2 Lëk 22 - JAM DE NHIALIC 2011

Aɣadhia Melik de Juda

¹ Cuɛ̈ɛ̈r kɔ̈k ke Arab acïk tɔŋ luöi melik Jeɣoram, gokï mïth ke Jeɣoram nɔ̈k kedhie alee döŋ ke ye Aɣadhia wëndɛn koor. Ago kɔc ke Jeruthalem Aɣadhia dɔm ke ye melik në nyin de wun yic.

² Aɣadhia aa dɔm bääny ke ee run thiërŋuan ku rou, go bääny muk ë Jeruthalem në ruöön tök.

³ Aɣadhia acï kuɛɛr ke melik Aɣap kuany yiic. Man acɔl Athalia nyan de melik Aɣap, ku ye nyan de nyan de melik Omri de Yithriɛl, ee yen ee ye riit piɔ̈u bïï luɔi rac looi.

⁴ Acï karɛc looi në Bɛ̈nydït nɔm, ku wään cïï wun thou, go kɔc kɔ̈k nu ë baai melik Aɣap yen aa kuɔny, gokï bɛ̈n thɛl wei, ku tɔkï wiɛ̈ɛ̈k.

⁵ Në luɔi cï yen jamden piŋ, go mat kekë Joram melik de Yithriɛl, bïk lɔ thɔ̈ɔ̈r ë Ɣadhiɛl melik de Thiriya. Go rɛm ke tɔŋ rɔ̈m në Ramoth ë Giliyad, ago Joram yiɛ̈k guöp buɔ̈t në tɔŋic.

⁶ Go rɔt pɔ̈k Jedhreel ke bï guöp lɔ waar në bɔ̈ɔ̈t ɣɔn cï ke yök në Rama, wään thɔ̈ɔ̈r en kekë Ɣadhiɛl melik de Thiriya. Go Aɣadhia wën de Jeɣoram melik de Juda lɔ tëde Joram wën de Aɣap ë Jedhreel le tïŋ, në biäk ee de yen guöp juäi.

⁷ Nhialic aa tɔ Aɣadhia lɔ tëde Joram, ago aa kë bï yen tɔ thou. Na wën ŋoot Aɣadhia ëtɛ̈ɛ̈n, ago lɔ biic kekë Joram bïk lɔ yök ë raan cɔl Jeɣu wën ë Nimci, raan cï Bɛ̈nydït lɔc bï dhiën de Aɣap riɔ̈ɔ̈k.

⁸ Të wën looi ë Jeɣu kë cï Nhialic gäm en bï yen dhiën de Aɣap riɔ̈ɔ̈k, go piny räm kekë kuut de bäny ke Juda, ku wɛ̈ɛ̈t ke mïthëkɔcken ke Aɣadhia kɛny ë yen. Go Jeɣu ke nɔ̈k kedhie.

⁹ Na wën ke Aɣadhia ë kɔɔr, ago lɔ yök ke cï lɔ thiaan Thamaria agokï yiɛ̈n Jeɣu ku näk. Ku acïk guöpde bɛ̈n tɔ̈ɔ̈u në riëëu në biäk de kuɛɛrë melik Jeɣocapat, raan cï këriëëc ëbɛ̈n looi ke luui Bɛ̈nydït. Acïn raan töŋ de dhiën de Aɣadhia cï bɛ̈n döŋ raan duëër ciɛɛŋ lɔ̈ɔ̈k mac.

Athalia Tiiŋ Melik de Juda

¹⁰ Na wën aa cï Athalia man melik Aɣadhia ye piŋ nɔn cïï wënde nɔ̈k, go kɔc yɔ̈ɔ̈k bïk kɔc baai de melik de Juda nɔ̈k kedhie.

¹¹ Melik Aɣadhia ade nɔm nyanwun cɔl Jeɣoceba, cï thiaak në bɛ̈ny de kake Nhialic cɔl Jeɣoyada. Go wën töŋ de Aɣadhia thiaan, wën cɔl Jowac, go jɔt ë mïth ke melik kɔ̈kkë yiic, mïth kɔɔr bïï ke nɔ̈k, ku le thiaan kekë awut ɣön de tɔ̈c nu ë Luaŋdïtic, ku jɔ muk apiɛth. Në luɔi cï yen en muk ke thiɛɛn, acï bɛ̈n tɔ poth në Athalia cin ke kën nɔ̈k.

¹² Go run kadhetem thöl ke thiaan ɣön ë Nhialic, ku ŋoot Athalia ke ee yen muk bääny ke ee tiiŋ melik.