2 Mel 22 - JAM DE NHIALIC 2011

Jothia Melik de Juda

¹ Jothia aaye run bɛ̈t ɣɔn dɔm en bääny ke ye melik de Juda, go bääny muk ë Jeruthalem në run kathiërdiäk ku tök. Man acɔl Jedida, nyan de Adaya në wun cɔl Bodhkath.

² Acï këpiɛth looi në Bɛ̈nydït nɔm, ku ciɛth ë kueer ë Debid yic, akën rɔt yal ë biäk cam ayï cuëc.

Awerek de Löŋ acï Yök

³ Ɣɔn cï yen run aa thiëër ku bɛ̈t në bäänyic, go melik Jothia raan ee käŋ gɔ̈ɔ̈r cɔl Capan, wën ë Adhalia ku ye wën ë wën ë Meculam raan ee kake Luaŋdït gɔ̈ɔ̈r tuɔɔc ë Bɛ̈nydïtic an:

⁴ “Lɔ tëde Ɣilikia bɛ̈nydïït ë kake Nhialic bïï kuën de wëu nyooth, wëu ye bäny ke kake Nhialic lui ë Luaŋdït thok juaar tëde kɔc.

⁵ Ku bïï ke gäm kɔc nu në luɔi de Luaŋdït nɔm, ku tɔ ke gëmkï kɔc ke luɔi rɛ̈ɛ̈r Luaŋdït bï ke ye piir.

⁶ Bïï wëu gäm kɔc ee tiim guaŋ, ku kɔc ee yïk, ku atëët ŋic käŋ giit, ku guaŋkï ke, ku ɣɔɔcë ke tiim, ku kur cï ŋiëc guaŋ bïï ke Luaŋdït piir.

⁷ Ku acï ke bï luɔp në kueer cïï ke wëu luɔɔi thïn, wëu ke luɔi cï gäm keek, në luɔi ye kek kɔc adööt ee wëu ŋiëc luɔɔi apiɛth.

⁸ Go Ɣilikia bɛ̈nydïït ë kake Nhialic lɛ̈k Capan raan ee käŋ gɔ̈ɔ̈r, an, Yɛn cï awerek de löŋ yök Luaŋdïtic. Go Ɣilikia awerek gäm Capan, ku kueenic.

⁹ Go Capan raan ee käŋ gɔ̈ɔ̈r bɛ̈n tëde melik, ku lëk en an, “Lïïmku acïk wëu tɔ̈u Luaŋdïtic nööm, ku gëmkï ke kɔc nu ë luɔi de Luaŋdït nɔm.

¹⁰ Ku ëtɛ̈ɛ̈n, acïï Capan lɛ̈k melik an, “Ɣilikia bɛ̈ny de kake Nhialic ë ya gäm awerek de löŋ.” Go Capan awerek de löŋ kueen në melik nɔm.

¹¹ Na wën aa lɔ melik jamde awerek de löŋ piŋ, go lupɔɔ ke rɛtiic në jiɛthëpiɔ̈u.

¹² Go melik Ɣilikia bɛ̈ny de kake Nhialic yɔ̈ɔ̈k kekë Aɣikam wën ë Capan, ku Akbor wën ë Mikaya ku Capan raan ee käŋ gɔ̈ɔ̈r, ku Athaya raan ee melik luööi an:

¹³ “Lakkï, ku thiëckï Bɛ̈nydït në biäkdï, ku biäk de kɔc, ku në biäk de kɔc ke Judai ëbɛ̈n, ku në biäk de jam de awerek de löŋ cï yökë, në biäk dïït agönh ë Bɛ̈nydït nu ë wo yiëth, në luɔi kënë ë kuarkuɔ jam de awerekë döt, ku luikï në kë cï gɔ̈ɔ̈r ëbɛ̈n në biäkda.”

¹⁴ Na wën, ke Ɣilikia bɛ̈ny de kake Nhialic ku Aɣikam, ku Akbor, ku Capan ku jɔ ya Athaya, gokï lɔ tëde Ɣulda tiiŋ tiët rɛ̈ɛ̈r ë Jeruthalem biäk ë rou. (Ku ee tiiŋ de Calum, wën de Tikba, ku ye wën ë wën Ɣarɣath, raan tɔ̈u lupɔɔ ke Luaŋdït në yeciin.) Gokï jɔ jam në yen në kë cï tuöl.

¹⁵ Ago lɛ̈k keek an, “Acï Bɛ̈nydït Nhialic de Yithriɛl lueel an: ‘lɛ̈kë raan cï we tuöc Ɛn.

¹⁶ An acï Bɛ̈nydït lueel an, “Tïŋ Yɛn bï kërac bɛ̈ɛ̈i ee tënë, Yɛn bï Jeruthalem kekë kɔckɛn ceŋ en luöi këtuc cït man ë jam cï gɔ̈ɔ̈r në awerekic, ku cï melik de Juda kueen.

¹⁷ Acïk A rɛɛc ku gëmkï miɔ̈c de wal ŋïr yiëth kɔ̈k, kënë acï agönhdï jat nhial në biäk de këriëëc cïk looi ëbɛ̈n në kecin. Në biäk de ee kënë agönhdï abï dëp ee tënë, ku acïï bï liu.

¹⁸ Ku në këde melik de Juda cï we tuööc bï Bɛ̈nydït bɛ̈n luɔp, lɛ̈kkï yen an, “Acï Bɛ̈nydït Nhialic de Yithriɛl lueel an, në biäk de wël cï piŋ në awerekic,

¹⁹ ku në biäk cï yïn piɔ̈u dhiau, ku kuɔɔrë rɔt piny në Bɛ̈nydït nɔm, wën piŋ yïn luɔi bän kërac looi ee tënë, ku lɔ kɔc ceŋ ee tënë, an duëërkï a ɣään bï pɔ̈l, ɣään cï cieen, ku yïn ë lupɔɔku rɛtiic, ku dhiau në Ya nɔm, Yɛn ayadäŋ yïn cä piŋ röl.

²⁰ Në biäk de ee kënë tïŋ yï bä mat we kuarkun, në raŋdu yic në mät, ku nyïïnku, acïkï kërɛɛc bä tuööc ëbɛ̈n ee tënë bï tïŋ.” Go kɔc ee thoŋë yiɛ̈n melik Jothia.