2 Mel 19 - JAM DE NHIALIC 2011

Melik Alop Täŋ de Yithaya

¹ Na wën aacï melik Ɣedhekia këdɛn cïk lueel piŋ, go lupɔɔke rɛtiic në jiɛthëpiɔ̈u, ku tɛ̈ɛ̈u lupɔɔ ke cuɔl ë yekɔ̈u, ku le Luaŋdït ë Bɛ̈nydït.

² Ku tooc Eliakim bɛ̈ny ë rem de tɔŋ nu baai de melik nɔm, ku Cebana raan ee kake göny gɔ̈ɔ̈r, ku bɛ̈nydïït ë kake Nhialic bïk lɔ tëde tiët ë Nhialic Yithaya wën ë Amoth ke ke cieŋ lupɔɔ ke cuɔl.

³ Gokï lɛ̈k tiët an, “Kë cïï melik Ɣedhekia lueel kï, an, köölë ee kööl ë nuan, wok cï luöi këtuc, ku wok cï yɔ̈ɔ̈r. Wok cït tiiŋ rɔ̈p ku acïï dhiëth lëu në luɔi cïn en riɛl.

⁴ Rabcaka bɛ̈ny ë rem de tɔŋ de Athiriya alɛ̈ɛ̈t Nhialic pïïr. Ku Bɛ̈nydït Nhialicdu abï ee lɛ̈ɛ̈të piŋ ku bïï kɔc luel ke luöi këtuc. Ku läŋë në biäk de kɔckuɔn cï döŋ apïr.”

⁵ Të wën piŋ ë Yithaya jam de melik Ɣedhekia,

⁶ go ë Yithaya pɔ̈k nɔm keek an: “Aye Bɛ̈nydït lueel an, duökï röt tɔ riɔ̈c në wël cï kɔc ke Athiriya ke lueel an, cïï Bɛ̈nydït week bï kony.

⁷ Bɛ̈nydït abï melik de Athiriya tɔ piŋ thoŋ lɔ riäuriäu bï yen tɔ puk enɔm wunden, ku abïï Bɛ̈nydït tɔ lɔ näk ëtɛ̈ɛ̈n.”

Kɔc ke Athiriya Abekï Awerek de Riëëc tuɔɔc

⁸ Go Rabcaka bɛ̈ny de rem de tɔŋ de Athiriya lɔ të nu melik de Athiriya, wën cï yen e ŋic nɔn cïï yen Lacic nyääŋ piny, ku le thɔ̈ɔ̈r kekë wun thiëëk kek cɔl Libna.

⁹ Jam acï ɣet Athiriya an rem de tɔŋ de Rip kuɛɛthë melik cɔl Tiriɣaka, raan ë Kuc an bïï keek bɛ̈n mak. Të wën jɔ melik de Athiriya kënë piŋ, ke jɔ awerek gäär melik Ɣedhekia

¹⁰ lueel an, “Lɛ̈kkï Ɣedhekia melik de Juda an, “Du rɔt tɔ mɛth ë Nhialicduön yak ŋɔ̈ɔ̈thë, në luɛl Yen E lɛ̈k week an cïï Jeruthalem bïï dɔm në melik de Athiriya.

¹¹ Acï piŋ yen kë cïï melik de Athiriya luöi wut ëbɛ̈n, wun cï lueel an riëëk, yak tak duɛ̈ɛ̈rkï poth?

¹² Juöör ɣɔn cïï kuarkuɔ ke kɔn riɔ̈ɔ̈k cït yï Godhan ku Ɣaran ku Redhep ku nɛ̈k kɔc ke Betheden ɣɔn rɛ̈ɛ̈r ë Telathar, ku acïn yanhdɛn töŋ cï juöör bɛ̈n kony.

¹³ Ayï meliik ke wuöt ke Ɣamath ku Arapad, ku Theprapiam, ku Ɣena, ku Yiwa nukï ënou?”

¹⁴ Go melik Ɣedhekia ë awerekë nööm tëde tuuc ku jɔ kueen yic. Go Ɣedhekia lɔ ë Luaŋdïtic ku thieth awerek në Bɛ̈nydït nɔm.

¹⁵ Ku läŋ Ɣedhekia an, “Bɛ̈nydït Awärjäŋ, Nhialic de Yithriɛl, thöönydu anu ë cerubiim kaarou nïïm nhial, ee Yïn ee Nhialic Yïtök, Yïn amac ciɛɛŋ ke piny nɔm. Yïn aa cak piny ku tënhial.

¹⁶ Ënɔɔnë, Bɛ̈nydït, Tïŋ kë luiyë wook, piŋ wo röt. Piŋ ka jɔ Thenakerip melik de Athiriya ke Yï dɔl guöp, Yïn Nhialic pïïr.

¹⁷ Wodhie aŋicku Bɛ̈nydït nɔn cïï melik de Athiriya juöör juëc riɔ̈ɔ̈k, abï kɔc pinyden pɔ̈l,

¹⁸ ku nyop yiëthken, ka ɣɔn cie yiëth ë yic, ayek kak ë guaŋ ë tiim ku kur, luɔi de kɔc cin tei.

¹⁹ Ënɔɔnë Bɛ̈nydït Nhialicda luäkë wo bei në Athiriya cin, ke bï juöör ke piny nɔm lueel an, Yïn aye Nhialic Yïtök.”

Jam lëk ë Yithaya Melik

²⁰ Na wën, ke Yithaya, ë tuc melik Ɣedhekia thok, nyuth bëër cïï Bɛ̈nydït lɔ̈ŋde bɛ̈ɛ̈r

²¹ acïï Bɛ̈nydït lueel an, “Nyan de Dhiɔn adɔl yïguöp, ku nyan de Jeruthalem abiɔn Thenakerip guöp.

²² Eeŋa ye tak raan läätë ku dɔl guöp? Yïn kën Ya riëëu Yɛn Nhialic Ɣeric de Yithriɛl.

²³ Yïn cï Ya tuöc raan ee yï luööi (bɛ̈nyduön ë rem de tɔŋ) bï rɔt bɛ̈n lɛ̈c Ɛn an në abëël ë jöŋgöör, yïn cï kurdït bär ke Lebanɔn tiam. Ku lec rɔt në luɔi cï yïn tiim ke thaipereth bär yep ëtɛ̈ɛ̈n ku ɣet në roor thar ciëën.

²⁴ Ku yïn ë rɔt leec an cï yïth wec në wuöt lei yiic, ku dɛ̈kkë në pïïuken, ku luel an cï Kiir tɔ kääc ago rem de tɔŋdu tem tëril.

²⁵ Ku kɛ̈në kɔn piŋ nɔn yen Ɛn? Yɛn Bɛ̈nydït, Yɛn ë kïït en ɣɔn thɛɛr, ku ta loi rɔt ënɔɔnë yen luɔi bï yïn wuöt ku ɣään ke riɛl dhuɔŋ piny abïk aa dhuur nɔm.

²⁶ Yen aa cïn ë kɔc rɛ̈ɛ̈r ëtɛ̈ɛ̈n nïïm riɛl, ku yek riɔ̈ɔ̈c ku mumkï nïïm. Ayek ciët wal cil ë duumiic ku ɣööt nïïm cïï tuöc ë yom bɔ̈ në aköl amiäk nɔ̈k të kën kek kɔn dït.

²⁷ Ku Yɛn ŋic kë cath ke yïn ëbɛ̈n, kë loi ku të le yïn, ku kë tɔ yï miɔ̈l ke yï bɛ̈k Ɛn.

²⁸ Yɛn cï awerek jam në luɔi mëën yïn we Yɛn yök, ku luɔi yïn rɔt lɛɛc, ku ënɔɔnë yïn bä gɔn wum në alabithɔ, ku mäc yïthok joth, ku jat yïn pɔ̈k yïnɔm në kueer ɣɔn bï yïn.”

²⁹ Go Yithaya lɛ̈k melik Ɣedhekia an, “Kënë ee kïn bä wek kë bï tuöl ŋic. Ruöönë ku lë ruöön, wek bï cam në mïth ë wal, ku na lë ruöön däŋë, wek bï rɛɛp ë cuɔmkï cam kekë enap në duumkuön ke tiimiic.

³⁰ Kɔc nu ë Juda bï döŋ apïr, abïk thäär lɔ piny cït man ë tim cï meike ɣet ë tiɔpic, ku lok ë mïth juëc.

³¹ Abï dɛ kɔc bï döŋ apïr ë Jeruthalem ku kuur ë Dhiɔn, cït man cïï Bɛ̈nydït e lueel an bï rɔt looi.

³² Kë cïï Bɛ̈nydït lueel kï në biäk de melik de Athiriya. Acïï wut bï käcic, ku nɔn mocic në winh töŋ de dhaŋ, ku acïn rem de tɔŋ muk kööt bï tëëk ë wut këc, ku cïï kal ë pänydït bï wil kɔ̈u biic në thɔɔc.

³³ Melik abï rɔt pɔ̈k wunden ke kuany kueeric, kueer ɣɔn bï yen. Acï bï ɣëët wut eenë, Yɛn Bɛ̈nydït Yɛn ë jam.

³⁴ Yɛn bï ee pänydïïtë kony ku gɛ̈l, në biäk de dhuëëŋ, ku në biäk de thön cä gäm lïmdï Debid.”

³⁵ Në ee wɛ̈ɛ̈rë yic go tunynhial ë Bɛ̈nydït lɔ wun cïï Athiriya piɔ̈ɔ̈t thïn ku nɛ̈k bɔt ku thiërbɛ̈t ku dhïc de agum 185,000 de rem de tɔŋ, na ɣɔn amiäk aa lɔ kɔc pääc, ke kɔc cï döŋ apïr ke ke tïŋ kɔc cï thou adhɔt piny.

³⁶ Ago Thenakerip melik de Athiriya jäl ku puk rɔt wunden Ninebe.

³⁷ Na ɣɔn ë kööl tök, të lɛ̈m en luaŋ ë yanhdɛn Nithrokic, go wɛ̈ɛ̈tke kaarou yï Adramelek ku Caredher nɔ̈k në abätɛ̈ɛ̈u. Gokï bɛ̈n kat ke ke lɔ piny de Ararat, ago Etharɣadon wënde lɔ në nyinde yic ke ye melik.