2 Lëk 31 - JAM DE NHIALIC 2011

Ɣedhekia Akim Luɔi de Lɔ̈ŋ Piny

¹ Na wën cï luɔi de dhuëëŋ thök, ke kɔc ke Yithriɛl ë ke lɔ ë wuöt ke Juda yiic kedhie, ku dhoŋkï mën ke kur piny, ku yepkï kïït ke yanh tik Acera piny, ku riäkkï yïk, ku ɣään ye kɔc ke yiëth lam thïn. Ku loikï ee kënë ë wuöt ke kɔ̈k ke Juda yiic, ku bɛ̈i kɔ̈k ke yï Benjamin, ku Eparaim, ku Manatha, ku jɔkï kenïïm bɛ̈n pɔ̈k ë bɛ̈iken yiic.

² Go melik Ɣedhekia luɔi bɛ tɛ̈k kɔc ke Lebai ku bäny ke kake Nhialic, ago ŋɛk luɔi bï ya looi ŋic. Luɔiyë ade yic miɔ̈c ye nyop ëbɛ̈n, ku miɔ̈c de mät, ku luɔi bïï läm wat ë Luaŋdïtic, ku gɛm de piɔ̈ny ku lɛc në ɣään kɔ̈k ke Luaŋdïtic.

³ Ku aaye miɔ̈c ye nyop ëbɛ̈n gam miäk rial ku thëën ë lunyde yic, ku gɛm miɔ̈c de Thabath, ku miɔ̈c de Dhuëëŋ ë wil ë Pɛɛi, ka cï löŋ de Bɛ̈nydït ke lueel.

⁴ Ku në ee kënë cök, go melik kɔc ke Jeruthalem yɔ̈ɔ̈k bïk miɔ̈c ye gäm Lebai ku bäny ke kake Nhialic bɛ̈ɛ̈i, miɔ̈c ee këden, yen abïk kek röt gäm luɔi de wëët de löŋ ë Bɛ̈nydït.

⁵ Na wën aa cï löŋ teem, go kɔc ke Yithriɛl miɔ̈c bɛ̈ɛ̈i, miɔ̈c piɛth de anyuɔl, ku mɔ̈u, ku miök de olip, ku miök de kiëc, ku miɔ̈c de kajuëc cï kɔn luɔk ë duum yiic, ku bïïkï töŋ de thiëër de ka cï luɔk kedhie.

⁶ Ku kɔc tɔ̈u ë pɛ̈ɛ̈nydït ke Juda yiic, acïk töŋ ë thiëër de ɣɔ̈k ku thök bɛ̈ɛ̈i, ku bïïkï miɔ̈c juëc kɔ̈k, ku gɛ̈mkï keek Bɛ̈nydït Nhialicden.

⁷ Miɔ̈c aake gɔl rɔt ëbɛ̈n në pɛɛi de diäk ku ŋootkï ke ke cuth röt në pɛ̈i kaŋuan yiic.

⁸ Na wën cï ë melik Ɣedhekia kekë bänyke kajuëc cï ke gam tïŋ, gokï Bɛ̈nydït lɛc nɔm ku leec kɔckɛn ke Yithriɛl.

⁹ Go Melik Ɣedhekia bäny ke kake Nhialic ku Lebai jääm në biäk de miɔ̈c.

¹⁰ Go Adharia bɛ̈nydïït ë kake Nhialic, ku ye raan dhiën de Dhadok, lɛ̈k en an, “Gɔl të wään cï kɔc miɔ̈c bɛ̈ɛ̈i në Luaŋdïtic, wo cï dɛk kacaam juëc ku ade biäkdït cï döŋ ayadäŋ. Wok aa yök ee kakë kedhie në biäk cïï Bɛ̈nydït kɔcke thieei.”

¹¹ Go melik Ɣedhekia ɣööt dït tɔ yïk të thiääk kekë pëër ë Luaŋdït, ago kɔc keek looi,

¹² Go kɔc ka cï juaar bɛ̈ɛ̈i ë piɔ̈n piɛth, töŋ ë thiëër, ku ka cï tɔ̈ɔ̈u pei. Ku bɛ̈ny nu ë kenïïm ee Lebai cɔl Konania, ku kuany Cimei mänhë ë yecök.

¹³ Ku tɛ̈ɛ̈ukï kɔc ke Lebai kathiëër bï luui në kecök ku rinken kï: Jeɣel, Adhadhia, Naɣath, Athaɣel, Jerimoth, Jodhabad, Eliel, Yithmakia, Maɣath, ku lɔ Benaya, ku aake ye bäny kony Konania kekë Cimei mänhë, ë baŋ cï ke kuany ë melik Ɣedhekia kekë Adharia bɛ̈ny tueŋ de ɣön ë Nhialic.

¹⁴ Ku raan de Lebai cɔl Kore wën de Yimena bɛ̈ny de kɔc ee kal Thoŋ de Luaŋdït të lɔ aköl amiäk tiit, ee yen ee bɛ̈ny de miɔ̈c ɣeric aläl ye gäm Bɛ̈nydït dɔm, ku tek keek.

¹⁵ Ku në pɛ̈ɛ̈nydït kɔ̈k ceŋ ë Lebai kek, aaye kuɔny ë luɔi yic në piɔ̈n adöt në yï: Eden, ku Miniamin, ku Jecua, ku Cemaya, ku Amaria, ku Cekania. Ayek kacam tɛ̈k kɔckɛn ë Lebai apiɛth cït man ë täu de luɔidɛn yek looi,

¹⁶ ke cie biäk ë dhiën. Röör aa ke ye gäm biäkden kedhie. Raan de nɔm run kadiäk leer tueŋ, raan de nɔm luɔi ye looi ë ceŋ Luaŋdïtic cït man ë täu de luɔiden.

¹⁷ Ku bäny ke kake Nhialic acï ke gäm luɔi kedhie cït man de täu de ë dhiënken thook, ku Lebai kɔc ye runken thiërrou leer tueŋ acï ke gäm luɔi ë kuutdenic.

¹⁸ Ku aake gäär keek rin kedhie në diäärken, ku mïthken, ku kɔc rɛ̈ɛ̈r ë keek, në biäk ye kek ke yiic tɔ ɣer në luɔidenic aköölnyïïn ëbɛ̈n.

¹⁹ Ku bäny ke kake Nhialic rɛ̈ɛ̈r ë pɛ̈ɛ̈nydït yiic luɔi acï gäm käu de Aron, ku nɔn yen ɣään ke nyuäth ee pɛ̈ɛ̈nydïtkë yiic, aa de yic kɔc ŋic käŋ ee kacaam tɛ̈k kɔc kedhie röör nu ë dhiën ke bäny ke kake Nhialic yiic, ku lɔ kɔc nu ë biäk de dhiën ke Lebai.

²⁰ Go melik Ɣedhekia yic looi ëbɛ̈n ë Juda yic, ku looi këpiɛth ë Bɛ̈nydït Nhialicde piɔ̈u.

²¹ Ku kë ye looi ëbɛ̈n aaye tiam thïn, në biäk de ka cï luöi ɣön ë Nhialic ëbɛ̈n, ku në biäk yen wëët ku lööŋ kuany cök, aaye looi në yepiɔ̈u ëbɛ̈n ë riëëu de Nhialic ago jɔ kuɛth.