2 Lëk 19 - JAM DE NHIALIC 2011

Tiët Ajiëëm Jeɣocapat

¹ Go Jeɣocapat melik de Juda yenɔm pɔ̈k ciëën ɣöndɛn ë bääny ë Jeruthalem ke piɔl guöp.

² Na wën ke Jeɣu wën de Ɣanani monydaai, lɔ rɔ̈m kekë melik ku lëk en an, “Ye tak ee yic bä kɔc ee karɛc looi kony, kɔɔr bä lɔ kɔ̈ɔ̈c we kɔc man Bɛ̈nydït? Kë cï looiyë acï agönh de Bɛ̈nydït bɛ̈ɛ̈i ë yïguöp.

³ Ku cakaa nɔn tɔ̈u en aya, ade këpiɛth ë yïguöp. Yïn cï kïït ke yanh tik Acera ye kɔc lam nyaai, ku acï them bä këde piɔ̈n ë Bɛ̈nydït kuany yic.”

Jeɣocapat Akim Luɔi Piny

⁴ Acakaa nɔn rëër ë Jeɣocapat në Jeruthalem, aaye dap keny ke lɔ të tɔ̈u kɔc thïn, gɔl ë Biirceba të lɔ wöuwic leer piny ë kuur de Eparaim, të lɔ rut, në biäk bïï yen kɔc cɔɔl bïk Bɛ̈nydït gam, Nhialic de kuarken.

⁵ Go bäny ke luk kuany në pɛ̈ɛ̈nydït ke Juda cï gël yiic kedhie

⁶ ku jiëëm keek an, “Bïk löŋ ŋiëc guiir, wek cïï lui në riɛl de kɔc tei, wek lui ë riɛl de Bɛ̈nydït, ku atɔ̈u ke week të tɛɛm wek löŋ.

⁷ Riëëukï Bɛ̈nydït ku luöikï apiɛth, në biäk cïï Bɛ̈nydït Nhialicda kɔc ee tek yiic, ku acïï ruëëny ee kɔɔr ku acïï kum thok ee kɔɔr.”

⁸ Go Jeɣocapat bäny ke kake Nhialic ku Lebai kuany ë Jeruthalem, ku kuɛny kɔc kɔ̈k në röördït ke baai yiic, bïk aa bäny ke luk, në biäk ë löŋ de Bɛ̈nydït, ku luelkï göny ke agööth ke kɔc ceŋ pänydït.

⁹ Go Jeɣocapat ke jääm an, “Wek bï dhil luui në riɔ̈ɔ̈c ë Bɛ̈nydït, ku bäk riëëu në piɔ̈n adöt ë këriëëc yic ëbɛ̈n.

¹⁰ Na de mïthëkɔckuön cï göny bɛ̈ɛ̈i në pɛ̈ɛ̈nydït kɔ̈k yiic, göny de yic nääk, ku lööŋ ke piööc, ku nɔn ee ye kek lööŋ ke Bɛ̈nydït, ku lööŋ ke ciɛɛŋ, ayï lööŋ kɔ̈k, abäk keek dhil jääm apiɛth, bïk löŋ ŋiëc guiir apiɛth, agokï tɔ̈u ke ke cïn gup awɛ̈ɛ̈c tëde Bɛ̈nydït, ku na cäkï lɔ looi aya, ke Bɛ̈nydït abï piɔ̈u rac ke week në kɔckun. Ku na lak luɔidun lɔ looi, we bï gup ciɛ̈n awäc.

¹¹ Ku Amaria bɛ̈ny de kake Nhialic yen abï lööŋ de kake Nhialic aa teem kedhie, ku Dhebadia wën de Yicmiɛl, bɛ̈ny de Juda yen abï löŋ de luök ke ciɛɛŋ aa teem kedhie. Ku kɔc ke Lebai abïk lööŋ ke luök aa tïŋ na cï ke thöl ë luɔi kedhie. Riɛtkï wepiɔ̈ɔ̈th ku luɔikï ee luɔiyë, ku Bɛ̈nydït abï tɔ̈u në biäk ë kɔc de nïïm yic!”