2 Mel 24 - JAM DE NHIALIC 2011

¹ Në akööl ke Jeɣoyakim, go Nebukadnedhar melik de Babilonia Juda mak, go Jeɣoyakim tɔ ye raan ee ye luööi në run kadiäk, ku jɔ bɛ rɛɛc thok.

² Go Bɛ̈nydït kɔc ee tɔŋ bɛ̈ɛ̈i tuöc Juda, rem de Babilon, ku Thiriya, ku Mowap, ku Amon, bïk bɛ̈n thɔ̈ɔ̈r ë Jeɣoyakim ku bïk Juda lɔ riɔ̈ɔ̈k, cït man cïï Bɛ̈nydït ye lueel, në röl de lïïmke tït ke Nhialic.

³ Kënë aa lui rɔt në yöök de Bɛ̈nydït, ke bï kɔc ke Juda nyaai në Yelɔ̈ɔ̈m, në biäk de awɛ̈ɛ̈c ke Manatha, ku karɛc ɣɔn cï ke looi ëbɛ̈n,

⁴ ku në biäk de rim de kɔc cï ke nɔ̈k ëbɛ̈n ke cïn kë cïk wööc. Bɛ̈nydït acïï Manatha bï pɔ̈l në biäk de ee kënë.

⁵ Këriëëc ëbɛ̈n cï Jeɣoyakim ke looi, acï gɔ̈ɔ̈r në Awerek de kathɛɛr ke meliik ke Juda yiic.

⁶ Go Jeɣoyakim thou, ago Jekonia wënde lɔ në nyinde yic ke ye melik.

⁷ Ku melik de Rip akën bɛ bɛ̈n bei pinyde, në luɔi cïï akɛɛth ɣɔn ee kake melik de Rip nööm në melik de Babilonia, gɔl në wɛ̈ɛ̈r ë Yuparat lɔŋ të lɔ rut abïï bɛ̈n guööt në aken ë Rip nɔm.

Jekonia Melik de Juda

⁸ Jekonia aaye run kathiëër ku bɛ̈t ɣɔn dɔm en bääny ke ye melik de Juda, go bääny muk ë Jeruthalem në pɛ̈i kadiäk. Man acɔl Neɣucta, nyan de Elnathan në Jeruthalem.

⁹ Ku Jekonia ë karɛc looi në Bɛ̈nydït nyin, cït man ɣɔn cïï kuarken ke looi.

¹⁰ Në aköölkë yiic, go kɔc ee Nebukadnedhar luööi melik de Babilon, Jeruthalem mak ku tookkï.

¹¹ Go Nebukadnedhar melik de Babilon lɔ wut, të ɣɔn le raadɛn ee ye luööi ke took wut,

¹² go Jekonia melik de Juda rɔt thɔ̈n melik de Babilon kekë man, ku kɔckɛn ee ye luööi, ku mïthke, ku bäny nu baai de melik ëbɛ̈n. Në ruöön ye Nebukadnedhar run bɛ̈t ë bäänyic, go melik Jekonia jɔt ke mac,

¹³ ku jɔt wëu ke Luaŋdït ku kake ɣön ë melik ëbɛ̈n, leer ke Babilon. Cït man cïï Bɛ̈nydït ye kɔn lueel, go Nebukadnedhar wëu cï loi në adhääp dhuööŋ ëbɛ̈n, ka ɣɔn bïï Melik Tholomon ke looi në baŋ de luɔi ë Luaŋdïtic.

¹⁴ Go Nebukadnedhar kɔc ke Jeruthalem peec ëbɛ̈n, mïth ke melik ëbɛ̈n ku kɔc ril de naamden, go aguum kathiëër 10,000 ke kɔc peec, ayï atëët ëbɛ̈n ku kɔc ee thäth, acïn kɔc cï döŋ, ee kɔc kuanynyïïn ke Juda kapäc.

¹⁵ Go Nebukadnedhar melik Jekonia jɔt ke mac kekë man, ku diëërke ku bänyke, ku kɔc ril ke baai, go keek peec ë Jeruthalem leer ke Babilon.

¹⁶ Go melik Nebukadnedhar kɔc cï peec ëbɛ̈n lɛɛr Babilonia, kɔc de naamden ayek aguum kadhorou 7,000, ku atëët ku kɔc ee thäth ayek agum tök 1,000, ku ayek kɔc ril kedhie kɔc lëu tɔŋ.

¹⁷ Go melik de Babilon Matania, dɔm wulënë Jekonia, ke ye melik de Juda në nyin ë Jekonia yic, ku wɛɛr rin an Dhedekia.

Dhedekia Melik de Juda

¹⁸ Dhedekia aaye run thiërrou ku tök, ɣɔn dɔm en bääny ke ye melik de Juda, ago bääny muk ë Jeruthalem në ruöön thiëër ku tök. Man acɔl Ɣamutal, nyan de Jeremia në wun cɔl Libna.

¹⁹ Acï karɛc looi ë Bɛ̈nydït nɔm, ka cït ka ɣɔn looi ë Jeɣoyakim ëbɛ̈n.

²⁰ Go Bɛ̈nydït gɔ̈th arëët kekë kɔc ke Jeruthalem ku Juda, ago keek jäp wei në Yelɔ̈ɔ̈m. Go Dhedekia melik de Babilon rɛɛc.