2 Kor 5 - JAM DE NHIALIC 2011

¹ Ku kënë aŋicku an, ɣöndan ë piny nɔm, yen paany ee wok rëër thïn, të cï en riääk, ke wo de ɣön bɔ̈ tëde Nhialic, ɣön ë cïï yïk ë raan ciin, ee ɣön bï tɔ̈u athɛɛr paannhial.

² Ku wo ye kïm ë ɣön nu wo thïnë yic, ku yok kɔɔr aläl luɔi bï wo ɣönda cieŋ cït man ë lupɔ, ɣöndan bɔ̈ tënhial:

³ ku të ye wok lupɔ cieŋ në yic, ke wo cïï bï yök ë wo cïn kɔ̈ɔ̈th lupɔɔ.

⁴ Ku wok kɔc ë tɔ̈u ë paany yic ënɔɔnë, wo ye kïm ëyic, ku yok duɔɔny, ku acie rëër bï wo rëër ke wo cïn kɔ̈ɔ̈th lupɔɔ en kɔɔrku, wo kɔɔr luɔi bï wo kɔ̈ɔ̈th dɛ lupɔɔ, ago këdan kɔɔr thuɔɔu, ago liek ë pïïr.

⁵ Ku Raan ë cuëc wo në këmanë guöp en aye Nhialic, Raan cï wo gäm Wëikɛn dït, ee biäk de kë buk yök rial.

⁶ Agoku cool ë riit wok wopiɔ̈ɔ̈th, në ŋïny ŋic wok ëcöökë an, të nu wok baai ë guöpda yic, ke wok tɔ̈u roor të liiuwë Bɛ̈nydït.

⁷ (Ee gäm en aye wo rëër acie daai).

⁸ Wo ee wopiɔ̈ɔ̈th riit, dï, ku yok lueel an, aduëër ŋuän tëde wook të tɔ̈u wok roor të liiuwë guöpda, ku tɔ̈uku baai në Bɛ̈nydït ëtök.

⁹ Ku kënë en ayok cool ë kɔɔr wok en arëët an, të nu wo baai ayï të nu wo roor, ke wo bï miɛt ë Bɛ̈nydït piɔ̈u.

¹⁰ Ku wo bï dhil tïc ë thööny de Kërtho nɔm wodhie, thööny de guiëërëlöŋ, ago raan ëbɛ̈n käŋ yök ka bï röŋ në kë cï looi ë guöpde yic, nɔn ee yen këpiɛth, ku nɔn ee yen kërac.

Määth në Nhialic ë Yecu Yic

¹¹ Yen ka, luɔi ŋic wok riɔ̈ɔ̈c bï kɔc dhil riɔ̈ɔ̈c ë Bɛ̈nydït, ke wo ye kɔc guët nïïm, ku Nhialic aŋic wopiɔ̈ɔ̈th, ku yɛn duëër piɔ̈u miɛt të cä wek wook ŋic piɔ̈ɔ̈th ayadäŋ në jam ë yak yök ë wepiɔ̈ɔ̈th.

¹² Ku wo cïï röt ee bɛ lɛ̈c week, wek ayok tɔ yök kë duɛ̈ɛ̈r wek röt leec në biäkda, ke we bï dɛ kë bä wek kɔc bɛ̈ɛ̈r, kɔc ee röt leec në kë cï tïc tei, ku cïkï röt ee leec në kë nu ë raan piɔ̈u.

¹³ Ku na ye të jiɛɛm wok wei, ee këde Nhialic, ku na yok nïïm piath, ee këdun week.

¹⁴ Nhiëër ë Kërtho ee wo cieŋ, ayok lueel alë an, thon ë thuowë raan tök në biäk de raan ëbɛ̈n, ka yen thon cï raan thou ëbɛ̈n ka.

¹⁵ Ku thon thou en në biäk de raan ëbɛ̈n, ee kë cïï kɔc pïïr bï bɛ pïïr ë këde yenhden, ka bïk pïïr ë këde raan cï thou në biäkden ku be rɔt jɔt.

¹⁶ Yen acïn en raan beku ŋic ë baŋ de guöp: acakaa Kërtho guöp, të ciɛk wok e kɔn ŋic në baŋ de guöp, ka cuku be ŋic aya.

¹⁷ Yen tëde ka, të de yen raan nu ë Kërtho yic, ka ye kë cï piac cak: kathɛɛr acïk lɔ ya, wɔikï, käŋ acï ke piac cak kedhie.

¹⁸ Ku käŋ aake bɔ̈ tëde Nhialic kedhie, Raan ë wo tɔ mät në yen në Yecu Kërtho, ago luɔi de mät yiɛ̈n wook.

¹⁹ Luɔi ë nu Nhialic ë Kërtho yic, ee piny nɔm tɔ mät në yen, ku luɔi cïï en ka cïï kɔc wööc ee mac ë keyiëth, ago jam de mät tääu ë wocin.

²⁰ Ku ënɔɔnë wok ee tuuc ke Kërtho, acït man lɛ̈ŋ ë Nhialic kɔc në wothook: wek läŋku në biäk de Kërtho an, bɛkï määth në Nhialic.

²¹ Yen raan kuc kërac acï tɔ ye kërac guöp në biäkda, luɔi bï wo tɔ ye piathëpiɔ̈n ë Nhialic në yen.