2 Pet 3 - JAM DE NHIALIC 2011

Thön de Bɛ̈n ë Bɛ̈nydït

¹ Yɛn cï awerek kɔn gäär week, wek kɔc nhiaar, ku renden kï, ku në keyiic kaarou piɔ̈ɔ̈thkuön awai aya ke pɔ̈ɔ̈c abïk yïn, në täŋ aa yɛn we täk nïïm ë käŋ,

² ke we bï wël aa tak, wël cï kɔn lueel ë tït ɣeriic, ku takkï löŋda wok tuuc ke Bɛ̈nydït ku ye Konydan ë Wëi.

³ Jakï kënë kɔn ŋic, an, Të cï thök de piny thiɔ̈k, ke kɔc de gup agɛɛt abïk bɛ̈n ë agɛɛtden, kɔc cath në këde ŋɔ̈ɔ̈ŋdɛn ë ke dɔm,

⁴ bïkkï luelkï, an, “Bɛ̈ndɛn, an, bï en bɛ̈n akou? Të ɣɔn thouwë kuarkuɔ käŋ atɔ̈ukï kedhie ë täudɛn gɔlë piny ë cäk!”

⁵ Ku cöökë acïk baai ke ŋickï, an, Tënhial anu ɣɔn thɛɛr, ku nu piny nɔm aya, biäk ee tɔ̈u biic ku tɔ̈u biäk ë pïïu yiic, në jam de Nhialic,

⁶ ku ee pïïukë kek aa riäk piny ë nu ɣɔn në mol cï en mol ë pïïu.

⁷ Ku tënhial kekë piny nu ënɔɔnë acï ke tɔ̈ɔ̈u, në jam manë, bïk mac tiit, ku aye ke muk aɣet kööl ë guiëërëlöŋ de kɔc reec Nhialic, kööl bï kek riääk ëliŋliŋ.

⁸ Ku week, kɔc nhiaar, duökï cöök töŋë bï baai, an, Kööl tök acït agum de run tëde Bɛ̈nydït, ku agum de run acït kööl tök.

⁹ Bɛ̈nydït acie gääu në kë cï kɔn lueel, ë gääu ee kɔc kɔ̈k tɔ ye gääu, ku alirpiɔ̈u ë thuaat kekë wook, ku acïn piɔ̈u luɔi bï raan tök määr, ee luɔi bï kɔc puŋdepiɔ̈u yök kedhie en anu ë yepiɔ̈u.

¹⁰ Ku kööl ë Bɛ̈nydït abï bɛ̈n cït man ë cuɛ̈ɛ̈r, Në ee köölë tënhial abï nyaai në awuööu dït, ku lɛ̈ɛ̈ŋ kanhial në tuöc de manydït, ku piny abï nyop kekë ka cï looi thïn abï lɔ kuith piny.

¹¹ Ku ënɔɔnë, nɔn bï kake riääk kedhie, bäk dhil aa kɔc cït ŋö në rëërduön ɣeric aa wek rëër ku riëëuduön aa wek Nhialic riëëu,

¹² ku tiët aa wek bɛ̈n de kööl ë Nhialic tiit, an, bäk dap loor, kööl bï tënhial ɣɔ̈k mac, ago riäär, ku lɛ̈ɛ̈ŋ kanhial në tuöc de many dɛ̈p aläl?

¹³ Ku wook, acït man cï en e kɔn lɛ̈k wook, wok tit tënhial bï piac cak, ku piny bï piac cak aya, piny rëërë piathëpiɔ̈u thïn.

¹⁴ Yen tëde ka, wek kɔc nhiaar, në tiët tiɛɛt wek ka cït ee kakë, yak cök ë kaar wek luɔi bï we yök ke we rɛ̈ɛ̈r adïu, ke we cïn piɔ̈ɔ̈th tëthiin col, ku cïn kë bï we gɔ̈k ë yenɔm.

¹⁵ Ku jakï liɛɛr ë Bɛ̈nydïïtda piɔ̈u tɔ ye kunydewëi, acït man cï Paulo mɛnhkënëdan nhiaar e gäär week, në këde pɛlënɔm cï yiɛ̈n en.

¹⁶ Acït man cï e lueel ë awereek ke yiic kedhie, të jiɛɛm en ë keyiic në kakë. Ku cök kɔ̈k anukï thïn cök cie dap yök yiic, cök ye kɔc kënë wɛ̈ɛ̈t puk aye kërac, ayï kɔc kën lïk piny ë gäm, cït man ee kek kacïgɔ̈ɔ̈r kɔ̈k puk aya, lek röt gɔ̈n riääkden.

¹⁷ Ku week, wek kɔc nhiaar, në ŋïny cäk wek kakë kɔn ŋic, yak röt tiit, ke we cïï bï thɛl wei në kɔc reec löŋ gam ëtök, në wäc ee kek käŋ wööc, aguɔkï cuö wiëëk të wään kan wek kɔ̈ɔ̈c aril.

¹⁸ Yak lɔ ke we lɔ tueŋ në dhuëëŋ de wepiɔ̈ɔ̈th ku në ŋïny ŋiɛc wek Bɛ̈nydïïtdan Yecu Kërtho, yen aye Konydan ë wëi. Ë dhuëëŋ ë ye tɔ̈u ke ye këde ayï ënɔɔnë aɣet athɛɛr. Amiin.