2 Lëk 26 - JAM DE NHIALIC 2011

Yudhia Melik de Juda

¹ Na ɣɔn ke kɔc ke Juda ë ke kuany Yudhia wën de Amadhia ke ye Melik ë nyin de wun yic, ku aaye run thiëër ku dhetem.

² (Na ɣɔn ë thon de Amadhia cök ke Yudhia ë be Elath ɣɔn cï peec puk nɔm ku be pänydït yïk.)

³ Yudhia aa dɔm bääny ke ee run thiëër ku dhetem, go bääny muk ë Jeruthalem në run kathiërdhïc ku rou. Man acɔl Jekolia në Jeruthalem.

⁴ Acï këpiɛth looi në Bɛ̈nydït nɔm, kapiɛth cït ka wään cï Amadhia wun ke looi.

⁵ Ɣɔn pïïr ë Dhekaria raandɛn ee ye wɛ̈ɛ̈t, Yudhia aaye Bɛ̈nydït riëëu, ago Nhialic thieei.

⁶ Na wën ke Yudhia lɔ tɔŋ thɔ̈ɔ̈r ke Pilithiin. Go kɛ̈l ke pɛ̈ɛ̈nydït ke Gath, ku Jamina, ku Acedɔd jäp piny, ku yïk pɛ̈ɛ̈nydït cï gël tëthiääk kekë Acedɔd ku piiny kɔ̈k ke Pilithiin yiic.

⁷ Go Nhialic ye kuɔny bïï Pilithiin tiaam kekë kɔc ke Arab rɛ̈ɛ̈r në Gurbaal, ku Munit.

⁸ Go kɔc ke Ammon Melik Yudhia kuöt athölbö, ago nyin jɔ riɛl aläl abï lɛcde ɣet Rip.

⁹ Na wën ke Yudhia ë tɔ pänydït de Jeruthalem tɔ gël aril, ku yïk ɣööt bär në kal Thoŋ de Aguk, ku në kal Thoŋ ë Wak, ku në Aŋel, të ye kal rɔt yal.

¹⁰ Ku yïk ɣööt ril bär në jɔ̈ɔ̈ric ku wec yith ke pïïu, në biäk de yen nɔm ɣɔ̈k juëc në kur nu të lɔ aköl athɛ̈i ku në riaaŋ nɔm. Ku në biäk nhiɛɛr en pɔ̈ɔ̈r, aaye kɔc riit piɔ̈ɔ̈th bïk duum ke enap com ë kur thäär ku në tiɔɔm piɛth yic.

¹¹ Ku Yudhia aa de nɔm rem dïït ë tɔŋ cï rɔt guiir në tɔŋ. Ku kuënden amuk ë kɔc ee käŋ gɔ̈ɔ̈r yï Jeyel ku Maathia, ku Ɣanania ee bɛ̈nyden, raan de kɔc ke melik.

¹² Ku bäny ke rem de tɔŋ ayek aguum kaarou ku bot kadhetem (2,600).

¹³ Ku rem de tɔŋ nu në kecök ayek aguum bot kadiäk ku dhorou, ku bot kadhïc (307,500) de rem lëu tɔŋ në kɔc de ater ë melik.

¹⁴ Go Yudhia rem de tɔŋ gäm kööt, ku tɔɔŋ, ku akuup, ku aluluut dhïl ee guöp gël, ku dhɛ̈ŋ, ku wiɛth, ku kur ye ë kɔc biöök.

¹⁵ Ku kɔc pel nïïm tɔ̈u në Jeruthalem acïk ka bïï ë dhɛ̈ŋ aa moc thɔ̈ɔ̈th, aye ke tääu në ɣööt bär nïïm ku aguuk ke kɛ̈l ke pänydït bär. Go lɛcde ɣet tëmec, në biäk de kuɔny cï yök tëde Nhialic.

Yudhia Aluiyë Kërac në biäk de Lɛc

¹⁶ Na ɣɔn cï melik Yudhia rɔt yök ke cï riɛl, go rɔt lɛɛc, ku kënë acï yen bɛ̈n tɔ wiɛ̈ɛ̈k ë awäcic. Acï Luaŋdïït de Nhialicde riɔ̈ɔ̈k ago wal ŋïr lɔ nyop ë yïïŋ de nyum ë wal ŋïr nɔm.

¹⁷ Go Adharia bɛ̈ny de kake Nhialic, ku bäny ke kake Nhialic ril piɔ̈ɔ̈th kathiërbɛ̈t melik kuany cök

¹⁸ bïk lɔ jɔ̈ɔ̈ny, gokï lueel an, “Yudhia! Yïn cïn nɔm yic bä wal ŋïr nyuöp Bɛ̈nydït. Ee luɔi de bäny ke kake Nhialic kapäc, käu de Aron, kek acï gäm ee luɔiyë, bïk aa looi. Jël ee tëɣeric. Yïn cï Bɛ̈nydït Nhialic lat, ka yïn cïï nɔm be dɛ athiɛɛide.”

¹⁹ Na wën aa ŋoot Yudhia ke kääc ë Luaŋdïtic në yïïŋ de nyum ë wal ŋïr lɔ̈ɔ̈m ke muk thaŋ ye wal ŋïr nyop ë yeciin. Go göth ke bäny ke kake Nhialic, ago wɛth ye dɔm ë yenɔm tueŋ ënɔɔnthiinë.

²⁰ Ago Adharia ku bäny kɔ̈k ke kake Nhialic melik woi guöp ke ke cï nïïm mum, agokï ciɛɛc biic ë Luaŋdïtic. Go kat ke lɔ biic, në biäk cïï Bɛ̈nydït ye luöi këtuc.

²¹ Në pïïr de yic ëbɛ̈n melik Yudhia acï bɛ̈n ŋoot ke de guöp wɛth agut cï thonde. Acï yen bɛ̈n pɛ̈n lɔ ë Luaŋdïtic, go aa rëër ɣönde, ku nöm luɔi ëbɛ̈n tëde yen, ku gëmë luɔi Jotham wënde ago aa melik ë nyin de yic.

²² Këriëëc ëbɛ̈n cï Yudhia looi, gɔl tueŋ leer ciëën, acï tiët Yithaya wën de Amodh ke gɔ̈ɔ̈r.

²³ Go Yudhia thou, go lɔ tɔ̈ɔ̈u ke wärken piny tɔ̈u ë rɛ̈ŋ ke meliik thïn, ku në biäk de yen guöp wɛth akënë tɔ̈ɔ̈u ë rɛ̈ŋ ke meliik yiic. Go Jotham wënde lɔ në nyinde yic ke ye melik.