2 Lëk 17 - JAM DE NHIALIC 2011

Jeɣocapat Adɔm ke ye Melik

¹ Go Jeɣocapat lɔ në nyin de wun yic ke ye melik, go rɔ ŋuɛk ë riɛl bïï yen thɔ̈ɔ̈r ke Yithriɛl.

² Acï rem de tɔŋ nyuööc ë pɛ̈ɛ̈nydït ke Juda cï gël yiic, ku bɛ̈i ke Juda yiic, ku lɔ pɛ̈ɛ̈nydït cï Atha ke peec piny de Eparaim.

³ Go Bɛ̈nydït Jeɣocapat thieei në biäk cï yen pïïr piɛth tueŋ de wun kuany yic, ku cïï Baal lam.

⁴ Ago Nhialic de wun aa luööi, ku döt lööŋ ke Nhialic, ku akën luui në kuɛɛr ke meliik ke Yithriɛl.

⁵ Go Bɛ̈nydït Jeɣocapat gäm riɛl mɛc en ciɛɛŋ de Juda, ago kɔc kedhie yen yiɛ̈n miɔ̈c, ago bɛ̈n aa raan de nɔm kajuëc ku riëëuwë aläl.

⁶ Aa mit piɔ̈u aläl ke luɔi bï en Bɛ̈nydït luööi, go ɣään ye yiëth lam thïn jäp piny kedhie, ku yep kïït ke yanh tik Acera piny ë Juda.

⁷ Na ɣɔn aacï run aa diäk ë bääny yic ke ye melik, go kɔckë tooc bïk kɔc lɔ piööc ë pɛ̈ɛ̈nydït ke Juda yiic, Benɣail, ku Obadaya, ku Dhekaria, ku Nethaniɛl, ku Mikaya.

⁸ Ku aake cath ëtök në bäny ke kake Nhialic kaarou ku kɔc ke Lebai kadhoŋuan. Rin ke kɔc ke Lebai kï: Cemaya, ku Nethania, ku Dhebadia, ku Athaɣel, ku Cemiramoth, ku Jeɣonathan, ku Adonija, ku Tobija, ku Tobadonija, ku rin ke bäny ke kake Nhialic kï, Elicama ku Jeɣoram.

⁹ Aake muk awerek de löŋ de Bɛ̈nydït, ku jɔkï caath në wuöt ke Juda yiic kedhie, ke ke wɛ̈ɛ̈t kɔc në yen.

Dït de Jeɣocapat

¹⁰ Na wën ke Bɛ̈nydït ë tɔ ciɛɛŋ thiɔ̈k ëtɛ̈ɛ̈n riɔ̈c, në luɔi bï kek lɔ thɔ̈ɔ̈r ë melik Jeɣocapat.

¹¹ Ago kɔc ke Pilithiin acïk melik Jeɣocapat gäm ateek juëc aläl ku lɔ miɔ̈c kɔ̈k aya, ku lɔ kɔc kɔ̈k ke Arab acïk yen yiɛ̈n aguum kadhorou ku bot kadhorou 7,700 de amɛ̈l, ku aguum kadhorou ku bot kadhorou 7,700 de nyök bɔɔth.

¹² Ago melik Jeɣocapat bɛ̈n lɔ tueŋ ke ŋuak riɛlde nyin ku yïk gëlgël ril ku pɛ̈ɛ̈nydït ë Juda yic ëbɛ̈n,

¹³ të bïï kajuëc aa tɔ̈ɔ̈u thïn. Go bäny ke rem de tɔŋ ril tääu ë Jeruthalem,

¹⁴ në dhiën thook kedhie. Adina yen aye bɛ̈ny de rem ë tɔŋ, ee raan dhiën ë Juda, ku ade cök aguum bot kadiäk 300,000 de rem ë tɔŋ.

¹⁵ Bɛ̈ny de rem ë tɔŋ lɔ yecök acɔl Jeɣoɣanan, ku ade cök aguum bot kaarou ku thiërbɛ̈t 280,000 de rem de tɔŋ,

¹⁶ ku bɛ̈ny ee kek diäk acɔl Amathia wën de Dhikiri, ku ade cök aguum bot kaarou 200,000 de rem de tɔŋ. (Amathia aa cï rɔt gaam bï Bɛ̈nydït luööi.)

¹⁷ Ku bɛ̈ny ë rem de tɔŋ në dhiën de Benjamin yen aye Eliada, raan ŋeny arëët, ku ade cök aguum bot kaarou 200,000 de rem de tɔŋ muk kööt ku dhɛ̈ŋ.

¹⁸ Ku bɛ̈ny lɔ në yecök acɔl Jeɣodhabad, ku ade cök agum bɔt ku thiërbɛ̈t 180,000 de rem de tɔŋ ŋic tɔŋ thɔ̈ɔ̈r.

¹⁹ Kek ee kɔckë aake luui në melik ë Jeruthalem, ku acï rem de tɔŋ däŋ nyuööc ë pɛ̈ɛ̈nydït kɔ̈k ke Juda yiic ëbɛ̈n.