2 Tham 10 - JAM DE NHIALIC 2011

Debid Atiam Kɔc ke Ammon ku Kɔc ke Thiriya

¹ Na ɣɔn aacï Naɣac melik de kɔc ke Ammon thou, go Ɣanun wënde lɔ në nyinde yic ke ye melik.

² Go melik Debid lueel an, “Naɣac aa riëëu ɛn arëët, ka yɛn bï wëndɛn Ɣanun dhil riëëu aya.” Go Debid tuucke tɔ lɔ bïk Ɣanun lɔ duut piɔ̈u në biäk de thon ë wun. Na wën cï bäny ke rem ë tɔŋ ë Debid lɔ piny de kɔc ke Ammon,

³ go bäny ke kɔc Ammon lɛ̈k Ɣanun melikden an, “Ye tak nɔn kɔɔr ë Debid bï wuur dhuëëŋ guöp në biäk cïï yen kɔc tuööc bïk yïn bɛ̈n duut piɔ̈u? Acie yen! Aa tuuc ë Debid keek në biäk bï kek wundu bɛ̈n gɔɔk apiɛth ku bïk dɔm!”

⁴ Ago Ɣanun bäny ke rem ë tɔŋ ë Debid mac ku tɔ keek muut thook ë biäk, ku tem lupɔɔken abïk ciɛk ku pëk ë keɣɔ̈ɔ̈m, ku jɔ keek tɔ jäl.

⁵ Na wën aa lɔ kɔc ye lɛ̈k Debid, go tuc tɔ lɔ tëde bänykɛn ke rem ë tɔŋ në biäk cï kek gup yäär arëët. Go melik Debid ke yɔ̈ɔ̈k, bïk rɛ̈ɛ̈r në Jeriko agut të bïï kek thook kɔn cil, ku bïk jɔ bɛ̈n.

⁶ Go kɔc ke Ammon ŋic nɔn cïï kek Debid tɔ ye raan de aterden, agokï aguum kathiërrou de rem ë tɔŋ ë Thiriya tɔ̈u ë Bethreɣop riɔp, ku aguum kathiëër ku rou në Tɔp, ku lɔ melik de Maaka kekë agum töŋ de kɔc.

⁷ Na wën aa lɔ Debid ee kënë piŋ, go Jowap tuɔɔc kekë rem de tɔŋ ëbɛ̈n.

⁸ Go kɔc ke Ammon bɛ̈n biic ku guiirkï tɔŋ në Raba thok, ku jɔ kɔc ke Thiriya kekë kɔc ke Tɔp ku Maaka röt lɔ guiir ë wut këc biic.

⁹ Na wën ke tïŋ ë Jowap nɔn bïï kɔc ke ater ye mak ë biäk tueŋ ku yekɔ̈u ciëën, ago kɔc kɔ̈k lɔc në rem de tɔŋ ë Yithriɛlic ku tɔ keek wël kenïïm kɔc ke Thiriya.

¹⁰ Ku tɛ̈ɛ̈u Jowap rem de tɔŋ në mänhë Abicai cin bï keek wat, go jɔ keek wɛ̈l nïïm kɔc ke Ammon.

¹¹ Go Jowap lɛ̈k Abicai an, “Na lɔ kɔc ke Thiriya ya tiaam, ke yï kony yɛn, ku na cïï kɔc ke Ammon yïn tiaam ke yïn bä lɔ kony.

¹² Tɔ rɔt ril, ku ŋɛɛnyë! Wok bï tɔŋ dhil thɔ̈ɔ̈r në riɛl, në biäk de kɔckuɔ ku pɛ̈ɛ̈nydït ke Nhialicda. Ku Bɛ̈nydït abï këde piɔ̈nde tɔ looi!”

¹³ Na wën ke Jowap ë lɔ thïn kekë remdɛn ë tɔŋ bïk Thiriya lɔ mak, go kɔc ke Thiriya kat.

¹⁴ Na wën aa tïŋ kɔc ke Ammon luɔi cï Thiriya kat, gokï kat në Abicai ku dɔkkï kenïïm wunden. Go Jowap rɔt dak Jeruthalem të wään cïï yen lɔ thɔ̈ɔ̈r ke kɔc ke Ammon.

¹⁵ Na wën cï kɔc ke Thiriya ye tïŋ nɔn cïï kɔc ke Yithriɛl ke tiaam, gokï remdɛn ë tɔŋ ëbɛ̈n caal tëtök.

¹⁶ Go melik Ɣadadedher kɔc ke Thiriya tɔ̈u të lɔ aköl amiäk de wɛ̈ɛ̈r ë Yuparat lɔ cɔɔl, ku jɔkï lɔ Ɣelam, ke ke wɛt ë raan dïït cɔl Cobak keek, bɛ̈ny ë rem de tɔŋ ë melik Ɣadadedher, raan wunë Dhoba.

¹⁷ Na wën lɔ Debid ye piŋ, go rem de tɔŋ ë Yithriɛl ëbɛ̈n mat tëtök, ku teem wɛ̈ɛ̈r de Jordan, ku lee Ɣelam, go kɔc ke Thiriya röt guiir. Ku thäär tɔŋ

¹⁸ go kɔc ke Yithriɛl rem de tɔŋ ë Thiriya cuɔp ciëën. Ago Debid kekë kɔcke bot kadhorou de kɔc ke abëël ë Thiriya kuath nɔ̈k, ku nɛ̈kkï bot kathiërŋuan 40,000 ke rem de tɔŋ ë Thiriya. Acïk Cobak nɔ̈k aya, bɛ̈ny ë rem de tɔŋ de Thiriya.

¹⁹ Na wën aacï meliik luui Ɣadadedher e tïŋ nɔn cïï kɔc ke Yithriɛl keek tiaam, gokï mät looi në kɔc ke Yithriɛl ku luuikï keek. Go kɔc ke Thiriya jɔ riɔ̈ɔ̈c në kuɔɔny bïk kek kɔc ke Ammon bɛ nyɔk ë kuny.