2 Lëk 21 - JAM DE NHIALIC 2011

¹ Go Jeɣocapat thou, go tɔ̈ɔ̈u ë Pänydït de Debid yic, go Jeɣoram wënde lɔ në nyinde yic ke ye melik.

Jeɣoram Melik de Juda

² Jeɣoram wën ë melik Jeɣocapat de Juda ade nɔm mïthëkɔcken kadhetem. Adharia, Jeɣel, Dhekaria, Adhariyau, ku Maikɔl, ku Cepatia.

³ Acïï ë wunden keek gäm adhääp ku ateek juëc, ku lɔ kajuëc kɔ̈k de naamden, ku acï raan ëbɛ̈n ë keyiic tɔ ee bɛ̈ny mac pänydïït tök në pɛ̈ɛ̈nydït ke Juda cï gël yiic. Ku në luɔi ye Jeɣoram kɛ̈ide, acï Jeɣocapat yen gäm bääny bïï lɔ ë nyinde yic.

⁴ Na ɣɔn cï Jeɣoram ciɛɛŋ jɔ dɔm apiɛth, ke jɔ mïthëkɔcken tɔ näk kedhie, ku nɛ̈k bäny kɔ̈k ke Yithriɛl.

⁵ Jeɣoram aa dɔm bääny ke ee run thiërdiäk, go bääny muk ë Jeruthalem në run kabɛ̈t.

⁶ Go luɔi de melik Aɣap ku meliik ke Yithriɛl kɔ̈k kuany yiic, në biäk cï yen nyan töŋ de Aɣap thiaak. Acï karɛc looi në Bɛ̈nydït nɔm,

⁷ ku acïï Bɛ̈nydït kɔɔr luɔi bïï yen bääny de dhiën ë Debid riɔ̈ɔ̈k, në biäk cï yen mät looi kekë Bɛ̈nydït, ku looi gutguut nɔn bïï käu de Debid kɔc wat ë ceŋ.

⁸ Ɣɔn tɔ̈u ë Jeɣoram ë bääny yic kɔc ke Edom acïk Juda rɛɛc, agokï bɛ̈n aa ciɛɛŋ lääu nɔm.

⁹ Go Jeɣoram kekë bäny ke remdɛn ë tɔŋ ku abëël ke tɔŋ lɔ an lek Edom peec. Ago rem de tɔŋ de Edom keek lɔ tuɔɔk cil, na ɣɔnakɔ̈u acïk kɔc ke Edom bɛ̈n dhuɔŋ piny ku bɛ̈nkï.

¹⁰ Kɔc ke Edom acïk Juda rɛɛc ku nömkï nɔmlääu ë kaam mec. Ku në ee kaamë yic pänydït de Libna acï Juda rɛɛc, në biäk cï Jeɣoram Bɛ̈nydït pɔ̈l Nhialic de kuarken.

¹¹ Arëk abïï ɣään ke läm ke yiëth yïk piny ë kuur de Juda yic, ago kɔc ke Juda ku kɔc ke Jeruthalem tɔ lui Bɛ̈nydït awäc.

¹² Go tiët Elija Jeɣoram tuöc awerek, go gɔ̈ɔ̈r an, “Bɛ̈nydït, Nhialic de kuaar Debid, acï yïn maan në biäk kën yïn kueer piɛth wään de wuur melik Jeɣocapat kuany yic, ayï kueer de kuaar melik Atha.

¹³ Yïn cï luɔi piɛth pɔ̈l, ku kuany luɔi de meliik ke Yithriɛl yiic, ku tɔ kɔc ke Juda ku kɔc ke Jeruthalem lui awäc Nhialic, cït man cï melik Aɣap kekë kɔc ɣɔn lɔ në yecök kɔc ke Yithriɛl tɔ lui Nhialic awäc. Ku yïn cï mïthëkɔckun nɔ̈k, kɔc baai de wuur, röör wär yïn ë piɛth.

¹⁴ Në biäk de ee kënë Bɛ̈nydït abï kɔcku, ku mïthku, ku diäärku, luöi këtuc, ku abï kajuëcku riɔ̈ɔ̈k.

¹⁵ Yïn guöp, yïn bï juän ë yäc dɔm, juän bï yï tɔ rem guöp ku ye rɔt ŋuak në akööliic ëbɛ̈n.”

¹⁶ Kɔc kɔ̈k ke Pilithiin ku kɔc ke Arab rɛ̈ɛ̈r të thiääk ke kɔc ke Kuc rɛ̈ɛ̈r ë Kiir yɔu. Acïï Bɛ̈nydït keek tɔ göth ku bïk thɔ̈ɔ̈r ë melik Jeɣoram.

¹⁷ Acïk Juda peec, ku yakkï ka nu ɣön ë bääny, ku peckï diëër ke melik kedhie, ku peckï wɛ̈ɛ̈t ke melik kedhie, alee döŋ ke ye Aɣadhia, wëndɛn koor.

¹⁸ Na wën aa cï kake thök, go Bɛ̈nydït juän de arɛɛm ë yäc bɛ̈ɛ̈i ë melik guöp.

¹⁹ Në run kaarou ke juäi ë lɔ ke ŋuak yenyin, abï melik thou në arɛɛm. Na wën cï thou, akën ë kɔcke ye luöi many dhiëëu kek en, cït man ë kë ye luöi kuarken.

²⁰ Jeɣoram aaye run thiërdiäk ku rou ɣɔn dɔmë yen ke ye melik, go bääny muk ë Jeruthalem në run kabɛ̈t. Acïn kɔc cï piɔ̈ɔ̈th diu wään thou en. Ku acïk bɛ̈n tɔ̈ɔ̈u Pänydït de Debid yic, ku akënë tɔ̈ɔ̈u në rɛ̈ŋ ke bäny yiic.