2 Mel 2 - JAM DE NHIALIC 2011

Elija Aleerë Paannhial

¹ Na ɣɔn, ke kööl bïï ë Bɛ̈nydït Elija jat nhial në kɔɔr bɔ̈. Go Elija lɔ kekë Elica lek Gilgal,

² go Elija Elica yɔ̈ɔ̈k an, “Dɔ̈ŋë eenë, yïn läŋ, Bɛ̈nydït acï a tuɔɔc Bethel.” Go Elica lueel an, “Yɛn cï kuëëŋ në rin ke Bɛ̈nydït pïïr, ku në pïïrdu, yïn cä bï pɔ̈l.” Agokï lɔ Bethel.

³ Go wɛ̈ɛ̈t tït ke Nhialic nu ë Bethel agokï lɔ tëde Elica, ku yöökkï an, “Ŋic nɔn bï Bɛ̈nydït, bɛ̈nydu nyaai e yïnɔm ëköölë?” Go lueel an, “Aŋiɛc, miɛmkï.”

⁴ Na wën, ke Elija yöök Elica an, “Elica, dɔ̈ŋë eenë, yïn läŋ, yɛn cïï Bɛ̈nydït tuɔɔc Jeriko.” Go lueel an, “Yɛn cï kuëëŋ në rin ë Bɛ̈nydït pïïr, ku në pïïrdu, yïn cä bï pɔ̈l.” Agokï lɔ Jeriko.

⁵ Go wɛ̈ɛ̈t tït ke Nhialic, nu ë Jeriko agokï bɛ̈n tëde Elica, ku yöökkï, an, “Ŋic nɔn bï Bɛ̈nydït, bɛ̈nydu nyaai ë yïnɔm ëköölë?” Go bɛ̈ɛ̈r an, “Ɣɛɛ, Aŋiɛc, miɛmkï.”

⁶ Na wën, ke Elija yöök Elica, an, “Dɔ̈ŋë eenë, yïn läŋ, yɛn cïï Bɛ̈nydït tuɔɔc Jordan.” Go lueel an, “Yɛn cï kuëëŋ në rin ke Bɛ̈nydït pïïr, ku në pïïrdu, yïn cä bï pɔ̈l.” Agokï lɔ kaarou.

⁷ Go wɛ̈ɛ̈t tït kathiërdhïc lɔ Jordan ë kecök aya. Ago Elija kekë Elica kɔ̈ɔ̈c ë kiir yɔu, ku kääc tït kathiërdhïc tëmec ke keek ëmääth.

⁸ Na wën, ke Elija ë nöm lupɔde, ku dolic, ku jɔ pïïu yup yiic, ago pïïu keyiic tek tɛ̈n ku tɛ̈n, ago Elija kekë Elica tem kaarou tëkkï tëril.

⁹ Na wën, aa cïk tem, ke Elija yöök Elica, an, “Lip kë bä luöi yïn, të ŋuɔɔt ɛn ke ya kënë guɔ nyaai ë yïnɔm.” Go Elica lueel, an, “Yïn läŋ, tɔ ya yök biäkdït ë wëiku bïk nu ë yaguöp.”

¹⁰ Go Elija lueel an, “Yïn cï kë rilic kɔɔr, ku na woi yɛn të nyiɛɛiyë yɛn ë yïlɔ̈ɔ̈m, ka bä yök, ku na cïï ya bï woi, ka cïï bï yök.”

¹¹ Na wën, aa ŋootkï, ke ke cath, ke ke jam, go abël ë mac thel ë jöŋgöör ke mac tuöl ë thiäu, ku tek keyiic, go Elija lɔ paannhial në kɔɔr.

¹² Ago Elica yen tïŋ, go cööt an, “Wäär, Wäär! Raan ril ee Yithriɛl gël! Yïn cï jäl!” Ku akën Elija bɛ tïŋ. Ago Elica lupɔɔke rɛt yiic ë rou në jiɛthëpiɔ̈u.

¹³ Ku kuɛny lupɔ de Elija wën cï lööny wei tëde yen, ku puk enɔm, bïï ku kɛ̈ɛ̈c në Jordan yɔu.

¹⁴ Go lupɔ wën cï lööny piny tëde Elija nööm ku be en pïïu yup yiic, ku lueel an, “Nu ënou ënɔɔnë yen Bɛ̈nydït Nhialic de Elija.” Go pïïu keyiic tek në rou, go Elica tëëk ke lɔ lɔŋ tui.

¹⁵ Go kut ë tït rɛ̈ɛ̈r ë Jeriko ye tïŋ agokï lueel an, “Wëi ke Elija acïk nyuc në Elica guöp.” Gokï lɔ yök në yen, ku gutkï kenïïm piny ë yenɔm,

¹⁶ Gokï lɛ̈k en an, “Tïŋ, lïïmku adekï nïïm röör ril kathiërdhïc, yïn läŋ tɔ wo lɔ lok bɛ̈nydu kɔɔr. Tɛk däŋ cïï Wëi ke Bɛ̈nydït en gap nhial ku lek cuat ë kuur däŋ nɔm, ku nɔn ee wakic.” Go Elica bɛ̈ɛ̈r an, “Du keek tooc.”

¹⁷ Ku acïk bɛ̈n ŋak nɔm, arëk abï guöp riɔ̈ɔ̈c. Go lueel an, “Tuɔɔckï keek.” Gokï röör kathiërdhïc tooc lekkï, ku kɔɔrkï Elija në nïn kadiäk ku akënkï yök.

¹⁸ Na wën, ke ke puk kenïïm Elica, aa rɛ̈ɛ̈r ke ke tiit ë Jeriko. Go lɛ̈k keek an, “Kɛ̈n we yɔ̈ɔ̈k an duökï lɔ?”

Göök ke Elica

¹⁹ Go röör kɔ̈k ke Jeriko lɔ ku lëkkï Elica an, “Wunë apiɛth cït man woi yïn en bɛ̈nydï, ku pïïu arackï ku piny acie luɔk.”

²⁰ Go Elica lëk keek an, “Yiënkï yɛn abïny ë piac looi, ku tääukï amilɔ thïn.” Gokï yiɛ̈n en.

²¹ Go lɔ tëde nyin de pïïu ku cuɛt amilɔ thïn, ku lueel an, “Acï Bɛ̈nydït lueel an, Yɛn cï pïïukë looi ku ta ke piɛth, acïkï yiic bï bɛ dɛ thuɔɔu, ku acïï piny bï bɛ pɛ̈n luɔk.”

²² Ku pïïu acïk bɛ̈n piath aɣet cï ë köölë, cït man ë jam cï ë Elica lueel.

²³ Go Elica jäl ë Jeriko le Bethel, na wën aa jɔ cath kueer, go wäthii bɛ̈n bei wutic ku getkï guöp, ke yek lueel an, “Anɔm baar lɔ nhial Anɔm baar lɔ nhial!”

²⁴ Go rɔt puk, na wën cï ke tïŋ ke ke lɛ̈m aciɛɛn në rin ke Bɛ̈nydït. Go kɔ̈ɔ̈r ayuääl kaarou bɛ̈n bei në tiimiic, ku cuetkï wäthii kathiërŋuan ku rou në ke yiic.”

²⁵ Ku Elica ëbɛ̈n ɣet ë kuur ë Karmel nɔm, ku jɔ rɔt bɛ̈n puk ëtɛ̈ɛ̈n le Thamaria.