2 Lëk 16 - JAM DE NHIALIC 2011

Nuɛɛn ke Yithriɛl

¹ Na ɣɔn ë ruöön thiërdiäk ku dhetem ë bääny de Atha yic melik de Juda, go Baaca melik de Yithriɛl Juda yiɛ̈n tɔŋ, ku gɔl ë luöi yïk en Rama gëlgël, ago kuɛɛr thiöök thook kedhie, kuɛɛr ee bɛ̈n Juda ku ka lɔ biic.

² Go Atha ateek ku adhääp nööm Luaŋdït ku ɣön ë bääny ku tooc keek Damathko, tucke Benɣadad melik de Thiriya, ku tɔ thön tɔ lɔ lueel en an,

³ “Wok bï määth, cïn man ɣɔn tɔ̈u ë wärkuɔ. Kënë ateek ku adhääp ayek miɔ̈c gäm keek yïn. Ku ënɔɔnë tɔ määthdun pɔ̈k wekë Baaca melik de Yithriɛl ago remdɛn ë tɔŋ nyaai në wuötkï yiic.”

⁴ Na wën ke melik Benɣadad gam kë cïï melik Atha tak, ku tooc bänykɛn de rem de tɔŋ, bïk pɛ̈ɛ̈nydït ke Yithriɛl lɔ mak. Gokï Yijon peec, ku Dan, ku Abel Beth Maaka, ku lɔ pɛ̈ɛ̈nydït ke Naptali kedhie të ye käŋ tɔ̈ɔ̈u thïn.

⁵ Na wën aa piŋ melik Baaca kë cï rɔt looi, go luɔi yïk en Rama tɔ kääc, ku pɛ̈l luɔi.

⁶ Na wën ke melik Atha ë kut röör ke piny de Juda ëbɛ̈n, ku yöök keek bïk kur ku tiim, wään kɔɔr ë melik Baaca an, yïk en Rama dhëëth, bïï kek Geba ku Midhpa lɔ yiɛ̈k gëlgël.

Tiët Ɣanani

⁷ Na ɣɔn aköölkë yiic ke Ɣanani monydaai lɔ tëde melik Atha ku lueel an, “Në biäk cïï yïn rɔt kan në melik de Thiriya ku päl nɔn kɛn yïn rɔt në Bɛ̈nydït Nhialicdu, yen kën ë tɔ rem de tɔŋ ë melik de Yithriɛl bän ë yïciin ka.

⁸ Kɔc ke Ethiopia ku kɔc ke Libiya ë ke cïï nïïm de rem de tɔŋ dït arëët, ku abëël ke tɔŋ juëc, ku kɔc juëc cath ë jöŋgöör kɔ̈ɔ̈th? Në biäk cïï yïn rɔt kan në Bɛ̈nydït wään, acï keek bɛ̈n tiaam.

⁹ Bɛ̈nydït ee pinynɔm caath ku woi, ke bï riɛl gäm kɔc piɛth piɔ̈ɔ̈th ee yen riëëu. Yïn cï tak cït man ë dhɔ̈n, gɔl ënɔɔnë leer tueŋ, yïn bï tɔ̈u ë tɔɔŋ yiic.

¹⁰ Kënë acï Atha bɛ̈n tɔ diu piɔ̈u kekë monydaai, ago tɔ dɔm ku rek. Yen ee kaamë yic yen aacï Atha kɔc kɔ̈k bɛ̈n yɔŋ ë yaaŋ rac.

Thök de Bääny de Atha

¹¹ Ka cï melik Atha keek looi kedhie, gɔl tueŋ leer ciëën, acï ke gɔ̈ɔ̈r në awerek de kathɛɛr ke meliik ke Juda ku Yithriɛl yiic.

¹² Na ɣɔn aacï run aa thiërdiäk ku dhoŋuan ë bääny yic ke ye melik, go ë buɔ̈t dït dɔm cök abï yen tɔ ŋɔl, ku akën rɔt bɛ̈n pɔ̈k Bɛ̈nydït bï ye kony, aaye lɔ tëde akim.

¹³ Na ɣɔn ë run kaarou yiic go thou,

¹⁴ ago lɔ tɔ̈ɔ̈u në raŋdɛn cï guëŋ rɔt ë kuuric ë Pänydït de Debid yic. Gokï wal ŋïr nyop ku miök de aŋiëër, guiir kek guöpde në biäk de täude, ku jɔkï many dïït agök tɔŋ dhiëëu kek thonde.