2 Lëk 14 - JAM DE NHIALIC 2011

Melik Atha Atiam Kɔc ke Kuc

¹ Go Abija thou, gokï tɔ̈ɔ̈u ë rɛ̈ŋ ke bäny yiic në Pänydït de Debid yic. Ago Atha wënde lɔ në nyinde yic ke ye melik. Go piny dɛ mät në run kathiëër.

² Atha acï këpiɛth looi ë Bɛ̈nydït Nhialicde nyin.

³ Acï yïk ke alɛi nyaai ku nyiɛɛi ɣään ke läm de yiëth, ku dhoŋ waikɛn yaath piny ayï kurken, ku yep kïït ke yanh tik Acera piny.

⁴ Acï kɔc ke Juda yɔ̈ɔ̈k bïk këde Bɛ̈nydït Nhialic de kuarken aa looi, ku bïk wëëtde aa riëëu ku dötkï lööŋke kedhie.

⁵ Në biäk cï yen ɣään ke läm de yiëth nyaai në Juda yic, ku nyiɛɛi të ye wal ŋïr nyop. Go ciɛɛŋ jɔ dɛ mät në bäänyde yic.

⁶ Atha acï gëlgël tɔ yïk ë pɛ̈ɛ̈nydït ke Juda yiic në aköölkë yiic, ku acï bɛ̈n dɛ run juëc ke cïn tɔŋ, në biäk cïï Nhialic yen gäm mät.

⁷ Ago lɛ̈k kɔc ke Juda an, “Gëlku pɛ̈ɛ̈nydït në yïŋ de gëlgël ku ɣööt bär, ku athïïn bïï keek aa thiöök ku gɛ̈ɛ̈rë keek. Ku në biäk cï wok këde piɔ̈n ë Bɛ̈nydït Nhialicda looi yen atɔ wook muk ee pinyë. Yen acï wook gël ku gëm wook nɔm lääu në biäk kedhie. Gokï baai jɔ yïk ku jɔkï kuɛth.

⁸ Melik Atha aa de nɔm aguum bot kadiäk 300,000 de rem de tɔŋ ë Juda muk tɔɔŋ ku kööt, ku aguum bot kaarou ku thiërbɛ̈t 280,000 de rem de tɔŋ ë Benjamin muk kööt ku dhɛ̈ŋ. Ayek röör jööt cï ŋiëc wɛ̈ɛ̈t kedhie.

⁹ Na ɣɔn ke raan de Kuc cɔl Dhera ë yïn tɔŋ Juda ke cath ke aguum kathiëër ke aguum 1,000,000 de rem de tɔŋ, ku aguum bot kadiäk 300,000 de abëël ke tɔŋ, abïï ɣet Mareca.

¹⁰ Go melik Atha lɔ biic bï lɔ piɔ̈t kekë yen, ku jɔ kuut kedhie kɔ̈ɔ̈c ë ɣäänken, në Wak de Dhepatha yic të thiääk kekë Mareca.

¹¹ Na wën ke melik Atha ë läŋ Bɛ̈nydït Nhialicde an, “Bɛ̈nydït, Yïn de nɔm riɛl duëër Yïn rem de tɔŋ kɔ̈c kony cït man de rem de tɔŋ ril. Kony wook ënɔɔnë, Yïn Bɛ̈nydït Nhialicda, në biäk kɛn wok röt në Yïn, ku në rinku yen abïï wok biic buk bɛ̈n thɔ̈ɔ̈r në rem dïït ë tɔŋë. Bɛ̈nydït, Yïn ee Nhialicda, acïn raan duëër ye ŋɔ̈ɔ̈th bïï Yïn tiaam.”

¹² Go Bɛ̈nydït rem de tɔŋ de Kuc tiaam të wën cïï melik Atha kekë remdɛn de tɔŋ keek mak, go kɔc ke Kuc kat.

¹³ Ago Atha kekë remdɛn ë tɔŋ keek cop abïk ɣet Jiraar. Go rem de tɔŋ juëc de Kuc bɛ̈n nɔ̈k ë tɔŋ yic, abïk tɔ̈u ke ke cïï kenïïm be kut tëtök bïk thɔ̈ɔ̈r. Kɔc ke Kuc acï ke tiaam liŋliŋ abïï ciɛ̈n raan töŋ dɔ̈ŋ ke pïïr. Acïï Bɛ̈nydït keek tiaam kekë remdɛn de tɔŋ, ago rem de tɔŋ kajuëc cï peec rum.

¹⁴ Na wën ke ke riɔ̈k pɛ̈ɛ̈nydït thiääk në Jiraar, në biäk cïï kɔc ë tɔ̈u ëtɛ̈ɛ̈n riɔ̈ɔ̈c në Bɛ̈nydït. Go rem de tɔŋ pɛ̈ɛ̈nydït tɔ̈u ëtɛ̈ɛ̈n yak yiic kedhie ku rumkï kajuëc.

¹⁵ Ku acïk pɛɛny ke kɔc ee tiit mak aya, ku rumkï thök juëc ku thɔ̈rɔ̈ɔ̈l. Na wën ke ke jɔ röt bɛ̈n pɔ̈k Jeruthalem.