2 Mel 12 - JAM DE NHIALIC 2011

Melik Jowac de Juda

¹ Na ɣɔn aa cï Jeɣu melik de Yithriɛl run aa dhorou në bäänyic, go Jowac aa melik ë Juda, go bääny muk ë Jeruthalem në run kathiërŋuan. Man acɔl Dhibia në Biirceba.

² Ku Jowac në pïïr de yic ëbɛ̈n, aaye këpiɛth looi në Bɛ̈nydït nɔm, në biäk ë ye Jeɣoyada bɛ̈ny de kake Nhialic yen jääm.

³ Ku yen aa kën ɣään thöny guɔ riɔ̈ɔ̈k ayadäŋ, ku kɔc aake ŋoot ke ke ye miɔ̈c näk lɔ gam, ku wal ŋïr ke tool ëtɛ̈ɛ̈n.

⁴ Go Jowac bäny ke kake Nhialic yɔ̈ɔ̈k an, bïk wëu kueet, ayï ka ke miɔ̈c ɣeriic ye bɛ̈ɛ̈i Luaŋdït, ayï miɔ̈c de aköölnyïïn, ku miɔ̈c de miɛtëpiɔ̈u cï bɛ̈ɛ̈i.

⁵ Bɛ̈ny de kake Nhialic ëbɛ̈n, acï tääu në ye yeth, yen luɔi bïï yen wëu ke kɔckɛn lui döt, ku wëu bïï ke ɣään kɔɔr luɔi cï tïŋ Luaŋdïtic aa looi.

⁶ Ku na ɣɔn aa lɔ run ke Jowac aa thiërrou ku diäk në bäänyic, ku ŋoot bäny kake Nhialic ke ke kën Luaŋdït piir.

⁷ Go Jowac Jeɣoyada caal ɣöt, ku bäny ke kake Nhialic kɔ̈k, ku jɔ ke thiëëc an, “Eeŋö kën wek Luaŋdït piir? Gɔl ënɔɔnë le tueŋ, duökï wëu ee bɛ dɔm tëde kɔckuön luööikï, gamkï ke bïï ke Luaŋdït piir.”

⁸ Go bäny ke kake Nhialic gam kedhie, nɔn cïï kek wëu bï bɛ dɔm tëde kɔc, ku cïkï Luaŋdït bï bɛ piir në kek.

⁹ Ku ëtɛ̈ɛ̈n go Jeɣoyada Athänduk nööm, ku lui të thiin ɣɔ̈ɔ̈r në yenɔm, ku tɛ̈ɛ̈u në yïk lɔ̈ɔ̈m biäk cuëëc të ye kɔc lɔ ë Luaŋdït. Ku bɛ̈ny de kake Nhialic ee luɔi looi në ee köölë, abï wëu cïï kɔc läŋ ë Luaŋdït yic gam tääu thïn ëbɛ̈n.

¹⁰ Na lek wëu tïŋ ke ke cï juëc në athändukic, ke raan ee këriëëc de melik gɔ̈ɔ̈r nyin bɔ̈ kekë bɛ̈nydïït ë kake Nhialic, ku kuenkï ke, ku dutkï wëu cï yök ë Luaŋdït yic në anyɔŋɔɔ.

¹¹ Na cïk thëmden gɔ̈ɔ̈r, ke abï ke jɔ gäm bäny ke kɔc loi luɔi de pïr ë Luaŋdït yic, ku abïï ke kɔc ee tiim guaŋ ku kɔc yïk Luaŋdït aa riɔp thïn,

¹² ku kɔc yïk päny, ku kɔc guaŋ kur, ku ɣɔɔcë ke tiim, ku kur täc pätiic bïï ë Luaŋdït piir, ku këriëëc bï ë luɔide nööm ëbɛ̈n.

¹³ Acïn wënh cï gäm luɔi de abïïny ke ateek, ku guöl, ku kɛŋ, ku nɔn ee kuc ye ke manyëalath cäp thar thïn, ayï këriëëc ë loi ateek ku nɔn adhääp.

¹⁴ Në biäk cïï wëu gäm kɔc ke luɔi de pïr ë Luaŋdït, ku ɣɔɔcë ke kake luɔi de Luaŋdït.

¹⁵ Ku kɔc tɔ̈u ë luɔi në kecin, aake ye kɔc adööt, ka yen acïn en raan cï ke thiëëc në kueer cï kek wëu ke luɔi de Luaŋdït gäm kɔc ke luɔi.

¹⁶ Wëu cï gam në biäk de miɔ̈c de awäc, ku wëu cï gam në biäk de miɔ̈c de kërac ke kɔc, aake cie mat nïïm në athänduŋ tök yic, aake ye gäm bäny ke kake Nhialic.

¹⁷ Në ë aköölkë, ke Ɣadhiɛl melik de Thiriya lɔ wun ë Gath, ku thɔ̈ɔ̈r ke keek, ku dɔm, ku na wën aa le e nyin wɛ̈l Jeruthalem bï ke mak,

¹⁸ melik Jowac de Juda, acï ajuëër ëbɛ̈n nööm, ku gɛm ke, ka ɣɔn cïï kuarken meliik ɣɔn kɔn bɛ̈n në yenɔm tueŋ gäm Bɛ̈nydït, yï Jeɣocapat, ku Jeɣoram, ku Aɣadhia, ku gɛm këriëëc cï juaar ëbɛ̈n, ku mɛt miɔ̈cde thïn, ku adhäm ë yök ke cï tɔ̈ɔ̈u Luaŋdït, ku ɣön ë melik, ku tooc ke ëbɛ̈n ke ke ye miɔ̈c de miɛtëpiɔ̈u de melik Ɣadhiɛl de Thiriya. Go Ɣadhiɛl Jeruthalem nyääŋ piny ke cïï be mɛk.

¹⁹ Këriëëc cï melik Jowac looi ëbɛ̈n, acï ke gɔ̈ɔ̈r në Awerek de kathɛɛr ke Meliik ke Juda yiic.

²⁰ Go kɔc ee melik Jowac luööi, luöi kiɛɛr rac, gokï Jowac nɔ̈k ɣön de Milo, në kueer ee lɔ wut baŋ të lɔ Thila.

²¹ Aa ye yï Jodhakar wën de Cimiith ku Jeɣodhabad wën de Comer, kɔc ee ye luööi kek aake näk en abï thou. Gokï tɔ̈ɔ̈u në wärken ë Pänydït de Debid yic, go Amadhia wënde lɔ në nyinde yic ke ye melik.