2 Lëk 7 - JAM DE NHIALIC 2011

Gɛm de Luaŋdït

¹ Na wën cï Tholomon thök ë lɔ̈ŋ, go mac löny nhial ku nyop miɔ̈c wën cï gam, ku thiäŋ riau de dhuëëŋ de Bɛ̈nydït Luaŋdïtic.

² Go ciën të tëëk ë bäny ke kake Nhialic në luɔi cï riau de dhuëëŋ ë Bɛ̈nydït Luaŋdït thiɔ̈ɔ̈ŋic.

³ Na wën cï mïth ke Yithriɛl mac tïŋ ke löny nhial ku thiäŋ ɣɛɛr Luaŋdïtic, gokï kenïïm guöt piny, ke ke lam Bɛ̈nydït, ku leckï nɔm ku piɔnykï an, “Yen apiɛth, ku nhiëërdɛn agɔk atɔ̈u athɛɛr.”

⁴ Go Tholomon kekë kɔc kedhie miɔ̈c jɔ gam.

⁵ Go Tholomon aguum kathiërrou ku rou 22,000 de ɣɔ̈k gam, ku aguum bɔt ku thiërrou 120,000 de amɛ̈l ke ye miɔ̈c de mät. Gokï ɣön ë Nhialic jɔ gam ëtɛ̈ɛ̈n yen kekë kɔc kedhie.

⁶ Go bäny ke kake Nhialic kɔ̈ɔ̈c tëdɛn cï nyuöth keek, ku jɔ kɔc ke Lebai kenïïm wɛ̈l keek, ke ke lec Bɛ̈nydït nɔm në kake kiët ka wään bï melik Debid ke bɛ̈ɛ̈i ku ket diɛt an, “Nhiëërdɛn agɔk atɔ̈u athɛɛr!” Go bäny ke kake Nhialic kɛŋ kooth ke ke rek röt piny në Lebai, go kɔc ke Yithriɛl kɔ̈ɔ̈c kedhie.

⁷ Ago Tholomon pëëric cil guiir gam, ku guiir biäk tueŋ de Luaŋdït, ku jɔ miɔ̈c ye nyop ëbɛ̈n gam ëtɛ̈ɛ̈n, ku miɔ̈c ë rap, ku kɔɔl ke miɔ̈c de mät. Aa loi ee kënë në biäk cïï yïïŋ de maläŋ cï looiyë ee miɔ̈ckë duëër jɔt kedhie.

⁸ Na wën ke Tholomon kekë kɔc ke Yithriɛl kedhie ë ke loi Dhuëëŋ de Kɛ̈ɛ̈t në nïn kadiäk. Aa ye akutnɔm dïït de kɔc ë bɔ̈ tëmec, kɔ̈k aake bɔ̈ në kueer de Ɣamath të lɔ rut, ku bɔ̈ kɔ̈k në aken de Rip nɔm të lɔ wöuwic.

⁹ Acïk nïn kadhorou thöl në gɛm de yïk, ku thölkï nïn kɔ̈k kadhorou në biäk de dhuëëŋ. Ku në kööl de bɛ̈t ke amatnɔm ë jɔ dhuëëŋ de thök thöl,

¹⁰ na ɣɔn ë kööl de rou, në kööl de thiërrou ku diäk ë pɛɛi de dhorou, go Tholomon kɔc jɔ tɔ lɔ ë bɛ̈iken yiic. Aake mit piɔ̈ɔ̈th në biäk de athiɛɛi cïï Bɛ̈nydït gäm kɔckɛn ke Yithriɛl ëbɛ̈n, ku Debid, ku Tholomon.

Nhialic Abe Tuöl Tëde Tholomon

¹¹ Na ɣɔn cï melik Tholomon Luaŋdït kekë ɣön ë bäänyde thöl ë luɔɔi, ku tiëm apiɛth ë luɔide yic.

¹² Go Bɛ̈nydït tuöl tëde yen wakɔ̈u. Go lëk en an, “Yɛn cï lɔ̈ŋdu piŋ, ku gam Luaŋdït bïï aa kë bïï ë Yɛn aa gäm miɔ̈c thïn.

¹³ Të cän deŋ tɔ kääc nhial, ku cä we tuöc kɔyɔm bïï rɛɛpkun bɛ̈n riɔ̈ɔ̈k, ku nɔn ee juäi yen cä tuöc kɔckï,

¹⁴ na lɔ kɔckiën cï cɔɔl ë rinkï röt kuɔɔr piny, ku pukkï kepiɔ̈ɔ̈th, ku lɛ̈ŋkï ke ke kɔɔr yɛn, ku pɛ̈lkï awɛ̈ɛ̈cken, abä piŋ paannhial, ku yɛn bï awɛ̈ɛ̈cken päl keek, ku ta duumken lok në rap.

¹⁵ Yɛn bï Luaŋdït aa woi, ku yɛn bï lɔ̈ŋ ye gam ee tënë aa piŋ ëbɛ̈n,

¹⁶ në biäk cän ee tënë lɔc ku thiɛɛi ke ee të bïï ë yɛn aa lam thïn aɣet athɛɛr. Abä aa woi ku gël akööl yiic ëbɛ̈n.

¹⁷ Na lɔ Ya lɔ luööi në piɔ̈n adöt cït man cï ë wuur Debid ye looi, ku riëëuwë lööŋkï, ku loi këriëëc cä lueel ëbɛ̈n,

¹⁸ Yɛn bï gutguut cä luöi wuur Debid looi, wään lɛ̈k Ɛn en an, kɔc ke Yithriɛl abï kuatdu keek aa wat ë ceŋ.

¹⁹ Ku na lak lööŋkï dhoŋ kɔ̈ɔ̈th wek ë kɔcku, ku lak yiëth kɔ̈k lɔ lam,

²⁰ ke wek bä nyaai piny cä gäm week, ku Yɛn bï Luaŋdït cä thieeiyë ke ee të bï ë Yɛn aa lam thïn nyääŋ piny. Abï kɔc ke wuöt ëbɛ̈n kääŋ aa lueel ku dɔl guöp, ku yek looi arac.

²¹ “Ku ënɔɔnë Luaŋdït arïïuwë guöp aläl, ku kɔc bï tëëk abïk aa gäi ku luelkï an, ‘Eeŋö lui ë Bɛ̈nydït kë cït ee kënë ee pinyë kekë Luaŋdït?’

²² Ku abïï ë kɔc puk nɔm an, ‘Ee luɔi cïï kek Bɛ̈nydït Nhialicden pɔ̈l, raan wään bïï kuarken bei ë Rip. Acïk yiëth kɔ̈k lɔ lam. Yeka cïï ë Bɛ̈nydït ee riäŋë tuöc keek.”’