2 Lëk 6 - JAM DE NHIALIC 2011

Tholomon Ajiëëm Kɔc

¹ Go melik Tholomon lɔ̈ŋ an, “Bɛ̈nydït acï lɔc nɔn bïï yen tɔ̈u ë luäät yiic ku mɔ̈ɔ̈th yic.

² Ënɔɔnë Yïn cä yiɛ̈k Luaŋdïït piɛth, të bïï yïn ceŋ thïn aɣet athɛɛr.”

³ Go melik e nɔm wɛ̈l amatnɔm de Yithriɛl wën kääc ë yelɔ̈ɔ̈m ëbɛ̈n, ku thiëëc Nhialic bïï amatnɔm de Yithriɛl ëbɛ̈n thieei.

⁴ Na wën ke lueel an. “Pianykï Bɛ̈nydït, Nhialic de Yithriɛl! Acï gutguutdɛn cï lɛ̈k wäär Debid döt, wään lëk en en an,

⁵ ‘Gɔl të wään bɛ̈ɛ̈i Yɛn kɔckï bei ë Rip agut cï ënɔɔnë, acïn pänydïït töŋ cä lɔc piny de Yithriɛl, ke ee të bïï Luaŋdït yïk thïn bï ë Yɛn aa lam, ku acïn raan töŋ cä lɔc bïï dhiëën ke Yithriɛl wat.

⁶ Ku ënɔɔnë Yɛn cï Jeruthalem lɔc ke ee të bïï ë Yɛn aa lam thïn, ku lac Debid, bïï kɔckï wat.”’

⁷ Go ë Tholomon lueel an, “Ku aacï wäär Debid guiir nɔn bïï en Luaŋdït yïk, bïï ë Bɛ̈nydït, Nhialic de Yithriɛl aa lam thïn,

⁸ go Bɛ̈nydït wäär yɔ̈ɔ̈k an, ‘Yïn de nɔm yic luɔi kɔɔr yïn ë yïpiɔ̈u bä Yɛn yiɛ̈k ɣöt,

⁹ ku acie yïn bï Luaŋdït yïk, ee wëndu yen abï yen yïk, mɛnh bä dhiëëth en abï Luaŋdïïtdï yïk.’

¹⁰ “Ënɔɔnë Bɛ̈nydït acï gutguutde döt: yɛn cï nyin de wäär dɔm ke ya ye melik de Yithriɛl, ku yɛn cï Luaŋdït yïk, të bïï ë Bɛ̈nydït, Nhialic de Yithriɛl aa lam thïn.

¹¹ Yɛn cï athänduŋ de män ë Bɛ̈nydït tääu thïn, kë de yic pɛɛm ke löŋ cïï Bɛ̈nydït mac kekë kɔc ke Yithriɛl.”

Lɔ̈ŋ de Tholomon

¹² Na wën ke Tholomon ë kääc ë yïïŋ de Bɛ̈nydït nɔm në amatnɔm de Yithriɛl nɔm ku jɔt yecin nhial ke läŋ.

¹³ (Tholomon aacï të ye kɔc kɔ̈ɔ̈c looi ë maläŋ ku tɛ̈ɛ̈u ë pëëric cil. Aa ye bɛ̈ɛ̈rde mitïïr kaarou ku biäk, ku bɛ̈ɛ̈rde ke lɔ nhial ee mitïr ku biäk. Go lɔ në këde kɔ̈ɔ̈c nɔm nhial, ku tuk yemiɔl ke woi amatnɔm de Yithriɛl ëbɛ̈n, ku jɔt yecin nhial.)

¹⁴ Ku lɛ̈ŋ an, “Bɛ̈nydït Nhialic de Yithriɛl, acïn Nhialic däŋ cït Yïn paannhial ku piny. Yïn ee löŋduön cï mac we kɔcku muk ku ye keek nyuöth nhiëërduön agɔk të cï kek Yï riëëu në kepiɔ̈ɔ̈th ëbɛ̈n.

¹⁵ Yïn cï gutguut cï looi wekë wäär Debid muk, ee köölë wël cï lueel ë gutguut yic acïk aa yic.

¹⁶ Ku ënɔɔnë Bɛ̈nydït, Nhialic de Yithriɛl, muk gutguut wään bä lɛ̈k wäär Debid an, yïn bï nɔm aa dɛ raan töŋ de dhiëndu bï lɔ̈ɔ̈k aa melik de Yithriɛl, të le kek aa kɔc ee lööŋku riëëu apiɛth cït man cï yen ye looi.

¹⁷ Ku ënɔɔnë Bɛ̈nydït, Nhialic de Yithriɛl, tɔ këriëëc ëbɛ̈n cï yïn gutguut luöi lïmduön Debid ee yic.

¹⁸ “Ee yic Bɛ̈nydït duëërë rëër ë tök wekë röör ku diäär ë piny nɔm? Ei, acakaa paannhial acï yic lääu arëët arëk abï Yïn lɛɛr, ka Luaŋdït cä yïkë, duëër Yïn jɔ lɛɛr adï?

¹⁹ Bɛ̈nydït Nhialicdï, yɛn ee lïmdu. Piŋ lɔ̈ŋdï ku gämë yɛn kë liɛm tëde Yïn.

²⁰ Woi ee ɣön ë Bɛ̈nydïïtë aköl ku wakɔ̈u. Yïn cï gutguut lueel nɔn yen të bï ë yïn aa lam thïn, ka piŋ lɔ̈ŋdï të wɛl ɛn yanɔm ee ɣön ë Bɛ̈nydïïtë ke ya läŋ.

²¹ Piŋ lɔ̈ŋdï ku lɔ̈ŋ de kɔckuön ke Yithriɛl, të le kek kenïïm wël ee tënë ku lɛ̈ŋkï. Piŋ baaidu paannhial, ku päl ë wook awɛ̈ɛ̈ckuɔ.

²² “Ku na de raan cï awäc luöi raan thiääk ke yen ku cï tɔ luel gutguut, ku bïï ku kuëëŋ lueel gutguutde në yïïŋdu nɔm ee ɣönë yic,

²³ ke yïn bï piŋ paannhial ku loi luɔidu. Ago raan de guöp awäc luöi këtuc rɔ̈ŋ ke yen, ku päl raan ee këpiɛth looi ku thiei cït man ë tän de piathëpiɔ̈nde.

²⁴ “Na cï kɔckuön ke Yithriɛl lɔ tiaam në kɔc ke aterden në biäk de kërac cïk luöi yïn, ku të cï kek röt pɔ̈k yïn Luaŋdït eenë ke ke cï röt kuɔɔr piny, ku läŋkï yïn, në kokëpiɔ̈u päl ë keek awɛ̈ɛ̈cken.

²⁵ Jɔ ke piŋ röt paannhial ku pälë kɔckuön ke Yithriɛl awɛ̈ɛ̈cken, ku dɔ̈kë kenïïm ciëën piny cï gäm keek në kuarken ëtök.

²⁶ “Ku të kën ë deŋ tuɛny në biäk cï kɔcku awäc luöi yïn, ku të cï kek kepiɔ̈ɔ̈th pɔ̈k yïn, ku wëlkï kenïïm Luaŋdït, ku lɛ̈ŋkï yïn ke ke cï röt kuɔɔr piny,

²⁷ Bɛ̈nydït piŋ lɔ̈ŋden paannhial, ku pälë awɛ̈ɛ̈c lïïmku kɔckuön ke Yithriɛl, ku nyuöth ë keek bïk këpiɛth aa looi. Ku Bɛ̈nydït tuöc ë keek deŋ, piny cï gäm keek bï aa këden athɛɛr.

²⁸ “Ku të de yen cɔk, ku nɔn ee yen juäi, ku nɔn de yen kë cï rap riɔ̈ɔ̈k, ku nɔn ee yom rac, ku nɔn yen kɔyɔm, ku nɔn cïï kɔc ke ater keek mak në wuötken yiic, ku nɔn yen riäŋ cï keek yök, ku nɔn ee juän cï keek dɔm,

²⁹ piŋ lɔ̈ŋden. Na de raan de kɔckuön ke Yithriɛl cï piɔ̈u jiɛth në arɛɛm, ku cïk kecin jat nhial në lɔ̈ŋ ke ke wel kenïïm ee ɣön ë Bɛ̈nydïïtë

³⁰ piŋ lɔ̈ŋden. Ye këden piŋ paannhial tëduön rëër yïn thïn, ku päl ë keek awɛ̈ɛ̈cken. Ee Yïn Yïtök yïn aŋic kë ye kɔc tak. Ye ŋɛk luööi cït man ë këdɛn rɔ̈ŋ ke yen,

³¹ ago kɔcku Yïn aa riëëu ku yek yï theek guöp në aköölkɛn pïïr kek ee piny cï gäm kuarkuɔ.

³² “Na lɔ alɛi cëŋ piny mec, ye piŋ nɔn dïït yïn ku yïn ril, ku yïn cie gääu ë kë loi, të le kek bɛ̈n lɔ̈ŋ ee ɣön ë Bɛ̈nydïïtë,

³³ ke yï piŋ lɔ̈ŋden. Paannhial, tëduön rëër yïn thïn, piŋ lɔ̈ŋden, ku gämë keek kë cïk lim tëde yïn, ago kɔc ke piny nɔm yïn ŋic ku riëëukï yïn, cït man de kɔckuön ke Yithriɛl. Ku abïk ŋic ayadäŋ yen ee Luaŋdït cä yïkë ee yen të bïï ë yïn aa lam thïn.

³⁴ “Ku të cï yïn kɔcku yɔ̈ɔ̈k bïk lɔ piɔ̈t ë kɔc ke aterden, ku cïk lɔ̈ŋ tëdɛn rëër kek thïn ke ke wel kenïïm të lɔ pänydït cï lɔc kekë Luaŋdït cä yiɛ̈k yïn,

³⁵ piŋ lɔ̈ŋden. Piŋ paannhial ku tɔ keek tiëm.

³⁶ “Të le kɔcku yïn luöi awäc, ku acïn raan cie wäc, ku në agönhdu acï keek tɔ tiɛɛm ë kɔc ke aterden, ku pec keek ke ke mac leerë keek pinydäŋ, na cakaa piny mec aläl,

³⁷ piŋ lɔ̈ŋ de kɔcku. Të le kek kepiɔ̈ɔ̈th puk piny cïï ë keek lɛɛr thïn ke ke cï peec, ku lɛ̈ŋkï yïn, ku gɛmkï awɛ̈ɛ̈cken, ku luɔi cï kek kueer wööcic, piŋ lɔ̈ŋden Bɛ̈nydït.

³⁸ Na cïk kepiɔ̈ɔ̈th puk ë yic në piɔ̈nden ëbɛ̈n ee piny cï ë keek lɛɛr thïn ke ke cï peec, ku lɛ̈ŋkï ke ke wel kenïïm piny cï gäm kuarkuɔ, ku wëlkï kenïïm pänydït cï lɔc, ku welkï kenïïm Luaŋdït cä yiɛ̈k yïnë,

³⁹ ëtɛ̈ɛ̈n ke yï jɔ lɔ̈ŋden piŋ. Piŋ baaidu paannhial, ku kokëpiɔ̈u we keek, ku pälë kɔcku awɛ̈ɛ̈cken kedhie.

⁴⁰ “Ku ënɔɔnë, Nhialicdï, woi wook ku piŋ lɔ̈ŋ dïït cï gam ee tënë.

⁴¹ Ënɔɔnë, jɔt rɔt Bɛ̈nydït Nhialic, lɔɔr wekë athänduŋ de mät, kïn de riɛldu, lɔɔr ë Luaŋdïtic ku rɛ̈ɛ̈rë ëtɛ̈ɛ̈n aɣet athɛɛr. Thiei kɔckuön ke kake Nhialic, në kë yek looi yic ëbɛ̈n, ku tɔ kɔcku mit piɔ̈ɔ̈th kedhie në biäk de piathdu tëde keek.

⁴² Bɛ̈nydït Nhialic, du melik cï tɔc reec. Tak nhiëërduön agɔk nhiɛɛr yïn lïmduön Debid.”