2 Kor 9 - JAM DE NHIALIC 2011

Kuɔɔny de Kɔc cïn Käŋ

¹ Ku në këde kuny de kɔc ɣerpiɔ̈ɔ̈th, acïn kë duɛ̈ɛ̈r ɛn ë dhil gäär week.

² Yɛn ŋic thök cä wek thök ë guiɛɛk, en a lɛɛc ɛn rɔt në këdun ë kɔc ke Makedonia nïïm an, “Cï Akaya guɔ thök ë guiɛɛk run wään,” ku lɛ̈th ë weyiic acï kɔc juëc aläl tɔ lëth yiic ayadäŋ.

³ Ku yɛn cï mïthëkɔckuɔ tooc tei ke lɛc leec wok röt ë këdun ke cïï bï aa ɣɔ̈ric në këde cöökë, luɔi bä wek thök ë guiɛɛk, cït man cän e lueel.

⁴ Ku na de të bï kɔc kɔ̈k ke Makedonia në yɛn ëtök, ku yokkï week akën thök ë guiɛɛk, ka wook (acä bï lueel an, ee week), wo duëër yäär ë aŋäth cï wo week ŋɔ̈ɔ̈th, ku lɛc cï wo röt leec në këdun.

⁵ Aguɔ lueel ë yapiɔ̈u an, bä mïthëkɔckuɔ dhil yɔ̈ɔ̈k an, bïk kɔn lɔ tëde week, lek kë cäk gam ë dhuëëŋ kɔn guik abï thök, kë cän këde kɔn lɛ̈k week, luɔi bï en aa këde dhuëëŋ, acie këde ciɛɛŋ cï we dhil cieŋ.

⁶ Ku cöökë en a luɛɛl an, raan cum ë kalik, ka bï kalik tem ayadäŋ, ku raan cum ëdhuëëŋ, ka bï tem në dhuëëŋ aya.

⁷ Raan ëbɛ̈n ë ye miööc ë miɔ̈cdɛn cï kiëët ë yepiɔ̈u, ke cïï gɛm në dhiën dhiɛɛu en, ku cie ciɛɛŋ cïï ye cieŋ: raan ee miööc në piɔ̈n mit en anhiɛɛr Nhialic.

⁸ Ku Nhialic aduëër dhuëëŋdepiɔ̈u ëbɛ̈n tɔ dït tëde week, ke we bï kuɛth aläl anandun në këriëëc ëbɛ̈n, aguɔkï kuɛth ë lëu bä wek luɔi piɛth aa lëu ëbɛ̈n.

⁹ Acït man cï e gɔ̈ɔ̈r an, “Acï kake thiäi wei, gëm keek kɔc kuanynyïïn, Ku piath ë yenpiɔ̈u atɔ̈u athɛɛr.”

¹⁰ Ku ënɔɔnë, Raan ee raan cum yiɛ̈n kɔ̈th, ku ye raan cäm yiɛ̈n kuïn, abï we yiɛ̈n kɔ̈thkuön lak com, ku ŋuɛk ke, ago piathëpiɔ̈ndun ŋuak ë luɔk:

¹¹ ke we bï tɔ kueth ë këriëëc abäk piɔ̈ɔ̈th adhuɛ̈ŋ aläl, en aye Nhialic tɔ yök lɛc në wook.

¹² Luɔi ë kuny ee kɔc röt konyë ee kɔc ɣerpiɔ̈ɔ̈th tɔ kueth aläl në kë dak keek, ku acie yen etök, piath de luɔiyë ee rɔt ŋuak aya, në luɛl ee kɔc e lueel an, thieithieei Nhialic, ëcaŋɣɔn.

¹³ Ŋïny cï kek we ŋic piɔ̈ɔ̈th në luɔiduönë, yen aye kek Nhialic lɛc nɔm, në biäk de rëër rɛ̈ɛ̈r wek ë gämic gäm de wëlpiɛth ke Kërtho, ku në biäk de piɔ̈nduön adhuɛ̈ŋ aa wek keek miɔɔc ë kakun ayï kɔc kedhie.

¹⁴ Ku kegup ayadäŋ, të ye kek lɔ̈ŋ ë biäkdun, ke ke ye week tak aläl, në biäk de dhuëëŋ dïït ë Nhialic nu ë wepiɔ̈ɔ̈th dhuëëŋ dït aläl.

¹⁵ Thieithieei Nhialic ë biäk de miɔ̈cdɛn ë ye miööc ë dhuëëŋ, miɔ̈c liu eenë!