2 Lëk 36 - JAM DE NHIALIC 2011

Jowaɣadh Melik de Juda

¹ Go kɔc ke Juda Jowaɣadh wën ë melik Jothia kuany ë nyinde yic ku tɔckï ë miök ke ye melik ë Jeruthalem.

² Jowaɣadh aaye run thiërrou ku diäk ɣɔn dɔm en bääny ke ye melik de Juda, go bääny muk ë Jeruthalem në pɛ̈i kadiäk.

³ Go melik Neko de Rip jɔt ke mac, ku tɔ kɔc ke Juda gɛm aguum kadiäk ku bot kaŋuan 3,400 ke kilɔɔ ke ateek, ku thiërdiäk ku ŋuan de kilɔɔ ke adhääp, ke ye athölbɔ̈.

⁴ Go Neko Eliakim mänhë Jowaɣadh dɔm ke ye melik de Juda, ku puk rin ke ye Jeɣoyakim. Ku jɔt melik Neko Jowaɣadh leer Rip.

Jeɣoyakim Melik de Juda

⁵ Jeɣoyakim aaye run thiërrou ku dhïc ɣɔn dɔm en bääny ke ye melik de Juda, go bääny muk ë Jeruthalem në run kathiëër ku tök. Acï karɛc looi në Bɛ̈nydït Nhialicde nɔm.

⁶ Na ɣɔn ke melik Nebukadnedhar ë leer tɔŋ Juda ku dɔm Jeɣoyakim, ku jɔt ke rɛk leer Babilon.

⁷ Go Nebukadnedhar wëu ke Luaŋdït jɔt kedhie ku leer ke mat ë wëu ke baaide yic ë Babilon.

⁸ Këriëëc ëbɛ̈n cï Jeɣoyakim looi, ku kënhiɛɛny cï looi, ku kërɛɛc cï looi, acï ke gɔ̈ɔ̈r në awerek de meliik ke Yithriɛl ku Juda yiic. Go Jekonia wënde lɔ në nyinde yic ke ye melik.

Jekonia Melik de Juda

⁹ Jekonia aaye run thiëër ku bɛ̈t ɣɔn dɔm en bääny ke ye melik de Juda, go bääny muk ë Jeruthalem në pɛ̈i kadiäk ku nïn kathiëër. Acï karɛc looi ë Bɛ̈nydït nɔm.

¹⁰ Na ɣɔn yaak, go melik Nebukadnedhar Jekonia jɔt ke mac, ku leer Babilon, ku jɔt wëu juëc ke Luaŋdït kedhie. Na wën ke Nebukadnedhar ë tɛ̈ɛ̈u nëërë Jekonia cɔl Dhedekia ke ye melik de Juda ku Jeruthalem.

Dhedekia Melik de Juda

¹¹ Dhedekia aaye run thiërrou ku tök ɣɔn dɔm en bääny ke ye melik de Juda, go bääny muk ë Jeruthalem në run kathiëër ku tök.

¹² Acï karɛc looi në Bɛ̈nydït nɔm, ku reec jam de tiët Jeremia, raan ee jam në këde Bɛ̈nydït.

Wïïk de Jeruthalem

¹³ Go Melik Dhedekia Melik Nebukadnedhar rɛɛc, raan cï ye dɔm ë riɛl bï kuëëŋ në rin ke Nhialic ago yen aa riëëu. Ago jai në riɛl ë nɔm ke cïï yepiɔ̈u puk ku cïï rɔt puk Bɛ̈nydït Nhialic de Yithriɛl.

¹⁴ Ku däŋ aya, bäny ke kɔc ke Juda, ku bäny ke kake Nhialic, ku kɔc acïk ciɛɛŋ de luɔi de kërac ke juöör thiääk ë keek dɔm yic, gokï yiëth lam, ku jɔkï Luaŋdït tɔ nhiany, të wään cïï Bɛ̈nydït guöpde tɔ ɣeric.

¹⁵ Go Bɛ̈nydït Nhialic de kuarken, bɛ̈n ŋoot ke ye tït tooc bïk kɔcke lɔ jɔ̈ɔ̈ny, në biäk kɔɔr en bï yen keek kony ku kony Luaŋdït.

¹⁶ Gokï tuuc ke Nhialic dɔl gup, ku dhɛ̈lkï wëlkɛn lueelkï yiic, ku buikï tïtke gup, aɣët abï agönh de Bɛ̈nydït dït në kɔcke gup ku cïn luɔi bïï ë kɔc ban.

¹⁷ Go Bɛ̈nydït melik de Babilonia bɛ̈ɛ̈i bïï keek bɛ̈n luöi tɔŋ. Go melik dhuök ke Juda nɔ̈k ɣön tɔ̈u tëdɛn ɣeric. Akën piɔ̈u kok ke kɔc, kɔc kor ayï kɔcdït, röör ku diäär, kɔc de gup juäi ku kɔc piɔl gup. Kɔc kedhie acï Nhialic keek tääu ë yeciin.

¹⁸ Go melik de Babilonia ka tɔ̈u në ɣön ë Nhialicic peec kedhie, ku peec wëu tɔ̈u në ɣön ë Bɛ̈nydïtic, ku wëu juëc ke melik, ku wëu ke bänyke, ku jɔt këriëëc ëbɛ̈n leer Babilon.

¹⁹ Ku nyop ɣön ë Nhialic kekë pänydït ë mac, ku nyop ɣööt ke bääny kedhie, ku dhoŋ päny de kal piny.

²⁰ Ku jɔt kɔc cï poth në abätäu thok leer keek Babilon, bïk yen lɔ luööi ke ke ye lïïmke ku lïïm ke käude agut cï bɛ̈n de Perthia nhial.

²¹ Go jam de Bɛ̈nydït aa yic, jam ɣɔn cï lɛ̈k Jeremia an, “Aɣet të bï pinydun döŋ yetök ke cïn raan nu thïn. Në run kathiërdhorou yiic, acï lɔ̈ŋ de kööl ë Thabath guɔ looi.”

Thairuth Ayöök Kɔc ke Juda bïk Röt Puk

²² Na ɣɔn ë ruöön tueŋ ye Thairuth melik de Perthia, go jam de Bɛ̈nydït ɣɔn cï Jeremia lueel aa yic. Go Bɛ̈nydït Thairuth melik de Perthia jɔt piɔ̈u, bï jam lɛ̈k kɔc, ku gɛ̈ɛ̈r ë awerekic, bï lɔ kuën kɔc ke pinyde kedhie:

²³ “Ku jam ë lueel Thairuth kï, melik de Perthia an: Bɛ̈nydït, Nhialic de paannhial, acï ya looi ke ya ye bɛ̈ny de piny nɔm ëbɛ̈n, ku acï yɛn gäm luɔi bän ɣönde tɔ yïk në Jeruthalem ë Juda. Ënɔɔnë, week wedhie wek kɔc ke Nhialic, lakkï ëtɛ̈ɛ̈n, ku Bɛ̈nydït Nhialicdun abï tɔ̈u ke week.”