2 Lëk 3 - JAM DE NHIALIC 2011

¹ Melik Debid, wun Tholomon, aacï të bïï Luaŋdït yïk thïn guiir thɛɛr. Yen atɔ̈u në Jeruthalem, në Kuur ë Moria nɔm, të ɣɔn cïï Bɛ̈nydït tuöl tëde Debid, piny wään cï raan ë Jebuth cɔl Arauna yiɛɛu yen käm looi thïn. Go melik Tholomon luɔi gɔl

² në pɛɛi ë rou në ruöön ë ŋuan ee yen melik.

³ Ɣön ë Nhialic ë yïk Tholomon aaye bɛ̈ɛ̈rde yen kɔ̈u mitïïr kathiërrou ku dhorou, ku dït de yen yic aaye mitïïr kadhoŋuan.

⁴ Ku ɣön de lɔ thïn akït ke dït de yen yic ee mitïïr kadhoŋuan në biäk kedhie, ku bɛ̈ɛ̈rde ke lɔ nhial aaye mitïïr kathiërdhïc. Ku ɣööt yiic thïn acï ke goor kɔ̈ɔ̈th në adhäm awai.

⁵ Ku ɣötic acï rai në tim de ameth ku jɔ goor kɔ̈u në adhäm awai, ku jɔ päny giët kɔ̈u tiim ke akööt ku kë cït kuat.

⁶ Ago melik Luaŋdït tɔ jiëmë në kuur läk ku lɔ adhääp ye lɔ bɛ̈ɛ̈i piny de Parbaim.

⁷ Ku tɔ pɛ̈ɛ̈ny ke Luaŋdït yiu kɔ̈ɔ̈th në adhääp ayï athïïn, ku göl. Ku jɔ atëët cerubiim giɛɛt ë pɛ̈ɛ̈ny kɔ̈ɔ̈th.

⁸ Ku ɣön tɔ̈u thïn cɔl Tëɣeric aläl, aaye bɛ̈ɛ̈r de yen kɔ̈u mitïïr kadhoŋuan ku ye dït de yen yic mitïïr kadhoŋuan, yen aye dït de yic de Luaŋdït. Ku ka wär tɔn kathiërrou de adhääp acï ë Tëɣeric aläl gël kɔ̈u.

⁹ Ku ka cït bot kadhïc ku thiërdhorou 570 ke wëu ke adhɛ̈p acï ë wiɛth looi, ku pɛ̈ɛ̈ny ke ɣööt nhial acï keek kuöm piny në adhääp.

¹⁰ Go melik kɔckɛn luui yɔ̈ɔ̈k bïk cerubiim kaarou looi në wëëth, ku kum keek në adhääp, ku bïk keek lɔ tääu tëɣeric aläl.

¹¹ Ku wuök ke cerubiim kedhie ayek kaam cït mitïïr kaarou ku biäk nööm, keek kedhie acï keek petiic, ka yek ɣet në ɣöt kɔ̈u, ku ayek röt jak kapäc.

¹² Ku wuök töŋ de cerubiim ee päny de ɣöt jak kɔ̈u, ku jak wuök däŋë aya, ale kek mat kekë wuök de cerubiim däŋë.

¹³ Ku wuök ke cerubiim ayek ɣet në mitïïr kadhoŋuan. Ku cerubiim akɛ̈ɛ̈ckï në kecök ke ke woi ɣöt thok.

¹⁴ Ku lupɔɔ ke gëlgël, acï ke looi në lupɔ aräu amujuŋ, ku lupɔ piɛth lɔ mot cï looi në kïn tɔ̈c, ku linɔn ɣer, ku tɔ cerubiim lɔ thïn.

Aber ke Malɔ̈ɔ̈ŋ Kaarou

¹⁵ Melik acï cök kaarou looi tök në keek aaye bɛ̈ɛ̈rde mitïïr kathiëër ku dhïc, ku tɛ̈ɛ̈u keek në Luaŋdït thok, tök në ke yiic aa de thok mitïïr kaarou ku biäk.

¹⁶ Në cök nïïm nhial, acï ke giit në ka cï ke cuëëc në kuat, ku cök ke tiim ke pomegraneet.

¹⁷ Cök aake cï ke tääu në biäk töŋ de Luaŋdït në kueer ee tëëk, tök në biäk de wöuwic acɔl Jakin ku däŋë në biäk të lɔ rut acɔl Bowadh.