2 Pet 1 - JAM DE NHIALIC 2011

¹ Yɛn Thimon Petero, lïm de Yecu Kërtho ku ya tunyde, wek gäär awerek wek kɔc cï gäm de naamde yök, gäm kït ke gämda në piathëpiɔ̈u ë Nhialic kekë Konydan Yecu Kërtho:

² Ë dhuëëŋdepiɔ̈u ku mät ë ke lɔ ke ke ŋuak kenyïïn tëde week, në ŋïny ŋiɛc wek Nhialic kekë Yecu Kërtho Bɛ̈nydïïtda.

Cöt de Nhialic ku Löc

³ Acït man cï riɛldɛndïït bɔ̈ nhial wo gäm këriëëc ëbɛ̈n ka ke wëi ayï kake riëëu de Nhialic, në ŋïny ŋic wok Raan ë cɔl wook buk dhuëëŋde yök kekë piath de yenpiɔ̈u.

⁴ Ku yen aa lëk en wook kadït göök de naamden ka bï gäm wook, ke ke bï we tɔ ye kɔc bï täu de Nhialic rɔm ëtök, të cä wek poth ë dhiap nu ë piny nɔm dhiap ë bïïyë ŋɔ̈ɔ̈ŋ de kërac.

⁵ Yen ee cöök manë yen a bä wek cök ë thɛm wek en aläl, bäk piɔ̈n piɛth dɔm, matkï kekë gämdun, ku jakï ŋïnydekäŋ mat kekë piɔ̈n piɛth,

⁶ ku matkï dömderɔt kekë ŋïnydekäŋ, ku matkï guömdekäŋ kekë dömderɔt, ku matkï riëëu de Nhialic kekë guömdekäŋ,

⁷ ku matkï määth ë mïth ke raan tök määth kekë riëëu de Nhialic, ku matkï nhiëër kekë määth ee mïth ke raan tök määth.

⁸ Ku na nu kakë ë weyiic, ku ë ke ŋuak röt, ka yek we tɔ ye kɔc cïï röt ee dak ku kɔc cie rool në ŋïny ŋiɛc wek Bɛ̈nydan Yecu Kërtho.

⁹ Ku raan cïï cath ke kakë ee cɔɔr, raan cïï tëmec duëër woi, ku acï nɔm määr ë wɛ̈k wään cïï e waak piɔ̈u në karɛckɛn thɛɛr.

¹⁰ Yen aŋuɛ̈ɛ̈n ë luɔi bä wek cök ë kaar wek en nɔn bä wek cɔ̈t ë cɔɔlë week ku löny ë lɔcë week tɔ ye yic ëgɔk: na luɔikï kakë, ke we cïï bï kɔ̈th anandun.

¹¹ Ku yen abï we dap päl lɔ ë ciɛɛŋ ë Bɛ̈nydïïtdan Yecu Kërtho Konydayic, ciɛɛŋ ee tɔ̈u athɛɛr.

¹² Yen acän täk bï pɔ̈l, täŋ bän aa cool ë täk ɛn wenïïm ë kakë, ciɛk, an, ŋiɛckï keek, ku yak kɔ̈ɔ̈c aril në löŋ yicic, löŋ tɔ̈u ke week ënɔɔnë.

¹³ Yeka, ë yapiɔ̈u, an, ee këpiɛth, tën aa yɛn week jut në täŋ aa yɛn week täk nïïm, nɔn ŋuɔɔt ɛn ke ya tɔ̈u ka ya pïïr.

¹⁴ Në ŋïny ŋiɛc ɛn en, an, kööl bän dhil pɔ̈k wokë guöpdï ë guɔ thiɔ̈k, cït man cï Bɛ̈nydan Yecu Kërtho e nyuöth ɛn.

¹⁵ Ku abä ya cök ë luɔi ɛn en ë aköölnyïïn kedhie aya, na miäk cä thou, ke we duëër ee kake aa tak ë wenïïm.

Kɔc cï Dhuëëŋ de Kërtho Tïŋ

¹⁶ Acie päär ë kɔ̈ɔ̈r kek ë kuanyku cök, kɔ̈ɔ̈r cï cak ë pɛl, wään wëët wok week ee riɛldïït cath ke Bɛ̈nydït Yecu Kërtho ku bɛ̈n cï en bɛ̈n wok ee kɔc cï dhuëëŋdɛn dït tïŋ ë wonyïïn.

¹⁷ Acï riëëu ku dhuëëŋ yök tëde Nhialic Wääda, kööl ɣɔn bï röl yïnya tëde dhuëëŋdïït läk, röl lueel en an, “Wëndiën nhiaar kï, Wën miɛt ɛn piɔ̈u wokë yen aläl!”

¹⁸ Erölë acuk piŋ wook, ke bɔ̈ paannhial, ɣɔn nu wok në yen ëtök ë kuurdït nɔm kuurdït ɣeric.

¹⁹ Ku wo cath në jam de tït aya, jam yic ëgɔk, jam wär jamë, ku apiɛth tëde week të dɔ̈t wek jamë, luɔi ee yen ciët manyëalath ee riau tëcol, a ruu piny, ago ciëër ë runëpiny rɔt jɔt ë wepiɔ̈ɔ̈th.

²⁰ Ku kankï cöökë ŋic, an, acïn jam töŋ de tiët jam de kacïgɔ̈ɔ̈r jam ë lueel raan ë këde nɔmde.

²¹ Acïn jam ë guiir tiët jam ë bɔ̈ në këde piɔ̈n ë raan ëtaiwei: kɔc ɣerpiɔ̈ɔ̈th kɔc ke Nhialic aake ye jam guiir të ye Wëidït ɣer ke kuaath.