2 Lëk 10 - JAM DE NHIALIC 2011

Dhiën nu të lɔ Rut Acïk Jaai

¹ Na wën ke Reɣobowam lɔ Cekem, të cïï kɔc ke Yithriɛl nu të lɔ rut kenïïm kut bïk tɔ ye melik.

² Na wën aacï Jerobowam wën ë Nebat, wään cï rɔt kual në melik Tholomon leer Rip, ye piŋ go rɔt pɔ̈k wut.

³ Go kɔc ke dhiëën ke Yithriɛl nu të rut yen cɔɔl, ku lekï tëde Reɣobowam ku lëkkï yen an,

⁴ “Wuur acï kathiek tääu ë woyiëth. Na lɔ ee kethiekë tɔ piɔl ku bä pïïrda tɔ piɔl yic, ke wok bï aa kɔckuön ee yïn luööi.”

⁵ Go Reɣobowam pɔ̈k nɔm keek an, “Gämkï yɛn nïn kadiäk bä yanɔm lɔ tak në kë bä looi. Ku we bï wonïïm dɔ̈k ciëën.” Go kɔc jäl.

⁶ Go melik Reɣobowam röördït wään cï kɔn lui ë wun Tholomon cɔɔl ku lop an, “Ee bɛ̈ɛ̈r täu adï yen kaarkï bä lɛ̈k ee kɔckë?”

⁷ Gokï pɔ̈k nɔm en an, “Na tɔ yïpiɔ̈u kok wekë kɔckë, ku bä keek luöi këdɛn kɔɔrkï, abïk yïn luööi në piɔ̈ɔ̈thken apiɛth.”

⁸ Na wën ke dhäl jam de röördït yic, ku lee tëde rem thii, kɔc wään dhuöök ë yen ëtök ku kek aaye kɔckɛn ee yen jääm ënɔɔnë.

⁹ Ago ke luɔp an, “Eeŋö kaarkï bä looi? Eeŋö bä lɛ̈k kɔc ee ye lueel an bä kathiekken tɔ piɔl?”

¹⁰ Gokï puk nɔm an, “Kë bä lɛ̈k keek kï: ‘Ciin thiindiënë awär wäär kɔ̈u.’

¹¹ Lɛ̈k ë keek an, “Wäär acï we gäm yiëth kathiek, ku abä keek tɔ thiëk awär këde wäär. Aa ye week dui ë wɛt, ke wek bä dui ë wan de jöŋgöör!”

¹² Na ɣɔn aacï nïn kadiäk thök go Jerobowam ku kɔc kedhie kenïïm pɔ̈k melik Reɣobowam, cït man ë kë cï lɛ̈k keek.

¹³ Go melik jam de röördït dhɔ̈l yic ku jiëëm kɔc arac,

¹⁴ Ago melik Reɣobowam ke jääm cït man ë jam de rem thii lueel an, “Wäär acï kathiek tääu në weyiëth, ku abä keek tɔ thiɛk aläl, ku wäär aaye we dui në waat, ku wek bä dui në wan de jöŋgöör!”

¹⁵ Aa ye këde Bɛ̈nydït Nhialic piɔ̈u ago jam wään cï lɛ̈k Jerobowam wën de Nebat në röl de tiët Aɣija raan wun ë Cilo aa yic. Yeka kën ë melik jam lɛ̈k ë kɔc cï bɛ̈n tëde yen piŋ.

¹⁶ Na wën aacï kɔc ye tïŋ nɔn reec ë melik jamden, gokï piɔ̈ɔ̈th rac ku wuoukï an, “Eeŋöda thïn në Debid kekë paanden! Eeŋö cïk kɔn luöi wook? Wek kɔc ke Yithriɛl pukku wonïïm wutic! Jɔ baaidu lɔ̈ɔ̈k tïŋ yïn Reɣobowam!” Go kɔc ke Yithriɛl melik rɛɛc.

¹⁷ Ago Reɣobowam döŋ ke ee melik de kɔc ke Yithriɛl ceŋ Juda kapäc.

¹⁸ Na wën ke melik Reɣobowam ë toc Adoniram, bɛ̈ny nu ë kɔc ee lui ë riɛl nïïm, tuc kɔc ke Yithriɛl, gokï lɔ biɔ̈ɔ̈k ë kur abï thou. Go Reɣobowam kɛɛc në abëldɛn ë tɔŋ yic, ku kuɛl rɔt Jeruthalem.

¹⁹ Gɔl ëtɛ̈ɛ̈n kɔc ke Yithriɛl tɔ̈u ë biäk të lɔ rut acïk bääny de dhiën ë Debid rɛɛc.