2 Kor 8 - JAM DE NHIALIC 2011

Rëër de Kɔc cï Gam

¹ Ku däŋ kï, wek tɔku ŋic dhuëëŋ de Nhialic piɔ̈u, wek mïthëkɔckuɔ, dhuëëŋ cï yiɛ̈n ɣööt ke Nhialic ke Makedonia.

² Acakaa kek ë ye them në këtuc dïït dhal keek, ke miɛt mit kek piɔ̈ɔ̈th aläl ku kuany de kenyïïn acïk piɔ̈ndɛn adhuɛ̈ŋ tɔ ŋuak rɔt abï dït aläl.

³ Ku yɛn ee cäätɔ de miɔ̈c cï kek miööc ë kaken, kë röŋ ke wëu cath ke keek, arëk acïk ŋuak nyin ayadäŋ, ku acïk tak ë këde nɔmden kapäc,

⁴ agokï wo lɔ̈ŋ ë läŋ dït an, buk kë cïk gam ëdhuëëŋ nööm, ku jɔku mat ë luɔi yic në keek ëtök, luɔi de kuny de kɔc ɣerpiɔ̈ɔ̈th.

⁵ Ku acïï cït kë ë ŋäthku tei, acïk röt kɔn gäm Bɛ̈nydït, ku gɛmkï röt wook në këde piɔ̈n ë Nhialic.

⁶ Agoku Tito yɔ̈ɔ̈k an, cït man cï en ë kɔn gɔl, ka bï dhuëëŋë thöl ë weyiic aya.

⁷ Ku acït man cä wek kuɛth në këriëëc ëbɛ̈n, në gäm, ku në jam, ku në ŋïnydekäŋ, ku në lɛ̈th lɛ̈th wek yiic, ku në nhiëër nhiaar wek wook, en ja wek aa kuɛth në dhuëëŋ ayadäŋ.

⁸ Acie luɔi dhiɛl wek e loi en luɛɛl, ee biäk de lɛ̈th ë kɔc kɔ̈k yiic en a luɛɛl ɛn en, ku ee thëm thɛn ɛn nhiëërdun ayadäŋ nɔn ee yen yic.

⁹ Wek ŋic dhuëëŋ de Bɛ̈nydan Yecu Kërtho piɔ̈u, acakaa yen ë juëc ë kake, ke ye rɔt tɔ ye raan kuany nyin në biäkdun, luɔi bä wek aa kɔc juëc ë kakun në kuany kuɛɛny en nyin.

¹⁰ Ku yɛn ë löŋdï tääu në këde jamë: kënë aduëër piath tëde week, wek kɔc cï käŋ kɔn gɔl run wään, acie në luɔi tei, ee gäm cä wek piɔ̈ɔ̈th dɛ gäm ayadäŋ.

¹¹ Ku ënɔɔnë jakï luɔi de käŋ thöl ayadäŋ, ago ciët man nu gäm de piɔ̈u, ke thölëkäŋ abï nu aya në ka nu ë wecin.

¹² Ku na nu gäm ë raan piɔ̈u, ka bï tɔ ye piathde, në këde kë nu ë yecin, ku acie në këde kë liu ë yecin.

¹³ Ku yɛn cïn piɔ̈u luɔi bï kɔc kɔ̈k dɛ lɔ̈ŋ, ku duɔɔnykï?

¹⁴ Ee kït bä wek kït en akaar an, ënɔɔnë kuɛthdun abï keek kony në kë dak keek, na ëkööl däŋ, ke kuɛthden abï we kony në ke dak week, aguɔkï kït wedhie.

¹⁵ Acït man cï e gɔ̈ɔ̈r an, “Raan cï kajuëc kuany, acïn kë cï döŋ kekë yen, ku raan cï kalik kuany, ka cïn kë dak en.”

Tito ku Kɔc ee Cath ë Yen

¹⁶ Ku thieithieei Nhialic Raan ë tɛ̈ɛ̈u lɛ̈thë yic manë guöp ë Tito piɔ̈u në biäkdun.

¹⁷ Ee yic, acï löŋda gam, ku nɔn lëth en yic aläl, ku jɔ lɔ tëde week në këde piɔ̈nde etök.

¹⁸ Agoku mɛnhkënëda tooc kekë yen ëtök, raan cï leec ë ɣööt ke Nhialic yiic kedhie në baŋ de wëlpiɛth.

¹⁹ Ku acie kënë etök, ee raan cïï ɣööt ke Nhialic lɔc an, buk cath ëtök ë yen, lok kë cï gam ëdhuëëŋë looi, ke Bɛ̈nydït bï dhuëëŋ yök, ku luɔi kɔɔr wok nɔn bï wo kɔc kony.

²⁰ Ku wo cïn piɔ̈ɔ̈th luɔi bï en dɛ raan bï wo gɔ̈k në juëc de käŋ ka looi wok kakë.

²¹ Agoku käŋ aa döt apiɛth, acie Bɛ̈nydït nɔm tei, ee kɔc nïïm ayadäŋ.

²² Ku wo cï mɛnhkënëdan däŋ tooc kekë keek ëtök, raan cuk kɔn them ëcaŋɣɔn ku cuk yök alëthic në kajuëc, ku ënɔɔnë alëthic awär man wään në biäk de aŋäth ŋɛ̈ɛ̈th en week arëët.

²³ Ku na de raan lop ë këde Tito, ee raan rom wok ëtök ku luiku ëtök në këdun, ku na lop raan ë këde mïthëkɔckuɔ, ayek tuuc ke ɣööt ke Nhialic, ku yek dhuëëŋ de Kërtho.

²⁴ Yen nyuöth wek keek yic ee nhiëërdun yic ë ɣööt ke Nhialic nïïm, ayï yic ee lɛcda yic, lɛc ee wo röt leec ë këdun.