋ ë Debid nɔ̈k, ayï Yuria acï nɔ̈k aya.

¹⁸ Na wën ke Jowap ë tuc Debid ka cï röt looi ë tɔŋ yic.

¹⁹ Acï tuc jääm an, “Të cä wek melik lɛ̈k kë cï tuöl tɔŋ,

²⁰ Tɛk däŋ bï melik göth, ku thiëëc week an, ‘Eeŋö aa wek tɔŋ looi ke we thiääk ë pänydït? Kuöckï nɔn duëër kek week mɔ̈ɔ̈c ë dhɛ̈ŋ ë päny kɔ̈u?

²¹ Eeŋa ë näk Abimelek wën ë Gidiɔn? Cie tik yen ë cuɛt kuur ë guär ë yenɔm nhial ë päny de pänydït kɔ̈u. Go lɔ thou në Thebedh? Eeŋö aa wek röt thiääk ë päny de wut kɔ̈u? Na cï melik we thiëëc aya, ke lɛ̈kkï yen an, ‘Lïmduön Yuria acï nɔ̈k aya.”’

²² Go tuc lɔ tënu Debid, ku lëkkï ka cï Jowap thɔ̈n keek bïk lueel.

²³ Go tuc lɛ̈k Debid an, “Kɔc ke aterda arilkï awär wook, gokï bɛ̈n bei ë pänydïtic të lääu, ku acuk keek bɛ̈n puɔ̈k nïïm ciëën në kal de wut thok.

²⁴ Na wën ke kɔc ë ke muuc wook ë dhɛ̈ŋ në päny kɔ̈u, ku kɔc kɔ̈k ke melik acïk thou, ayï lïmduön Yuria acï nɔ̈k aya.”

²⁵ Go Debid lɛ̈k tuc an, “lɛ̈kë ee kënë Jowap, du ee kënë tɔ jeth yïpiɔ̈u abätäu ee raan nɔ̈k ke thöŋ ëbɛ̈n. Makkï wut ku damkï ku jakï keek riɔ̈ɔ̈k, lɛ̈kë ee kënë Jowap ago ye muk piɔ̈u.”

²⁶ Na wën aa piŋ tiiŋ de Yuria, nɔn cï monyde thou, go monyde dhiëëu.

²⁷ Na ɣɔn aacï tëde dhiëëu nɔm wan, go Debid tik tɔ lee bɛ̈ɛ̈i paande, ku jɔ tɔ ye tiiŋde. Go ye dhiëth wënde. Ku Bɛ̈nydït acï piɔ̈u bɛ̈n diu në kë cïï Debid looi.