2 Mel 16 - JAM DE NHIALIC 2011

Aɣadh Melik de Juda

¹ Në ruöön ye Peka wën ë Remalia run thiëër ku dhorou në bääny de Yithriɛl yic, go Aɣadh wën ë Jotham aa melik ë Juda,

² aaye run thiërrou, go bääny muk në Jeruthalem në run kathiëër ku dhetem, acïn këpiɛth cï looi në Bɛ̈nydït Nhialic nɔm, cït kë ɣɔn ye Debid looi.

³ Ku yen aa kuany kueer ë meliik ke Yithriɛliic arëk abï wënde gam ke ye miɔ̈c nyupë yiëth, looi kërac ë Bɛ̈nydït nɔm, karɛc ɣɔn ye juöör ɣɔn cï Bɛ̈nydït ke cuɔp wei në kɔc ke Yithriɛl nïïm looi.

⁴ Ku Aɣadh aaye miɔ̈c gam, ku ye wal ŋïr nyop në ɣään thöny nïïm, ku kur nïïm, ku në tiim tɔ̈c thäär ëbɛ̈n.

⁵ Go Redhin melik de Thiriya ku Peka wën ë Remalia, melik de Yithriɛl Jeruthalem bɛ̈n mak ku tookkï Aɣadh, ku akënkï bɛ̈n tiaam.

⁶ Ku në ë thaarë yic, go Redhin melik de Edom wun cɔl Elath puk nɔm, ku jɔ kɔc ke Judai cuɔp wei në Elath, go kɔc ke Edom ɣap në Elath agut cï ee köölë.

⁷ Go Aɣadh kɔc tuöc Tiglath Pilethar melik de Athiriya an: “Ee yɛn lïmdu, ku ya wëndu, bä kony ɛn në melik de Thiriya, ku melik de Yithriɛl, kɔc mɛk ɛn.”

⁸ Go Aɣadh ateek ku adhäm ë yök Luaŋdït, ku kak ë yök të ye käŋ tɔ̈ɔ̈u thïn ɣöndïït ë melik tɔ leerë ë kɔc, ke ke ye miɔ̈c yïnë melik de Athiriya.

⁹ Na wën cï melik Tiglath Pilethar thoŋ de Aɣadh piŋ, go Tiglath Pilethar lɔ Damathko, ku dɔm melik Redhin ku nɛ̈k, ku jɔt kɔc leer ke të cɔl Kir ke ke mac.

¹⁰ Na ɣɔn aa lɔ melik Aɣadh lɔ Damathko le Tiglath Pilethar melik de Athiriya loor nɔm, go yïïŋ tɔ̈u ë Damathko tïŋ, go melik Aɣadh Yuria bɛ̈ny de kake Nhialic tuöc täu de ee yïïŋë, ayï kathii akäŋ në biäkde acï ke tuɔɔc.

¹¹ Go Yuria bɛ̈ny de kake Nhialic yïk yïk ke thɔ̈ŋë yïŋ ë lëk Aɣadh yen ë Damathko në këriëëcic ëbɛ̈n, go Yuria yïk looi, ke melik Aɣadh ŋoot ke kën e nɔm pɔ̈k ciëën.

¹² Na ɣɔn jɔ melik ye nɔm puk në Damathko, go yïk gɔɔk ku le yïk lɔ̈ɔ̈m, ku le nhial në yenɔm.

¹³ Ëtɛ̈ɛ̈n go miɔ̈c ye nyop ëbɛ̈n gam kekë miɔ̈c ë rap, ku wɛ̈l miɔ̈c ye dek në yenɔm, ku wïïth riɛm de miɔ̈c de mät ë yïk kɔ̈u.

¹⁴ Ku yïïŋ de maläŋ cï gäm Bɛ̈nydït aa tɔ̈u në kaam de yïïŋ cï piac looi kekë Luaŋdït, go Aɣadh yïïŋ de maläŋ tääu biäk të lɔ rut de yïïŋ cï piac looiyë.

¹⁵ Na wën, ke melik Aɣadh ë yöök Yuria bɛ̈ny de kake Nhialic an: “Ye lui në yïïŋ dïïtë nɔm, nyop miɔ̈c ye nyop ëbɛ̈n miäk thïn, ku miɔ̈c athɛ̈i de rap, ku miɔ̈c ye nyop ëbɛ̈n, ku miɔ̈c athɛ̈i, ku miɔ̈c de melik, ku miɔ̈c de kɔc ëbɛ̈n, ku miɔ̈c ye dek. Ku wälë nɔm rim ke miɔ̈c ye nyop ëbɛ̈n në yïk kɔ̈u ëbɛ̈n. Ku yïŋ de maläŋ abï aa këdiën yan cɔ̈ɔ̈r.”

¹⁶ Go Yuria bɛ̈ny de kake Nhialic looi cït kë cïï melik lɛ̈k en.

¹⁷ Go melik Aɣadh thɛ̈k ke maläŋ de cök wään nu ë Luaŋdïtic nyaai ku jöt thɛ̈k bei në kenïïm. Go lɔ̈ɔ̈rdïït ë maläŋ ee rëër në miöör dït ke maläŋ kɔ̈ɔ̈th kathiëër ku rou bɛ̈ɛ̈i bei në miöör kɔ̈ɔ̈th, ku tɛ̈ɛ̈u në kuur kɔ̈u.

¹⁸ Në biäk bïï yen melik de Athiriya tɔ mit piɔ̈u, go Aɣadh të ye melik rëër ë Luaŋdïtic nyaai, ku thiöök kueer de Thabath ɣɔn ye melik tëëk thïn ke lɔ Luaŋdït.

¹⁹ Këriëëc ëbɛ̈n cï melik Aɣadh looi, acï ke gɔ̈ɔ̈r në Awerek de kathɛɛr ke Meliik ke Juda yiic.

²⁰ Go Aɣadh thou, go tɔ̈ɔ̈u ë rɛ̈ŋ ke meliik yiic Pänydït de Debid, go Ɣedhekia wënde lɔ në nyinde yic ke ye melik.