2 Lëk 27 - JAM DE NHIALIC 2011

Jotham Melik de Juda

¹ Jotham aa dɔm bääny ke ee run thiërrou ku dhïc, go bääny muk ë Jeruthalem në run kathiëër ku dhetem. Man acɔl Jeruca, nyan de Dhadok.

² Acï këpiɛth looi në Bɛ̈nydït nɔm, ka cït ka wään ye Yudhia wun ke looi, ku acïï cït wun akën kërac looi në nyum de wal ŋïr, ku akën yiëth lam ë Luaŋdïtic. Ku kɔc aake ŋoot ke ke loi karɛc.

³ Ku ee melik Jotham yen ë yïk kal Thoŋ de Luaŋdït të lɔ Rut, ku looi luɔi dït në kal ë pänydït guöp, në wut biäk de Jeruthalem cɔl Opɛl.

⁴ Ku yïk pɛ̈ɛ̈nydït në piny ë kuur de Juda yic, ku yïk ɣööt bär ku ɣään cï gël në roor tɔ̈u ë kuriic.

⁵ Go tɔŋ luöi melik de Ammon kekë remdɛn de tɔŋ ku tiɛɛm keek. Ku tɔ kɔc ke Ammon kut en wëu në run yiic kadiäk, ku kuënden kï: Aguum kadiäk ku bot kaŋuan 3,400 de ateek, ku agum töŋ1,000 de tɔn de agamɔ, ku agum töŋ1,000 de tɔn de barli.

⁶ Go melik Jotham lɔ ke ŋuak riɛlde nyin, në biäk cï yen Bɛ̈nydït Nhialicde riëëu.

⁷ Ku këriëëc ëbɛ̈n cï Jotham looi, ku tɔɔŋke kedhie, ku kuɛɛrke, acï ke gɔ̈ɔ̈r në awerek de kathɛɛr ke meliik ke Yithriɛl ku Juda yiic.

⁸ Jotham aaye run thiërrou ku dhïc wään dɔm en bääny, go bääny muk ë Jeruthalem në run kathiëër ku dhetem.

⁹ Go Jotham thou, go tɔ̈ɔ̈u Pänydït de Debid yic, ago Aɣadh wënde lɔ ë nyinde yic ke ye melik.