2 Lëk 5 - JAM DE NHIALIC 2011

¹ Na wën aacï Tholomon luɔi de ɣön ë Bɛ̈nydït thöl ë yïk, go ka wään cï Debid wun keek tɔ̈ɔ̈u pei në biäk de Luaŋdït bɛ̈ɛ̈i thïn, ago atek, ku adhääp ku lɔ ka kɔ̈k ëbɛ̈n tääu të ye wëu ke ɣön ë Nhialic muk.

Athänduŋ ë Mät acï Bɛ̈ɛ̈i Luaŋdït

² Go Tholomon bäny ke dhiëën ke Yithriɛl cɔɔl kedhie, ku bäny ke ɣööt thook bïk lɔ tëde yen ë Jeruthalem, agokï Athänduŋ de män ë Bɛ̈nydït lɔ bɛ̈ɛ̈i pänydït de Debid yen aye Dhiɔn.

³ Na wën ke kɔc ke Yithriɛl ë ke bɔ̈ kedhie në melik nɔm në akööl ke Dhuëëŋ de Kɛ̈ɛ̈t.

⁴ Na wën aacï röördït ke Yithriɛl guëër ëtɛ̈ɛ̈n, go kɔc ke Lebai Athänduŋ de män ë Bɛ̈nydït jat nhial,

⁵ ku leerkï athänduŋ de mät ɣön ë Bɛ̈nydïtic. Go Lebai ku bäny ke kake Nhialic paany de mät kekë kaɣeriic kedhie lɛɛr Luaŋdït.

⁶ Go melik Tholomon ku akutnɔm de Yithriɛl cï guëër kedhie kenïïm kut lɔ kɔ̈ɔ̈c në athänduŋ de mät lɔ̈ɔ̈m, ku nɛ̈kkï amɛ̈l ku ɣɔ̈k juëc cïï duëër ë lëu ë kuɛ̈n.

⁷ Go bäny ke kake Nhialic athänduŋ de män ë Bɛ̈nydït lɛɛr ɣöt ë biäk thïn tëde, ku tɛ̈ɛ̈ukï tëɣeric aläl në wuök ke cerubiim thäär.

⁸ Ku cerubiim acïk ke wuök thiɛth në athänduŋ de mät nɔm ku kumkï piny kekë wai ee yen ɣääc.

⁹ Ku wai ye athänduk ɣääc abɛ̈ɛ̈rkï kɔ̈ɔ̈th, ka aye keek tïŋ tëɣeric, ku acïï keek ee tïŋ biic. (Wai aŋootkï ke ke nu ëtɛ̈ɛ̈n aɣet cï ee köölë.)

¹⁰ Acïn ke tɔ̈u në athänduŋ de mätic, ee pɛɛm kaarou de lööŋ kapäc, ka wään bïï Mothe ke tääu thïn ë kuur de Thinai, të wään bïï Bɛ̈nydït mät looi ke kɔc ke Yithriɛl wään bïï kek bei ë Rip.

Dhuëëŋ de Bɛ̈nydït

¹¹ Na wën ke bäny ke kake Nhialic ë ke bɔ̈ bei tëɣeric acïk kegup tɔ piɛth, bïk Bɛ̈nydït luööi ke ke cïï lui ë kuutken yiic.

¹² Kɔc ke Lebai ee ket kedhie, Athap, Ɣeman, ku Jeduthun, ku wɛ̈ɛ̈tken ku kɔcken, aceŋkï lupɔɔ piɛth lɔ mot. Go Lebai ku bäny ke kake Nhialic bot kaarou ku thiërrou kɔ̈ɔ̈c ë biäk të lɔ aköl amiäk de yïk, ke ke gut lɔ̈r, ku thom, ku kothkï aruöör ku kɛŋ ke ke ket.

¹³ Kɔc koth kɛŋ, ku kɔc ket diɛt, acïk ke röt mat abï ciët röl ë raan tök, bïk lɛc ku dhuëëŋ gäm Bɛ̈nydït. Ku ciɛthkï në lɔ̈r, ku kɛŋ ku thom, acïk ke röl jat nhial ku yek Bɛ̈nydït leec ku lëkkï thieithieei ë diɛt an, “Pianykï Bɛ̈nydït në biäk de piɛthde, Ku nhiëërdɛn agɔk atɔ̈u athɛɛr.” Na wën aa jɔ bäny ke kake Nhialic Luaŋdït nyääŋ piny, go guɔ thiäŋ ëthiäu ke luäät, ku riau de ɣɛɛr ë Bɛ̈nydït,

¹⁴ Go bäny ke kake Nhialic luɔi de läm tɔ kääc në biäk cïï luän de dhuëëŋ ë Bɛ̈nydït ɣön ë Nhialic thiɔ̈ɔ̈ŋic.