2 Lëk 9 - JAM DE NHIALIC 2011

Këny de Tiiŋ Melik de Ceba

¹ Na ɣɔn aa piŋ tiiŋ melik de Ceba kɛk de Tholomon, go jɔ keny ke lɔ Jeruthalem ke bï melik Tholomon lɔ them në ka ril yiic arëët. Ago bɛ̈n kekë kɔckɛn ee ye luööi ku thɔ̈rɔ̈ɔ̈l juëc ɣɛ̈ɛ̈c adhääp, ku ateek, ku kuur läk. Na wën aacï jɔ rɔ̈m kekë Tholomon go luɔp në loop juëc tɔ̈u ë yenɔm.

² Go Tholomon wël ke puk nïïm kedhie, ku acïn kë töŋ cï yen bɛ̈n dhal ë bɛ̈ɛ̈r.

³ Tiiŋ melik de Ceba acï pɛlënɔm de Tholomon piŋ, ku tïŋ ɣön ë bääny cï yïk.

⁴ Ku tïŋ kuïn ye gam në pamde nɔm, ku tëde rëër ë bänyke, ku kïït de ɣön ë bääny kekë lupɔɔ ke luɔi ye keek cieŋ, ku lupɔɔ ye kɔc ee lui tëde dhuëëŋ cieŋ, ku miɔ̈c ye nyop ëbɛ̈n ye gam ɣön ë Bɛ̈nydït. Acï yen tɔ gäi aläl.

⁵ Na wën ke lëk melik an, “Ka cä piŋ pinyda në biäkdu, ku luɔi ëbɛ̈n ku pɛlënɔmdu ayek yïth!

⁶ Yɛn aa kën kë cïk lɛ̈k ɛn gam, aɣet të cän bɛ̈n bä ke bɛ̈n tïŋ ë yɛn guöpdï. Acakaa biäk de pɛlënɔmdu aa kɛ̈n piŋ. Yïn pɛlënɔm aläl awär kë ye kɔc lueel.

⁷ Kɔc luui ee yïn luööi acïk gup miɛt, ku kɔc ee tɔ̈u ë yïlɔ̈ɔ̈m aköölnyïïn, kɔc mit gup në pïŋ ye kek pɛlënɔmdu piŋ!

⁸ Pianykï Bɛ̈nydït Nhialicdu! Acï yïn nyuöth miɛt ë piɔ̈nde në luöi cï yen yïn tɔ ee melik, bä bääny muk ë rinke. Në biäk nhiɛɛr en kɔckɛn ke Yithriɛl ku akɔɔr bïï keek muk aɣet thɛɛr, acï yïn tɔ ee melikden ke yï bï yic aa looi kekë piathëpiɔ̈u.”

⁹ Go melik de Ceba melik Tholomon gäm miɔ̈c cï bɛ̈ɛ̈i, ka wär aguum kaŋuan 4000 de kilɔɔ ke adhääp, ku kuur läk kekë wal ŋïïr juëc arëët. Acïn wal ŋïïr läk cït ee kake cï bɛ gäm melik Tholomon, ka wär ka cï ë tiiŋ melik de Ceba gäm en.

¹⁰ (Kɔc ke melik Ɣiram ku lɔ kɔc ke Tholomon wään bïï adhääp në Opir, acïk tiim ke juniper ku kuur läk bɛ̈ɛ̈i aya.

¹¹ Go Tholomon tiim looi ke ke ye kueer ye kɔc lɔ nhial Luaŋdït kekë ɣöndɛn ë bääny, ku looi thom ku aruöör ye ë ket në tiim. Acïn kë cït ee kënë cï kɔn tïŋ piny de Juda.)

¹² Go melik Tholomon tiiŋ melik de Ceba gäm këriëëc kɔɔr ëbɛ̈n. Mɛt kekë ka cï gäm keek en wɛɛr en ke miɔ̈c wään cï yiɛ̈n en. Na wën ke jɔ yenɔm pɔ̈k piny de Ceba kekë kɔc ee yen luööi.

Kuɛth de Melik Tholomon

¹³ Në ruöön thok ëbɛ̈n melik Tholomon aaye yiɛ̈n aguum kathiërrou ku diäk 23,000 de kilɔɔ ke adhääp,

¹⁴ mat keek në ka ye juaar tëde kɔc ee ɣööc ku kɔc ee käŋ ɣaac. Meliik ke Arabia ku bäny ke wuöt ke Yithriɛl ayek yen yiɛ̈n atek ku adhääp aya.

¹⁵ Melik Tholomon acï bot kaarou ke kööt dït looi, tök në keyiic acï kum kɔ̈u në kilɔɔ kadhorou de adhääp cï deŋ,

¹⁶ ku looi bot kadiäk ke kööt kor, tök në ke yiic acï kum kɔ̈u në kilɔɔ kadiäk de adhääp cï deŋ. Ku acï keek tɔ̈ɔ̈u kedhie ɣön dïït cï looi ë roor de Lebanɔn yic.

¹⁷ Ku melik acï rɔt luöi thöny de rëër aya, thöny cï looi në tuŋ ke akɔ̈ɔ̈n, ku kum kɔ̈u në adhäm awai.

¹⁸ Akem kadhetem kek ee raan lɛɛr nhial ë thööc nɔm, ku ade kɔm cï nuat ë yekɔ̈u, acï kum kɔ̈u në adhääp. Ku thööc ade nɔm ka ye raan ke yeciin kan në biäk kaarou, ku köör acï giɛɛt ë biäk kedhie.

¹⁹ Ku giɛɛt de kɔ̈ɔ̈r kathiëër ku rou anukï tëde akem cï tääu të ye kɔc lɔ nhial, tök anu ë biäk töŋ de akem. Acïn thööc cït ee kënë cï kɔn looi në ciɛɛŋ kɔ̈k yiic.

²⁰ Abïïny ke melik Tholomon kedhie acï ke cuëëc në adhääp, ku aduuk kedhie nu ɣön dïït nu ë roor de Lebanɔn yic, acï keek looi në adhäm awai. Ateek aaye tïŋ ke cïn naamde në akööl ke Tholomon.

²¹ Melik Tholomon aa de nɔm abëël wïïr juëc ee lɔ Tarcic, ayek cath në abëël wïïr ke melik Ɣiram. Na cï run kadiäk wan abëël wïïr ayek kenïïm pɔ̈k ciëën në Tarcic, ke ke bïï adhääp, ku atek, ku tuŋ ke akɔ̈ɔ̈n, ku agaŋ jak, ku agaŋ lok.

²² Melik Tholomon aa kueth ku aa pelnɔm awär meliik ke piny nɔm ëbɛ̈n.

²³ Kɔc juëc ayek bɛ̈n tëde yen, bïk pɛlënɔm cïï Nhialic gäm yen bɛ̈n piŋ.

²⁴ Në ruöön thok ë bɛ̈n, raan ëbɛ̈n në ke yiic aa ye miɔ̈cde bɛ̈ɛ̈i, ku gëm Tholomon wëu ke ateek ku adhääp, ku lupɔɔ, ku wëu ke tɔŋ, ku mer, ku jöŋgöör.

²⁵ Melik Tholomon aa de nɔm aguum kaŋuan 4000 de abëël ke tɔŋ kekë jöŋgöör, ku ade nɔm aguum kathiëër ku rou 12,000 de jöŋgöör ee thɔ̈ɔ̈r. Acï kɔ̈k tɔ piɔ̈ɔ̈t ë Jeruthalem ku tɛ̈ɛ̈u kɔ̈k në pɛ̈ɛ̈nydït kɔ̈k yiic ëbɛ̈n.

²⁶ Tholomon aaye melik dït aläl në meliik nïïm, gɔl në piny nu ë wɛ̈ɛ̈r ë Yuparat kekë Pilithiin leer në aken de Rip.

²⁷ Ɣɔn tɔ̈u yen ë bääny yic ateek agäk ë Jeruthalem cï man ë kɔɔi, ku tim de thidar aa gäk cï tiim ke ŋaap piny de Juda.

²⁸ Melik Tholomon aaye jöŋgöör lɔ ɣɔɔc Rip ku në wuöt kɔ̈k yiic ëbɛ̈n.

Täu de Bääny ë Tholomon

²⁹ Ku këriëëc ëbɛ̈n cï Tholomon looi, gɔl tueŋ leer ciëën, acï ke gɔ̈ɔ̈r në awerek de kathɛɛr ke tiët Nathan yic, ku në cäär de Aɣija raan wun ë Cilo yic, ku në nyuuth ke Yido monydaai yic, ku ajam aya në biäk de bääny de Jerobowam wën de Nebat melik de Yithriɛl.

³⁰ Tholomon aaye melik de Yithriɛl ëbɛ̈n ë Jeruthalem në run kathiërŋuan.

³¹ Go Tholomon thou, go tɔ̈ɔ̈u ë pänydït de Pänydït de Debid yic, ago Reɣobowam wënde lɔ në nyinde yic ke ye melik.