2 Lëk 32 - JAM DE NHIALIC 2011

Kɔc ke Athiriya Ariëëckï Jeruthalem

¹ Na wën aacï kake tuöl ku cï melik Ɣedhekia Bɛ̈nydït ŋic luööi apiɛth, ke Thenakerip melik de Athiriya peec ë Juda. Go pɛ̈ɛ̈nydït tuɔɔk ku yöök remdɛn ë tɔŋ bïk kɛ̈l jäp piny.

² Ku melik Ɣedhekia acï tïŋ nɔn bï Thenakerip Jeruthalem luöi tɔŋ ayadäŋ,

³ go kiëët kekë kɔcke ku kɔckɛn ril, bïk pïïu ee tɛ̈ɛ̈k ë nyin de pänydït yic teem kɔ̈u, gokï yen kuɔny.

⁴ Go gökdïït ë kuut de kɔc guëër, gokï nyïïn ku liil ke pïïu ee pänydït reetic thiɔ̈ɔ̈k, luelkï an, eeŋö duëër ë melik de Athiriya bɛ̈n ku yök pïïu juëc?

⁵ Go melik kɛ̈l ke pänydït tɔ yïk abïk riɛl ku yïk ɣööt bär në kɛ̈l nïïm, ku yïk kal däŋ biic ë kal kɔ̈u. Ku acï biäk thɛɛr të lɔ aköl amiäk de Pänydït de Debid looi ayadäŋ. Ku aa de nɔm tɔɔŋ juëc ku kööt ayadäŋ.

⁶ Ku tɛ̈ɛ̈u bäny ke rem de tɔŋ në rem de tɔŋ nïïm, ku yöök keek bïk kenïïm kut në pëër tɔ̈u ë kal ë wut thok. Ku yöök keek an,

⁷ “Takï röt ril, ku riɛtkï wepiɔ̈ɔ̈th, ku duökï riɔ̈c në melik de Athiriya, ku nɔn ee remdɛn de tɔŋ cath ke yen. Wok de nïïm riɛldït ë biäkda, riɛl wär riɛl cath ke yen.

⁸ Ku riɛl tɔ̈u ke yen e riɛl ë raan tei, ku wok de Bɛ̈nydït Nhialinyda abï wok kony ku bï tɔŋ thɔ̈ɔ̈r ë yen.” Go kɔc kepiɔ̈ɔ̈th riit në wɛ̈l ke Ɣedhekia melikden.

⁹ Na ɣɔn në ee kakë cök, të wään ŋoot ë Thenakerip ke tɔ̈u në Lacic kekë remdɛn de tɔŋ. Go thok tɔ lɔ tëde Ɣedhekia ku kɔc ke Juda tɔ̈u në yen ë Jeruthalem an:

¹⁰ “Yɛn Thenakerip melik de Athiriya wek thiëc keek eeŋö ŋäthkï, kë tɔ week rëër në Jeruthalem ke we cï tuɔɔk.

¹¹ Ku melik Ɣedhekia ee week yɔ̈ɔ̈k nan bï Bɛ̈nydït Nhialicdun week luäk bei në melik de Athiriya ciin, ku Ɣedhekia amɛth week, akɔɔr bäk thou në cɔk ku rou.

¹² Ku cie Ɣedhekia yen ë dhoŋ yïk ke Bɛ̈nydït piny ku lëk kɔc ke Juda ku kɔc ke Jeruthalem bïk aa lam ku nyopkï wal ŋïr në yïïŋ tök nɔm.

¹³ Kuöckï ka cïï kuarkuɔ ke looi ku ka cä luöi juöör kɔ̈k? Cï yiëth ke juöör kɔ̈k kɔcken kony në melik de Athiriya?

¹⁴ Ee nɛn yen cïï yiëth ke juöörkë wuötken kony në wook, wuöt wään bïï wäär ke riɔ̈ɔ̈k? Ku eeŋö tɔ week tɔ tak en nɔn duëër ë yiëthkun week kony?

¹⁵ Ku ënɔɔnë duökï Ɣedhekia tɔ mɛth week ku thel week wei aya. Duökï kë lueel gam! Acïn yanh de jur cï kɔcke kɔn kony tëde melik de Athiriya. Ka yanhduönë acïï week bï kony!”

¹⁶ Go bäny ke Athiriya karɛc juëc luɛɛl në Bɛ̈nydït Nhialic guöp kekë Ɣedhekia awunde.

¹⁷ Ku awerek ë gɛ̈ɛ̈r melik de Athiriya alɛ̈ɛ̈t Bɛ̈nydït Nhialic de Yithriɛl, aye lueel an, “Yiëth ke juöör akënkï kɔcken kony në riɛl cath ke yɛn, ayï yanh de Ɣedhekia acïï yen bï kony në yɛn.”

¹⁸ Na wën ke bänyken ke ke jam ë röldït në thoŋ de Ɣeberuu, agokï kɔc riääc ku bïk kɔc ke Jeruthalem nu ë kal kɔ̈u tɔ bäp piɔ̈ɔ̈th, ago kueer bï kek pänydït dɔm yic pial.

¹⁹ Ku aa ke ye jam në biäk de Nhialic de Jeruthalem në kueer ye kek jam në këde yiëth ke kɔc kɔ̈k, yiëth ë cuëc keek ë cin.

²⁰ Na wën ke melik Ɣedhekia kekë tiët Yithaya wën de Amodh ë ke läŋ Nhialic në dhiëëu bï keek kuɔny.

²¹ Go Bɛ̈nydït tunynhial tuööc ku nɛ̈k rem de tɔŋ ku bäny ke rem ë tɔŋ de Athiriya. Go melik yenɔm pɔ̈k Athiriya ke cï yäär. Na ɣɔn ë kööl tök ke tɔ̈u ë luaŋ yaathde yic, go nɔ̈k në abätäu në wɛ̈ɛ̈tke.

²² Yen ee kueerë yen aa kony ë Bɛ̈nydït melik Ɣedhekia kekë Jeruthalem në riɛl ë Thenakerip melik de Athiriya, ku tëde kɔc kɔ̈k de aterde. Ku jɔ kɔc rɛ̈ɛ̈r në mätic në kɔc thiääk ë keek.

²³ Go kɔc juëc lɔ Jeruthalem ke ke yïn miɔ̈c Bɛ̈nydït, ku gëmkï miɔ̈c kɔ̈k melik Ɣedhekia, gɔl ëtɛ̈ɛ̈n juöör ëbɛ̈n acïk Ɣedhekia bɛ̈n riëëu guöp.

Juän ë Ɣedhekia ku Lɛc

²⁴ Na ɣɔn në aköölkë yiic ke Ɣedhekia dɔm juäi abï duëër thou. Go lɔ̈ŋ, ago Bɛ̈nydït gäm kïn bïï yen guöp pial.

²⁵ Ku Ɣedhekia acï nɔm bɛ̈n dït ku akën dhuëëŋ de piɔ̈u nyuöth Bɛ̈nydït në kë cï luöi en, ago Juda kekë Jeruthalem bɛ̈n nuan në këde.

²⁶ Na ɣɔn ciëën, ke Ɣedhekia kekë kɔc ke Jeruthalem acïk röt bɛ̈n kuɔɔr piny, go Bɛ̈nydït piɔ̈u kok ke keek, ku akën keek bɛ̈n luöi këtuc agut thon de Ɣedhekia cök.

Kuɛth ë Ɣedhekia kekë Dhuëëŋ

²⁷ Go melik Ɣedhekia nɔm dɛ kajuëc arëët, ago raan ëbɛ̈n riëëu guöp. Ade nɔm ɣööt cï yïk ye ke adhääp, ku ateek, ku kuur läk, ku maläŋ tɔ̈ɔ̈u thïn, ku kööt, ku lɔ kɔ̈k de naamden aya.

²⁸ Ku acï ɣööt kɔ̈k tɔ yïk bï ke rap tääu thïn, ku mɔ̈u, ku miök de olip, ku agäu bï ɣɔ̈k mac thïn, ku atook de thök,

²⁹ Ku në kake cök, go Nhialic gäm thök juëc ku ɣɔ̈k ku lɔ kajuëc kɔ̈k abï yen tɔ yïk pɛ̈ɛ̈nydït juëc.

³⁰ Ku melik Ɣedhekia guöpde ee yen ë thiɔ̈k nyin de Giɣon ee wat në biäk lɔ aköl athɛ̈i, pɛ̈n pïïu tëëk në biäk thïn de Pänydït de Debid. Go melik Ɣedhekia aa tiam në ka ye looi yic ëbɛ̈n.

³¹ Ayï ɣɔn bïï tuuc wään bɔ̈ ë Babilon bɛ̈n, bïk kë de gäi cï tuöl pinyden bɛ̈n kɔɔric, go Nhialic Ɣedhekia gäm nɔm riɛl, bï cath ë kueerde, ago täude them.

Thök de Bääny de Ɣedhekia

³² Ku këriëëc cï ë Ɣedhekia looi ëbɛ̈n, ku luɔidɛn piɛth, acï ke gɔ̈ɔ̈r në nyuuth de tiët Yithaya wën de Amodh yic, ku në awerek de meliik ke Juda ku Yithriɛl yiic.

³³ Go Ɣedhekia thou, go tɔ̈ɔ̈u në raŋ nu ë biäk nhial yic, kake wɛ̈ɛ̈t ke Debid. Ago kɔc ke Juda ku kɔc ke Jeruthalem kedhie yen gäm dhuëëŋdït në thonde yic. Go Manatha wënde lɔ në nyinde yic ke ye melik.