2 Kor 4 - JAM DE NHIALIC 2011

Kuɛth de Wëi në Tööny de Tiɔpic

¹ Yen ka, ënɔn de wo nïïm luɔiyë, acït man cï wo kokdepiɔ̈u yök, ke wo cie bäp.

² Ku ka ke ayäär ka cï moony acuk ke jäi, ku wo cie rëër ë wo ye ruɛ̈ny, ku cuku läm ë Nhialic ee cäkic, ee yic en a yok tɔ tiëc, ago wo ŋic ë kɔc piɔ̈ɔ̈th kedhie nɔn piɛth wok ë Nhialic nɔm.

³ Ku të cï wëlkuɔn piɛth kum, aye ke kum tëde kɔc mɛ̈ɛ̈r wei.

⁴ Kek kɔc cïï jɔŋ rɛɛc ceŋ pinyë nɔm ënɔɔnë tɔ cɔɔr piɔ̈ɔ̈th, kek kɔc reec gäm, ke riau de wëlpiɛth ke cïï keek bï riaau, wëlpiɛth ke dhuëëŋ de Kërtho, raan ë tɔ̈u ë täu de Nhialic guöp.

⁵ Ku wo cie guïïr ë këda, ee këde Kërtho Yecu Bɛ̈nydït en ë yok guiir, ku wook, wok ee lïïmkun në biäk de Yecu.

⁶ Luɔi ee yen Nhialic, Raan ɣɔn yöök ɣɛɛrëpiny, an, “Bä bei tëcol, ye piny riaau!” Yen aa riau wopiɔ̈ɔ̈th, agoku riau de ŋïny de dhuëëŋ de Nhialic yök, riau nu ë Yecu Kërtho nyin.

⁷ Ku wo ee këpiɛthë muk ë ka cï cuëëc ë tiɔp yiic, kë dïït ë riɛl wär këriëëc kë bï aa këde Nhialic, ku cïï bɔ̈ tëde wook.

⁸ Wo cïï katuc tuɔɔk, ku të luïny wok acie liu, wo ë nïïm mum, ku wo cïï nïïm ee mum ëtaiwei:

⁹ wok ee yɔŋ, ku wo kënë päl wei, wo ye dɛɛny piny, ku cïï wo näk ëliŋliŋ.

¹⁰ Thon ë Bɛ̈nydït Yecu en ayok cool ë ɣɛ̈ɛ̈c wok en ë wogup, ke pïïr ë Yecu bï tïc ë wogup ayadäŋ.

¹¹ Ku wo kɔc pïïr, wo ye cool ë yïnë wo thuɔɔu në baŋ de Yecu, luɔi bï pïïr ë Yecu tïc ë guöpda yic guöp de yic thuɔɔu.

¹² Yen tëde ka, thuɔɔu ee luui ë woyiic, ku lui pïïr ë weyiic.

¹³ Ku wo cath wo wël töŋë wël ke gäm, acït man ee këcïgɔ̈ɔ̈r ye lueel an, “Acä gam, en aa jam ɛn.” Ayï wook ayadäŋ, wok gäm, ku yen aa jiɛɛm wok.

¹⁴ Në ŋïny ŋic wok cöökë an, Raan wään jɔt Bɛ̈nydït Yecu nhial, en abï wo jat nhial aya në Yecu, ago wo tääu ë yenɔm wokë week ëtök.

¹⁵ Ku käŋ kedhie atɔ̈ukï në biäkdun, ke dhuëëŋdepiɔ̈u bï rɔt ŋuak në kɔc juëc në luɛl cï kɔc juëc thieithieei lueel, ke Nhialic bï dhuëëŋ yök.

Gäm Pïïr

¹⁶ Yen acïï wok ee bäp, ku na cäk jɔ tiaam en ë raandan nu biic, ke raandan nu thïn aye bɛ cool ë cuɛ̈ɛ̈cëye ë aköölnyïïn kedhie.

¹⁷ Këpiɔɔldan dhal wook, ke bï dap lɔ wïth wei, aye wo luöi dhuëëŋ thiek dhuëëŋ wär kë dhal wook aläldïïtë, ku ye tɔ̈u athɛɛr.

¹⁸ Në luɔi cïï wok ka cï tïŋ ee tak, ee ka kënë tïŋ kek ayok tak: ka cï tïŋ ayek ka ke aköölkë tei, ku ka kënë tïŋ ayek tɔ̈u thɛɛr.