2 Kor 3 - JAM DE NHIALIC 2011

Awuut ke Löŋ cï Piac Mac

¹ Cuk bɛ gɔl ë lɛc leec wok röt? Ku kɔɔrku awereek bï wo leec, cït man ë kɔc kɔ̈k, awereek cï gäär week, ayï ka bäk gɔ̈ɔ̈r ku yiɛ̈nkï ke wook?

² Wek aye awerekda awerek cï gɔ̈ɔ̈r ë wopiɔ̈ɔ̈th, ku cï ŋic ë raan ëbɛ̈n ku yek kueen.

³ We ye tïc nɔn aa wek awerek de Kërtho, awerek cï looi në wook, ku kënë gɔ̈ɔ̈r ë miök ë gäär, ee Wëi ke Nhialic pïïr kek ë gɛ̈ɛ̈rë ye, ku acie pɛɛm ë kur kek ë gäär kɔ̈ɔ̈th, ee pɛɛm cɔl piɔ̈ɔ̈th ke kɔc.

⁴ Ku aŋäth yïnya en aŋɛ̈ɛ̈th wok Nhialic në Kërtho.

⁵ Ku wo wapäc acïn kë duëërku lueel ë ye an, ë bɔ̈ në wook, lëu ee wok käŋ lëu abɔ̈ tëde Nhialic,

⁶ Raan cï wo tɔ lëu käŋ, buk aa kɔc ee ka ke löŋ cï piac mac ŋiëc guiir, ku guiëërda acie këde wël cï gɔ̈ɔ̈r tei, ee këde wëi: wël cï gɔ̈ɔ̈r tei ayek kɔc nɔ̈k, ku wëi kek aye kɔc tɔ pïïr.

⁷ Ku na guiëërku ë löŋ de thuɔɔu, en aye löŋ ɣɔn cï gäär ë kur kɔ̈ɔ̈th, të cï e yiëkic dhuëëŋ, ago mïth ke Yithriɛl dhal ë wui woi kek Mothe nyin, në baŋ de dhuëëŋ ë yennyin, ku dhuëëŋ ee kë kɔɔr liu,

⁸ na guiëër ë wëi eeŋö cïï en guiëërë bï wöör ë dhuëëŋ?

⁹ Ku na guiëër ë jäny bï kɔc jɔ̈ɔ̈ny tën ee yen dhuëëŋ, ke guiëër ë piathëpiɔ̈u ee guiëërë wöör ë dhuëëŋ aläldïïtë.

¹⁰ Kë cï gäm dhuëëŋ ɣɔn acïn dhuëëŋ be cath kekë yen ënɔɔnë, në biäk de cöökë an, a wɛ̈ɛ̈r dhuëëŋ wär këriëëc.

¹¹ Ku na kë bï nyaai, të ciɛth en kekë dhuëëŋ, ke kë bï döŋ anande acath kekë dhuëëŋ wär dhuëëŋë aläldïïtë!

¹² Yen ka, nɔn ciɛth wok ë aŋäth yïnya, wok ee jam ke wo ril nyïïn aläl.

¹³ Ku wo cïï cït Mothe, ɣɔn ë yen e nyin kum ë lupɔ, ke mïth ke Yithriɛl ke ke cïï thök ë dhuëëŋë duëër woi, dhuëëŋ kɔɔr luɔi bï en jäl.

¹⁴ Acïk nïïm riɛl: ku aɣet cï ëköölë lupɔ manë guöp ë döŋ akënë nyaai, të ye awerek kueenic awerek de löŋ cï mac thɛɛr, ku lupɔyë aye nyaai në Kërtho yic.

¹⁵ Ku aɣet cï ee köölë, të ye löŋ de Mothe kueenic, ke lupɔ ke ŋoot ke rɛ̈ɛ̈r ë kepiɔ̈ɔ̈th.

¹⁶ Ku kööl bï kek kepiɔ̈ɔ̈th wɛ̈l Bɛ̈nydït tei, ka bï nyaai.

¹⁷ Ku Bɛ̈nydït en aye Wëidït: ku të nu Wëidït ke Bɛ̈nydït, en ee të nu luny bï kɔc lony.

¹⁸ Ku wook wodhie, wok ee dhuëëŋ de Bɛ̈nydït woi cït man ë wo käŋ woi ë mɛnhdheric, ke cïn lupɔ kum wonyïïn, agoku röt aa puk buk aa ciët täudɛn manë guöp, ku yok dhuëëŋ yök dhuëëŋ ee cool ë ŋuak rɔt, ku ye Bɛ̈nydït en abïï en, yen aye Wëidït.