2 Mel 1 - JAM DE NHIALIC 2011

Elija ku Melik Aɣadhia

¹ Në thon ë melik Aɣap de Yithriɛl cök, go kɔc ke Mowap Yithriɛl rɛɛc ë tɔŋ.

² Ku Aɣadhia melik de Yithriɛl acï lööny piny ɣöndɛn nu nhial nɔm ë Thamaria, go tɔ̈c piny ke de guöp juäi, go tuuc tooc bïk Baaldhebub, yanh ë Pilithiin tɔ̈u wutic ë Ekeron lɔ luɔp na bïï guöp pial në ë jɔŋë, ku nɔn cïï guöp bï pial.

³ Ku tunynhial ë Bɛ̈nydït acï lɛ̈k Elija raan ë Ticibe bïï lɔ rɔ̈m kekë tuuc ke melik Aɣadhia, ku bïï keek thiëc an, “Eeŋö ee week tɔ lɔ tëde Baaldhebub yanh ë Ekeron? Ee biäk cïn en Nhialic nu në Yithriɛl?

⁴ Ku ënɔɔnë acï Bɛ̈nydït lueel an, ‘Biöŋ cï yïn lɔ në yenɔmë, yïn cï rɔt bï jɔt thïn, yïn bï thou ë yic!”’ Go Elija looi cït man cïï Bɛ̈nydït e yɔ̈ɔ̈k.

⁵ Ago tuuc kenïïm pɔ̈k melik, go melik ke thiëëc an, “Eeŋö guɔ wek röt lɔ puk?”

⁶ Gokï pɔ̈k nɔm en an, “Ade raan cï rɔ̈m ke wook, ku lɛ̈k wook an, ‘Pɔ̈kkï röt melik cï we tooc, ku lɛ̈kkï yen an, ‘acï Bɛ̈nydït lueel an ee luɔi cïn en Nhialic nu në Yithriɛl yen tɔ yï tuc kɔc Baaldhebub yanh ë Ekeron, bïk lɔ luɔp? Në biäk de ee kënë, biöŋ cï yïn lɔ në yenɔmë, yïn cï rɔt bï jɔt thïn, yïn bï thou ë yic!”’

⁷ Go lɛ̈k keek an, “Ee ë raan cït ŋö, yen ë räm ke week ku lëk week ee kënë?”

⁸ Gokï bɛ̈ɛ̈r an, “Yen aa ceŋ lupɔɔ cï looi në biök ke läi, ku acï yeyic duut në thiööth.” Go melik mɛɛk nɔm, an “Elija raan ë Ticibe!”

⁹ Go bɛ̈ny ë rem de tɔŋ tuɔɔc kekë kɔc kathiërdhïc bïk Elija lɔ bɛ̈ɛ̈i, go bɛ̈ny ë rem de tɔŋ ye lɔ yök ke rɛ̈ɛ̈r në kuur nɔm, ku lëk en an, “Raan de Nhialic, yïn cï melik yɔ̈ɔ̈k an, bä piny.”

¹⁰ Go Elija bɛ̈ɛ̈r an, “Na ya raan de Nhialic, ke mac ë bɔ̈ paannhial ku nɛ̈k yï wekë kɔcku kathiërdhïc!” Go mac ja guɔ lööny piny nhial ku nɛ̈k bɛ̈ny ë rem de tɔŋ kekë kɔcke kathiërdhïc.

¹¹ Go melik bɛ̈ny ë rem de tɔŋ de thiërdhïc däŋ bɛ tuöc en kekë kɔc kathiërdhïc, ku lueel an, “Raan de Nhialic yïn cï melik yɔ̈ɔ̈k an, bäär bɛ̈n piny!”

¹² Go Elija bɛ̈ɛ̈r an, “Na ya raan de Nhialic, ke mac ë bɔ̈ piny paannhial ku nɛ̈k yï wekë kɔcku kathiërdhïc!” Go many de Nhialic guɔ lööny piny paannhial ku nɛ̈k kekë kɔcke kathiërdhïc.

¹³ Na wën ke melik ë be bɛ̈ny ë rem de tɔŋ ee kek diäk bɛ tuöc en kekë kɔcke kathiërdhïc, go lɔ nhial në kuur nɔm, ku cuɛt rɔt piny ku tuk e miɔl në Elija nɔm, ku lïm ke cï röt kuɔɔr piny an, “Raan de Nhialic yïn läŋ bä wëikï pɔ̈l ku wëi ke lïïmku kathiërdhïc!

¹⁴ Tïŋ mac ëbɛ̈n piny paannhial, ku nɛ̈k bäny ke rem de tɔŋ tueŋë kaarou në thiërdhïcken. Ku ënɔɔnë ë ya yök dhuëëŋ de piɔ̈u tëde yïn!”

¹⁵ Go tunynhial ë Bɛ̈nydït lɛ̈k Elija, an, “Lɔ piny we yen, du riɔ̈c në yen.” Go Elija lɔ piny kekë bɛ̈ny ë rem de tɔŋ, ku lekkï tëde melik,

¹⁶ ku lëk en an, “Acï Bɛ̈nydït lueel an, ‘Në biäk cïï yïn tuuc tuɔɔc bïk Baaldhebub yanh de Ekeron lɔ luɔp, ee luɔi cïn en Nhialic nu në Yithriɛl duëër yïn wëlke luɔp? Në biäk de ee kënë, yïn cïï rɔt bï jɔt në biöŋ cï yïn lɔ në yenɔmë, yïn bï thou ë yic!”’

¹⁷ Na wën ke Aɣadhia thou cït man cï Bɛ̈nydït e lueel në Elija thok. Aɣadhia aa cïn nɔm mɛnh moc, go mänhë Joram lɔ në nyinde yic ke ye melik, në ruöön ɣɔn ye Jeɣoram wën ë Jeɣocapat, melik de Juda run rou.

¹⁸ Këriëëc cï Aɣadhia looi ëbɛ̈n, acï ke gɔ̈ɔ̈r në awereek de kathɛɛr ke meliik ke Yithriɛl yiic.