2 Lëk 29 - JAM DE NHIALIC 2011

Ɣedhekia Melik de Juda

¹ Ɣedhekia aaye run thiërrou ku dhïc ɣɔn dɔm en bääny ke ye melik de Juda, go bääny muk ë Jeruthalem, në run kathiërrou ku dhoŋuan. Man acɔl Abija, nyan de Dhekaria.

² Acï këpiɛth looi në Bɛ̈nydït nɔm, ka cït ka wään cï kuɛɛrë Debid ke looi.

Luaŋdït atɔ Ɣeric

³ Në pɛɛi tueŋ de ruöön tueŋ ɣɔn cïï Ɣedhekia aa melik, go athïïn ke Luaŋdït tɔ liep thook, ku be keek tɔ looi.

⁴ Go bäny ke kake Nhialic ku Lebai tɔ kut kenïïm në kal de Luaŋdït thok të lɔ aköl amiäk.

⁵ Ku jiëëm keek ëtɛ̈ɛ̈n. Go lueel an, “Wek Lebai guiɛɛrkï röt bäk lɔgɔk aguɔkï ɣön de Bɛ̈nydït Nhialic de kuarkun tɔ lɔgɔk. Bɛ̈ɛ̈ikï kak ee tëɣeric tɔ de yic acuɔl bei.

⁶ Kuarkuɔ aake cïn adöt tëde Bɛ̈nydït Nhialicda ku loikï kë cï ye tɔ diu piɔ̈u. Acïk Bɛ̈nydït nyääŋ piny ku welkï ke kɔ̈ɔ̈th tëdɛn cëŋ en thïn.

⁷ Acïk athïïn ke Luaŋdït thiɔ̈ɔ̈k thook, ku tɔkï mɛ̈ckealath tɔ liu, ku pɛ̈lkï nyum de wal ŋïr ku miɔ̈c ye nyop ëbɛ̈n tëɣeric de Nhialic de Yithriɛl.

⁸ Ku në biäk de ee kënë Bɛ̈nydït acï gɔ̈th kekë Juda ku Jeruthalem, ku kë cï luöi keek acï raan ëbɛ̈n tɔ riɔ̈c ku tɔ ke mum nïïm. Wek ŋic ee kakë apiɛth.

⁹ Wärkuɔ acï keek nɔ̈k tɔŋ, ku diäärkuɔ ku mïth acï keek peec ke ke mac.

¹⁰ “Acä lueel ee köölë nɔn bän löŋ mac wokë Bɛ̈nydït, Nhialic de Yithriɛl, ke cïï bï bɛ gɔ̈th ke wook.

¹¹ Mïthkï duökï be gääu. Ee wek cïï Bɛ̈nydït ke lɔc bäk wal ŋïr aa nyuöp en, ku bäk kɔc aa wat të lɔ̈ŋ kek en.”

^12-14 Kɔc ke Lebaikë aake tɔ̈u ëtɛ̈ɛ̈n: Dhiën de Koɣath, ee Maɣath wën de Amathai, ku Jowɛl wën de Adharia. Dhiën de Merari, ee Kic wën de Abdi, ku Adharia wën de Jeɣalelel. Dhiën de Gercon, ee Jowa wën de Dhimna ku Eden wën de Jowa. Dhiën de Elidhapan, ee Cimiri ku Jewɛl. Dhiën de Athap, ee Dhekaria ku Matania. Dhiën de Ɣeman, ee Jowɛl ku Cimei. Dhiën de Jeduthun, ee Cemaya ku Yudhiɛl.

¹⁵ Kek ee Kɔckë acïk mïthëkɔcken kɔc ke Lebai kut nïïm, ku jɔkï ke gup waak abïk gup piath. Na wën, të cïï melik keek yɔ̈ɔ̈k bïk kë cï lɛ̈k keek looi, gokï Luaŋdït napic ku guiirkï abï piath, cït man ë löŋ ë Bɛ̈nydït.

¹⁶ Go bäny ke kake Nhialic lɔ ë biäk thïn de Luaŋdït ke bïk tɔ lɔgɔk, ku dhëëthkï käŋ biic në Luaŋdïtic, ka wën cïï lɔgɔk leerkï keek ë kal de Luaŋdït yic. Ku ëtɛ̈ɛ̈n acï Lebai keek jɔt kedhie leerkï keek ë pänydït këc ë Wak de Kidron yic.

¹⁷ Luɔi aa gɔl ë kööl de tök ë pɛɛi de tök, ku në kööl de bɛ̈t ë pɛɛi yic acïk bɛ̈n ë gɔ̈ɔ̈l tueŋ de ɣön ë Bɛ̈nydït. Na wën ke ke jɔ ɣön ë bɛ̈nydït tɔ piɛth në nïn kɔ̈k kabɛ̈t, ku në kööl ye nïn thiëër ku dhetem ë pɛɛi yic, ke ke jɔ luɔi thöl në biäk de läm.

Luaŋdït Abe ë Gam

¹⁸ Go Lebai ka cïk looi lɛ̈k melik Ɣedhekia an: “Wok cï Luaŋdït thöl ë guiɛɛr ëbɛ̈n ka cï lɔgɔk, ayï yïïŋ de miɔ̈c ye nyop ëbɛ̈n kekë kake ëbɛ̈n, ku lɔ pam de kuïn cï pam, kekë kake kedhie.

¹⁹ Ku wok cï ka ɣɔn cï melik Aɣadh keek jɔt bɛ̈ɛ̈i ciëën, ka ɣɔn cï ke jɔt wään cïn en adöt ke Bɛ̈nydït, ku acuk keek guiir ku tɔku keek piɛth, ku atɔ̈ukï në yïïŋ de Bɛ̈nydït nɔm kedhie.”

²⁰ Na ɣɔn amiäk ke melik Ɣedhekia ë mɛ̈ɛ̈t röördït ke pänydït yiic, ku lekkï Luaŋdït yic.

²¹ Ku akɔɔr bï miɔ̈c de kërac looi në biäk de baai de melik, ku në biäk de kɔc ke dhiën ë Juda, ku në biäk de tëɣeric, gokï miöör kadhorou nööm, ku amɛ̈l kadhorou, ku nyök bɔɔth kadhorou, ku nyök amɛ̈l kor kadhorou. Go Melik bäny ke kake Nhialic ke dhiën de Aron yɔ̈ɔ̈k, bïk läi nɔ̈k ke ke ye miɔ̈c në yïk nɔm.

²² Go bäny ke kake Nhialic miöör kɔn nɔ̈k, ku amɛ̈l, ku lɔ nyök ke amɛ̈l kor, ku yek riɛm de miɔ̈c wiɛ̈ɛ̈th në yïk nɔm.

²³ Na wën ke ke jɔ nyök bɔɔth ke miɔ̈c de kërac lɛɛr tëde melik kekë amatnɔm de kɔc läŋ, agokï kecin thany në kegup.

²⁴ Go bäny ke kake Nhialic bɔɔth nɔ̈k, ku wɛ̈lkï riɛm në yïk nɔm ke ee miɔ̈c de kërac bïï ë kɔc ke Yithriɛl teem gup kedhie, në biäk cïï melik keek yɔ̈ɔ̈k bïk miɔ̈c de kërac ku miɔ̈c ye nyop ëbɛ̈n luöi kɔc ke Yithriɛl kedhie.

²⁵ Go melik lööŋ cïï Bɛ̈nydït lɛ̈k melik Debid në jam de tiët Nathan ku Gad monydaai looi, go Lebai tɔ kääc në Luaŋdïtic, ke ke muk thoom ku lɔ̈r,

²⁶ ku ka ke kiët cït ka wään ye melik Debid lui në keek. Ku kääc bäny ke kake Nhialic ëtɛ̈ɛ̈n ke ke muk kɛŋ ayadäŋ.

²⁷ Go Ɣedhekia keek yɔ̈ɔ̈k bïk miɔ̈c ye nyop ëbɛ̈n gam ë yïk nɔm, na wën aa cï gɛm de miɔ̈c rɔt gɔl, go kɔc jɔ lɔ ke ke ket diɛt piɔɔnyë Bɛ̈nydït, ku gɔl kɔc ee thom gut, ku kɔc ee kɛŋ kooth luɔiden, ku jɔ kɛŋ ke dhuëëŋ gut kedhie ayadäŋ.

²⁸ Go amatnɔm tɔ̈u ëtɛ̈ɛ̈n ëbɛ̈n mɛt ë läm yic, ku ketkï diɛt ku lɔ kɛŋ ke ke kooth agut të bïï miɔ̈c ye nyop ëbɛ̈n thök.

²⁹ Na wën ke Melik Ɣedhekia ku lɔ kɔc kedhie, ke ke tuk kemiɔl ku lɛmkï Nhialic.

³⁰ Go Melik Ɣedhekia kekë bäny ke baai, gokï Lebai yɔ̈ɔ̈k bïk Bɛ̈nydït piɔɔny ë diɛt ɣɔn thɛɛr gɛ̈ɛ̈r ë melik Debid kekë Athap monydaai. Go kɔc kedhie ket ke ke mit piɔ̈ɔ̈th ku tukkï kemiɔl ku lɛmkï Nhialic.

³¹ Go Ɣedhekia kɔc yɔ̈ɔ̈k an, “Ënɔɔnë wek cï gup lɔgɔk, yiɛ̈nkï Bɛ̈nydït miɔ̈c de alɛɛc.” Gokï kë lueel melik looi, ago amatnɔm ɣɔ̈k bɛ̈ɛ̈i, bï ke gam ke ye miɔ̈c ye nyop ëbɛ̈n.

³² Go amatnɔm miöör kathiërdhorou bɛ̈ɛ̈i, ku bɔt de amɛ̈l, ku bot kaarou de amɛ̈l kor, ke ye miɔ̈c ye nyop ëbɛ̈n këde Bɛ̈nydït,

³³ ku bïïkï bot kadhetem ke miöör ayadäŋ, ku bïïkï aguum kadiäk 3,000 ke amɛ̈l ke ye miɔ̈c näk bï ë kɔc cam.

³⁴ Ku në biäk cïn en bäny ke kake Nhialic juëc ë tɔ̈u bïk läi ke miɔ̈c ye nyop ëbɛ̈n nɔ̈k, go kɔc ke Lebai keek kuɔny ë luɔi, agut cï thökde. Agut cï kaam bï bäny juëc ke kake Nhialic röt tɔ piɛth, (ku Lebai ayek piɔ̈ɔ̈th adööt awär bäny ke kake Nhialic në dön ë täu lɔgɔk.)

³⁵ Ku däŋ bï bäny ke kake Nhialic mat në gɛm de miɔ̈c ye nyop ëbɛ̈n cök ee kɔl de miɔ̈c de mät, ku bïk mɔ̈u wäl wei, mɔ̈n wën ye gam kekë miɔ̈c ye nyop ëbɛ̈n. Ago läm bɛ gɔl ë Luaŋdïtic.

³⁶ Go melik Ɣedhekia piɔ̈u miɛt ku mit kɔc piɔ̈ɔ̈th, në biäk cïï Nhialic keek kuɔny bïk luɔi dap looi ëbɛ̈n.