2 Lëk 11 - JAM DE NHIALIC 2011

Nyuuth de Cemaya

¹ Na wën aacï Melik Reɣobowam ɣet Jeruthalem, ke cɔl bot ku thiërbɛ̈t de agum 180,000 de rem de tɔŋ në dhiën de Benjamin ku Juda yic. Akɔɔr bï lɔ piɔ̈t kekë dhiën nu ë biäk të lɔ rut ku bïï ke bɛ̈ɛ̈i ë ciɛɛŋde yic.

² Go jam de Bɛ̈nydït bɛ̈n tëde tiët Cemaya raan de Nhialic bïï

³ lɔ lɛ̈k Reɣobowam wën de Tholomon melik de Juda, ku le lɛ̈k kɔc ke Yithriɛl kedhie, kɔc nu ë Juda ku Benjamin:

⁴ An, “Duökï lɔ thɔ̈ɔ̈r në mïthëkɔckun. Ŋɛk ë ye rɔt pɔ̈k baaide, kënë aa bɔ̈ tëde Yɛn.” Agokï jam de Bɛ̈nydït piŋ ku pukkï röt ë bɛ̈iken yiic, ku akënkï tɔŋ bɛ̈n yiɛ̈n Jerobowam.

Reɣobowam Agël Pɛ̈ɛ̈nydït

⁵ Go Reɣobowam rëër në Jeruthalem ku tɔ gëlgël de pɛ̈ɛ̈nydït tɔ yïk në Juda ku Benjamin.

⁶ Betheleɣem, Etam, Tekowa,

⁷ Bethdhur, Thoko, Adulam,

⁸ Gath, Mareca, Dhip.

⁹ Adoraim, ku Lacic, ku Adheka.

¹⁰ Ku Dhora, Aijalon, ku Ɣebron.

¹¹ Acï gëlgël de pɛ̈ɛ̈nydïtkë tɔ yïk aril ku kuɛny bäny ke rem de tɔŋ në keyiic kedhie, ku tɔ ke miɔc yiic në kacaam, ku miök de olip, ku mɔ̈u,

¹² ku kööt ku tɔɔŋ aya. Ku jɔ dhiën ke Juda ku Benjamin aa muk në ee kueerë.

Bäny ke Kake Nhialic ku Lebai Abïkï Juda

¹³ Na wën ke bäny ke kake Nhialic ku Lebai tɔ̈u në wuöt yiic kedhie lɔ Juda.

¹⁴ Go kɔc ke Lebai duumken ku kajuëckɛn kɔ̈k nyääŋ piny ku lekï rëër paan de Juda kekë Jeruthalem, në biäk cïï Jerobowam melik de Yithriɛl kekë kɔc lɔ ë yecök keek pɛ̈n luɔi de bäny ke kake Nhialic de Bɛ̈nydït.

¹⁵ Na wën ke Jerobowam ë kuëny rɔt guckɛn bï aa lui në ɣään ke läm de yiëth yiic, bïk jɔɔk rac ku yiëth aa lam, yanh cï looi cï thɔn ë weŋ.

¹⁶ Kɔc ke dhiëën ke Yithriɛl kɔɔr bïk Bɛ̈nydït Nhialic de Yithriɛl aa lɔ̈ŋ në piɔ̈nden ëbɛ̈n, acïk kɔc ke Lebai kuany cök lekï Jeruthalem, agokï miɔ̈c aa gäm Bɛ̈nydït, Nhialic de Kuarken.

¹⁷ Yen ee kënë acï ciɛɛŋ de Juda tɔ ril, ku në run yiic kadiäk acïk Reɣobowam wën de Tholomon bɛ̈n kuɔny, agokï rëër apiɛth cït man wään tɔ̈u kek ë melik Debid ku melik Tholomon cök.

Dhiën de Reɣobowam

¹⁸ Reɣobowam acï Maɣalath thiaak, ku wun acɔl Jerimoth wën ë Debid, ku man acɔl Abiɣail, ee nyan ë Eliap wën de Jethe.

¹⁹ Gokï wɛ̈ɛ̈t kadiäk dhiëëth, Jiyuc, ku Cemaria, ku Dhaɣam.

²⁰ Na ɣɔn ke be Maaka thiaak nyan de Abthalom, gokï wɛ̈ɛ̈t kaŋuan dhiëëth: Abija, ku Atai, ku Dhidha, ku Celomith.

²¹ Kuën de diäär ke Reɣobowam kedhie ayek thiëër ku bɛ̈t, ku ade nɔm diëër määthke kathiërdhetem, ku aaye wun wɛ̈ɛ̈t kathiërrou ku bɛ̈t, ku duet kathiërdhetem. Ku aa nhiaar tiiŋ cɔl Maaka aläl në diäärke yiic ku diëër määthke yiic,

²² ku anhiaar wëndɛn Abija wën ë Maaka aläl në wɛ̈ɛ̈tke yiic kedhie, ku kuɛny ke ee yen bï lɔ̈ɔ̈k aa melik ë nyinde yic.

²³ Reɣobowam acï wɛ̈ɛ̈tke kedhie ŋiëc tääu ë luɔi nɔm ëbɛ̈n, ku tek keek ë pɛ̈ɛ̈nydït cï gël yiic, piny de Juda ku Benjamin ëbɛ̈n. Ku gëm keek këriëëc ëbɛ̈n ë dhuëëŋ, ku tɔ keek tɔ de nïïm diäär juëc kedhie.