2 Pet 2 - JAM DE NHIALIC 2011

Tït Aluɛth

¹ Ku tït aluɛth aake nu ë kɔc yiic ɣɔn, acït man bï kɔc aluɛth ë kɔc wɛ̈ɛ̈t nu ë weyiic, kɔc bï lööŋ ë wëët yalic bɛ̈ɛ̈i ëcuëër, lööŋ bï kɔc riɔ̈ɔ̈k piɔ̈ɔ̈th, arëk abïk Bɛ̈nydït cï ke wɛ̈ɛ̈r bei rɛɛc, agokï röt dap gɔ̈n riääk.

² Ku kɔc juëc abïk täudɛn ye kek käŋ riɔ̈ɔ̈k dɔmic, agokï kueer ë yic tɔ lat ë län rac.

³ Ku kɔɔr ee kek wëu juëc kɔɔr, en a bï kek week aa cam në jam ë ruëëny, ku guiëër bï löŋden guiir, guiëërdɛn thɛɛr, acie gääu, ku cïï riääkden ee nok!

⁴ Ku të kënë Nhialic tuucnhial pɔ̈l tuuc ɣɔn loi kërac, ku acï keek cuat ë adhum thuthic mɛc keek ë joth ke cuɔlëpiny abïk tɔ̈u ëtɛ̈ɛ̈n aɣet kööl bï löŋden guiir.

⁵ Ku të kën en piny thɛɛr pɔ̈l, ee Nowa raan ee jam de piathëpiɔ̈u guiir, en ë both e tök kekë kɔc kɔ̈k kadhorou, ɣɔn bïï en amool ë piny de kɔc reec Nhialic nɔm.

⁶ Ku kuiith pɛ̈ɛ̈nydït Thɔdom ku Gomoora piny ë mac abïk aa ŋeth, guiir en löŋden, an, bïke dhuöör piny, ago ke tɔ ye kääŋ bï kɔc bɛ̈ɛ̈i nïïm, kɔc an, bïk Nhialic aa rɛɛc riëëu.

⁷ Ku kony Lɔt raan piɛthpiɔ̈u, raan ee cool ë jeth piɔ̈u në luɔi col ëcut ee kɔc rac looi.

⁸ Raan piɛthpiɔ̈uwë ɣɔn rëër en ë keyiic, ago käŋ aa tïŋ ku piŋ ke, aaye piɔ̈u jiɛth ë aköölnyïïn në luɔidɛn rac ye kek löŋ yalic:

⁹ Të cï en käŋ looi aya, Bɛ̈nydït aŋic kɔc riëëu en luök të cï ke them, ku ŋic kɔc racpiɔ̈ɔ̈th mac aɣet kööl ë guiëërëlöŋ ke ke bï këdɛn tuc yök,

¹⁰ ku kɔc bï këdɛn tuc dït yök kek aye kɔc ee ka ke yäc kɔɔr, në döm cï ke dɔm ë ŋɔ̈ɔ̈ŋ de luɔi col, ku yek bäny baar nyïïn. Ee kɔc dham gup, kɔc ril nïïm, ayek adhuëŋ lat gup ku cïkï ee riɔ̈ɔ̈c.

¹¹ Ku tuucnhial gup, kɔc ŋuän ë keek në riɛl ku bɛ̈ɛ̈ny, acïkï keek ee gaany ë gɔny deyic lɛ̈t ë Bɛ̈nydït nɔm.

¹² Ku kɔckë, kɔc cït läi röör cïn nïïm, läi ke piny tei, läi cï cak në döm bï ke dɔm, ku ɣäth bï kek ɣäth, ayek ka kuckï lat, ku abïk määr ëtaiwei në ɣäthdɛn bï kek ɣäth,

¹³ ku bïk ariöp de racdepiɔ̈u yök. Thiäi ee kek käŋ thiɔ̈i aköl yen aye këmit ë kepiɔ̈ɔ̈th, ayek kathii col ku yek kak ë we tɔ gäk, kɔc ee röt tɔ kueth ë cäpdɛn lueth të ye kek kamit cam në week ëtök!

¹⁴ Kɔc cï nyïïn a pirpir në kɔ̈ɔ̈r ee kek diëër lei kɔɔr, kɔc cïn nyïïn päl duëër kek kërac pɔ̈l, ayek kɔc wëŋ kɔc cï piɔ̈ɔ̈th aläuläu në jam, aciɛthkï në piɔ̈n cï kajuëc ŋic ë kɔ̈ɔ̈r. Mïth de gup aciɛɛn ka!

¹⁵ Kɔc cï kueer lɔ cit pɔ̈l, ku mɛ̈ɛ̈rkï, agokï kueer ë Balaam wën ë Beyor kuanyic, raan ɣɔn nhiaar ariöp de luɔi de kërac

¹⁶ ku acï jɔ̈ɔ̈ny ë wäc ee yen löŋ wööcic: mul cïn e thok të jam acï jam ë röl ë raan, ago tiët pɛ̈n luɔidɛn ë miɔ̈ɔ̈l.

¹⁷ Kɔckë ayek yith cïn yiic pïïu, ku yek luäät kuɛɛth amaŋ, kɔc cï duëër adur täu keek aɣet athɛɛr.

¹⁸ Në luɛl ë ye kek jam juëc ɣɔ̈ric lueel ë keliëp tei, në ŋɔ̈ɔ̈ŋ de ka ke yäc, ku në luɔi ë dhööm, en aye kek kɔc wëŋ, kɔc, an, bɛ̈nkï ë liŋliŋ në kɔc ee tɔ̈u ke ke wäc käŋ.

¹⁹ Ayek keek yɔ̈ɔ̈k, an, We bï luöny bei ë lïïmic, ku kek gup ayek lïïm ke dhiap de käŋ, raan ë yï tiaam, yen guöp yen abï yï tɔ ye lïm.

²⁰ Ku na kɔc cï kɔn poth në kacol ke piny nɔm, në ŋïny ee kek Bɛ̈nydït ŋic yen aye Konydan Yecu Kërtho, të cï ke bɛ deep ë keek ku tiam ke, ke täudɛn ciëën jɔ rac awär täudɛn tueŋ wään.

²¹ Tëë ke kën kueer ë piathëpiɔ̈u ŋic ananden, adï ŋuɛ̈ɛ̈n tëde keek, në luɔi bï kek e ŋic, ku jakï röt bɛ thɛ̈ɛ̈r bei ë löŋic löŋ ɣeric cï yiɛ̈n keek.

²² Ku acï tïc tëde keek ke cït man ee kääŋ lueel kääŋ yic, an, “Jö ee yenɔm bɛ dhuöny ŋɔkke guöp, ku ŋun ë kudhur cï waak ee bɛ lɔ dal ë tiɔ̈kic.”