2 Lëk 13 - JAM DE NHIALIC 2011

Tɔŋ de Abija kekë Jerobowam

¹ Në ruöön ye Jerobowam melik de Yithriɛl run thiëër ku bɛ̈t, go Abija aa melik de Juda,

² ago bääny muk ë Jeruthalem në run kadiäk. Man acɔl Mikaya nyan de Yuriel, në wun cɔl Gibia. Na wën ke tɔŋ ë loi rɔt në kaam de Abija kekë Jerobowam.

³ Go Melik Abija aguum bot kaŋuan 400,000 de rem de tɔŋ kuany, ku kuany Jerobowam aguum bot kabɛ̈t 800,000 de rem de tɔŋ.

⁴ Na wën ke tɔŋ ë räm në piny ë kuur de Eparaim yic. Go melik Abija lɔ nhial në kuur de Dhemaraim nɔm, ku cɔɔl Jerobowam kekë kɔc ke Yithriɛl ë röl dït, lueel an, “Piɛŋkï kë lɛ̈k week!” Go lueel an,

⁵ “Kuöckï nɔn cïï Bɛ̈nydït Nhialic de Yithriɛl, män cïï kɔ̈u bï tɛɛm looi kekë Debid, ku gëm keek bääny de Yithriɛl kekë kuatde bïk cieŋ aɣet athɛɛr?

⁶ Go Jerobowam wën de Nebat melik Tholomon rɛɛc.

⁷ Na wën ke mɛ̈ɛ̈t kuut de kɔc ee karɛc looi yiic, ku tɔ keek tɔ reec Reɣobowam wën ë Tholomon, në biäk koor en ku cïï käŋ ŋic në baŋ bï yen thɔ̈ɔ̈r ke keek.

⁸ Ku ënɔɔnë wek kɔɔr bäk thɔ̈ɔ̈r wekë kɔc cï Bɛ̈nydït gäm Debid kekë kuatde. Wek de nïïm rem dïït de tɔŋ, ku cathkï në thon ë weŋ, cï Jerobowam cuëëc në adhääp bïï aa yanhduön.

⁹ Ku wek cï bäny ke kake Nhialic de Bɛ̈nydït kuat de Aron, cuɔp wei, ku cuɔpkï kɔc ke Lebai wei aya. Ku jakï guc kuany në nyïïnken yiic cït man ye juöör ke piny nɔm yen looi. Ago na de raan cï miɔɔr ku nɔn yen thök kadhorou bɛ̈ɛ̈i, ka bïï kuany ke ye guny de yiëthkuönkë.

¹⁰ “Ku wok ŋoot ke wo luui Bɛ̈nydït Nhialicda ku akënku nyääŋ piny. Ku bäny ke kake Nhialic kuat de Aron ayek ŋoot ke ke loi luɔiden, ku aye kɔc ke Lebai ke kuɔny.

¹¹ Ku në aköölnyïïn kedhie miäk rial ku thëën, ayek Bɛ̈nydït miɔɔc në wal ŋïr, ku miɔ̈c ye nyop ëbɛ̈n. Ku gɛmkï kuïn cï pam në paam cï looi në adhäm awai nɔm, ku thëën ëbɛ̈n ayek mɛ̈ckealath kääc në kë cï looi adhääp dɛ̈ɛ̈p thook. Wok ee kë cïï Bɛ̈nydït lɛ̈k wook looi, ku week acäk nyääŋ piny.

¹² Nhialic guöpde ee yen ee Bɛ̈nydïïtda, ku bänykɛn ke kake Nhialic atɔ̈ukï ee tënë ke ke muk kɛŋ, acïk röt coc bïk kɛŋ kooth, ku ciɛɛlkï wook tɔŋ buk piɔ̈t në week. Kɔc ke Yithriɛl piɛŋkï apiɛth, duökï piɔ̈t ë Bɛ̈nydït, Nhialiny de kuarkun! Wek cïï duëër kɔn tiam!”

¹³ Ku ëtɛ̈ɛ̈n Jerobowam aacï remdɛn de tɔŋ tooc, bïï rem de tɔŋ de Juda lɔ mak ë kekɔ̈ɔ̈th, ku bɔ̈ kɔ̈k ë kenïïm tueŋ.

¹⁴ Ago rem de tɔŋ de Juda röt tïŋ acï tuɔɔk cil. Gokï dhiau arëët ke ke cɔl Bɛ̈nydït bïï ke kony, ago bäny ke kake Nhialic kɛŋ kooth.

¹⁵ Go rem de tɔŋ ë Juda kiɛɛu moc ëröl dït, gokï keek mak ke ke wɛt ë Abija. Go Nhialic rem de tɔŋ de Jerobowam kekë Yithriɛl tiaam,

¹⁶ Na wën ke rem de tɔŋ de Yithriɛl ë kɔt ë rem de tɔŋ de Juda, ago Nhialic keek tɔ tiɛɛm ë Juda.

¹⁷ Go Abija kekë remdɛn ë tɔŋ, rem de tɔŋ de Yithriɛl jɔ tiaam arëët, abïk aguum bot kadhïc 500,000 de rem de tɔŋ ril ë Yithriɛl nɔ̈k.

¹⁸ Ago kɔc ke Juda kɔc ke Yithriɛl jɔ tiaam, në biäk cïï kek röt kan ë Bɛ̈nydït, Nhialic de kuarken.

¹⁹ Ku ŋoot Abija ke cop rem de tɔŋ de Jerobowam ku lee ku dɔm pɛ̈ɛ̈nydït kɔ̈k: Bethel, Jecana, ku Eperon, ku bɛ̈i thiääk në ee pɛ̈ɛ̈nydïtkë.

²⁰ Ku Jerobowam akën riɛl bɛ yök të wään tɔ̈u Abija në bäänyde yic. Na wën ke yup ë Bɛ̈nydït, ago thou.

²¹ Abija acï bɛ̈n riɛl aläl. Ade nɔm diäär kathiëër ku ŋuan. Ku aaye wun wɛ̈ɛ̈t kathiërrou ku rou ku duet kathiëër ku dhetem.

²² Këriëëc ëbɛ̈n cï Abija looi, kuɛɛrke ku ka cï lueel, acï ke gɔ̈ɔ̈r në awerek de kathɛɛr ke tiët Yido yic.