2 Lëk 2 - JAM DE NHIALIC 2011

Tholomon Akɔɔr bï Luaŋdït Yïk

¹ Na wën ke lueel Tholomon nɔn bï yen Luaŋdït yïk, të bïï ë Bɛ̈nydït aa lam, ku bïï ɣöndɛn ë bääny yïk.

² Go bot kathiërdhorou 70,000 de kɔc tɔ ee kɔc ee käŋ dhëëth, ku tɔ bot kathiërbɛ̈t 80,000 de kɔc guaŋ kur piny ë kuur. Ku ade aguum kadiäk ku bot kadhetem 3,600 de kɔc ee luɔi caath.

³ Na wën ke Tholomon ë tuc thok melik Ɣiram de Tayer an, “Loi luɔi we yɛn, cït man ɣɔn kɔn yïn lui wek ë wäär, melik Debid, wään cïn ye ɣɔ̈c tiim ke thidar yïk en ɣöndɛn ë bääny.

⁴ Yɛn yïk Luaŋdït, bä yɛn Nhialicdï riëëu guöp. Abï aa tëɣeric, të bän aa lɔ̈ŋ thïn wok ë kɔckï ku nyopku wal ŋïr, ku të bïï wok miɔ̈c de kuïn cï pam aa gam ë ceŋ, ku ee të bïï wok miɔ̈c ye nyop ëbɛ̈n gam ë ceŋ miäk ku thëën, ku akööl ke Thabath, ku dhuëëŋ de Wil ë Pɛɛi, ku lɔ akööl kɔ̈k ɣeriic, bïï ke Bɛ̈nydït Nhialicda riëëu guöp. Acï kɔc ke Yithriɛl yɔ̈ɔ̈k bïk ee kënë looi aɣet athɛɛr.

⁵ Acä tak bä Luaŋdït yïk ke dït, në luɔi dïït ë Nhialicda awär yiëth kɔ̈k.

⁶ Ku eeŋa lëu bï Yen yiɛ̈k ɣöt, në luɔi cïï paannhial Yen duëër ɣääc? Yɛn ya ŋa në biäk bän Yen yiɛ̈k ɣöt, ee të bïï ë wal ŋïr aa nyop ë Yenɔm tei.

⁷ Ënɔɔnë tuöc ë yɛn raan atën ŋic luɔi de adhääp, ku luɔi de ateek, ku luɔi de maläŋ, ku lɔ luɔi de wëëth, ku luɔi de lupɔ tɔ̈c, ku lupɔ ayaau, ku lupɔ thith. Yen ee raanë abï bɛ̈n luui kekë kɔc atëët ke Juda ku Jeruthalem cïï Debid wäär keek lɔc.

⁸ Yɛn ŋic tëët de kɔcku në guëŋ ye keek tiim guaŋ, yen them bä yɛn tuöc tiim ke thidar, ku ameth ku tiim ke Lebanɔn. Yɛn cï rɔt guiir bä kɔckï tuɔɔc bïk kɔcku lɔ kony

⁹ ke ke bï tiim juëc bɛ̈n ɣääric. Në biäk kaar ɛn bä Luaŋdït yïk, abï dhil dït arëët ku piɛth.

¹⁰ Ku yɛn bï kɔcku tuöc aguum kaarou 2000 de tɔn de agamɔ, ku aguum kaŋuan 4000 de tɔn de barli, ku aguum bot kaŋuan 400,000 de litïïr ke mɔ̈u, ku aguum bot kaŋuan 400,000 de litïïr ke miök de olip.

¹¹ Go Ɣiram melik de Tayer Tholomon gäär awerek an, “Në biäk nhiɛɛr ë Bɛ̈nydït kɔcke, yen acï yen yïn tɔ ye melikden.

¹² Athiɛɛi de Bɛ̈nydït Nhialic de Yithriɛl, Aciëŋ ë cak tënhial ku tëpiny! Acï Melik Debid yiëk mɛnh pelnɔm, cï thiäŋ kekë ŋïnydekäŋ ku riɛl ëbɛ̈n, raan ŋic luɔi bï yen Luaŋdït ë Bɛ̈nydït yïk, ku ɣöndɛn ë bääny.

¹³ Yïn tuöc raan atën pelnɔm cɔl Ɣuram.

¹⁴ Man ee nyan dhiën de Dan ku wun ë raan ë bɔ̈ ë Tayer. Yen aa atën ee käŋ thɔ̈ɔ̈th në adhääp, ku maläŋ, ku ateek, ku wëëth, ku kur, ku tiim. Yen aduëër lupɔ aräu, ku lupɔ ayaau, ku lupɔ thith amujuŋ, ku lupɔ piɛth lɔ mot looi. Yen aa atën ee käŋ thɔ̈ɔ̈th kedhie, agut të cïï ë yen yɔ̈ɔ̈k an looi wulë, luɔi cï gäm en aye looi ë tëët. Tɔ lui kekë atëëtku, ku lui ke kɔc wään cï ee wuur melik Debid luööi.

¹⁵ Ka ënɔɔnë tuöc ë wook agamɔ, ku barli, ku mɔ̈u, ku miök de olip wään cï lueel.

¹⁶ Ku wok bï tiim ke thidar kɔɔr ëbɛ̈n yep ë kur ke Lebanɔn nïïm, ku dut keek ë thiekic, ku abï kuëër ë wɛ̈ɛ̈r ke kuaath Jopa. Ku ëtɛ̈ɛ̈n abä keek jɔ lɛɛr Jeruthalem.

Yïŋ de Luaŋdït Agɔl Rɔt

¹⁷ Na wën ke melik Tholomon tɔ kɔc gäär ago kuën de alɛi nu ë Yithriɛl ŋic, ke cït ke kuɛ̈n wään cï Debid wun kɔn looi. Go bɔt ku thiërdhïc ku diäk de agum ku bot kadhetem 153,600 de alɛi yök.

¹⁸ Go bot kathiërdhorou 70,000 de kɔc tɔ dhëth tiim, ku tɔ bot kathiërbɛ̈t 80,000 de kɔc guaŋ kur piny ë kuur, ku tɔ aguum kadiäk ku bot kadhetem 3,600 de kɔc, ee kɔc ee luɔi caath.