2 Lëk 8 - JAM DE NHIALIC 2011

Ka cï Tholomon Ke Looi

¹ Na ɣɔn cï run kathiërrou thök, go Tholomon Luaŋdït kekë ɣöndɛn ë bääny thöl ë yïk.

² Acï wuöt ɣɔn cïï melik Ɣiram gäm en nyɔk ë yïk, ku tooc kɔc ke Yithriɛl bïk lɔ ceŋ thïn.

³ Na wën ke Tholomon ë pec piny de Ɣamath ku Dhoba

⁴ ku yïk Tadmor tɔ̈u në jɔ̈ɔ̈ric. Ku be pɛ̈ɛ̈nydït ke Ɣamath nyɔk ë yïk, të wään ye ë käŋ tääu thïn.

⁵ Go Tholomon ee pɛ̈ɛ̈nydïtkë nyɔk ë yïk, Bethɣaron tɔ̈u të thöny, ku Bethɣaron tɔ̈u të thuth (ee pɛ̈ɛ̈nydït cï gël kedhie ku dekï athïïn ril),

⁶ pänydït de Baalath ku lɔ pɛ̈ɛ̈nydït ye käŋ tɔ̈ɔ̈u thïn, ku pɛ̈ɛ̈nydït ye abëëlkɛn ke tɔŋ kekë jöŋgöör tääu thïn. Ku looi kïïtde ëbɛ̈n në biäk de yïŋ ë Jeruthalem, ku Lebanɔn ku lɔ piny ceŋ ëbɛ̈n.

⁷ Ku kɔc wään cï döŋ kedhie, kɔc cie kɔc ke Yithriɛl, kɔc ke Ɣit, ku kɔc ke Amor, ku kɔc ke Peridh, ku kɔc ke Ɣib, ku kɔc ke Jebuth.

⁸ Në kuatden yic, kɔc wään cï döŋ ë piny yic, kɔc kën ë kɔc ke Yithriɛl keek nɔ̈k. Acï ë Tholomon ke luööi në riɛl, ku yen ee luɔiden agut cï ënɔɔnë.

⁹ Ku Tholomon akën kɔc ke Yithriɛl tɔ lui ë riɛl, acï ke tɔ lui ke ke ye rem de tɔŋ, ku bäny ke rem de tɔŋ, ku bäny ke abëël ke tɔŋ, ku kɔc ë jöŋgöör kuaath.

¹⁰ Ku Tholomon acï bɔt kaarou ku thiërdhïc (250) de bäny ke kɔc lui kuany, bïk kɔc lui aa tïŋ në ɣään ke luɔi yic ëbɛ̈n.

¹¹ Go Tholomon tiiŋde nyan ë melik de Rip jɔt Pänydït de Debid, leer ɣön cï yiɛ̈k en. Ku lueel an, “Acïï bï dhil ceŋ ɣön de bääny ë Debid melik de Yithriɛl, në biäk yen të cï athänduŋ de män ë Bɛ̈nydït kɔn tɔ̈u thïn, acï aa të ɣer yic.”

¹² Go Tholomon Bɛ̈nydït gäm miɔ̈c ye nyop ëbɛ̈n në yïïŋ cï yïk në Luaŋdït nɔm tueŋ.

¹³ Ku gɛm miɔ̈c ye nyop ëbɛ̈n cït man ë kë cï lööŋ ke Mothe lueel në kööl ɣer yiic ëbɛ̈n. Akööl ke Thabath, ku akööl ke pɛɛi ë piɛc wil, ku akööl ke dhuëëŋ kadiäk: kööl de Dhuëëŋ de Kuïn Cïnic Luɔu, ku kööl de dhuëëŋ de Tem, ku kööl de Dhuëëŋ de Kɛ̈ɛ̈t.

¹⁴ Në baŋ kuany en lööŋ cïï Debid wun keek tääu piny, go luɔi de bäny ke kake Nhialic guiir, ku Lebai ee bäny ke kake Nhialic kuɔny në diɛt ke alɛɛc ku luɔi. Ku guïïr kɔc ee kal tiit thok në täu bïï kek luɔi aa looi aköölnyïïn kedhie, në kɛ̈l thook ëbɛ̈n, cït man ë kë cï Debid looi raan de Nhialic.

¹⁵ Ku ka cï Debid ke lueel kedhie lëk ke bäny ke kake Nhialic ku Lebai në biäk de ɣööt ye käŋ tääu thïn ku lɔ kɔ̈k acï keek looi apiɛth.

¹⁶ Luɔi de Tholomon acï jɔ thök ëbɛ̈n. Gɔl të ɣɔn keer ë Luaŋdït yic agut cï thökde, luɔi acï thök ëbɛ̈n apiɛth.

¹⁷ Na wën ke Tholomon ë lɔ Edhiongeber ku Elath, wuöt nu ë Wɛ̈ɛ̈r Thith yɔu, piny de Edom.

¹⁸ Go melik Ɣiram tuöc abëël wïïrke, ke ke kuɛɛth bänyken ke rem de tɔŋ, kɔc ŋic gɛ̈ɛ̈r. Gokï lɔ wïïr në bäny ke rem de tɔŋ de Tholomon ëtök, lekï piny de Opir, ku lek melik Tholomon yiɛ̈n ka wär bot kathiëër ku dhïc 15,000 de kilɔɔ ke adhääp.